اعرف إزاي تظبط نومك في رمضان
معروف إن في رمضان يومنا بيتقلب عشان مابتلحقش تنام قبل السحور وبتستني لحد ما تتسحر عشان تنام، فبتنام متأخر وغالبا بتصحي متأخر، أو لو عندك شغل هتنام متأخر وهتصحي بدري وهتفضل تعبان طول رمضان.
وعشان ماينفعش تتمرط الـ 30 يوم وساعتك البيولوجية تبوظ، اعرف الخطوات اللي ممكن تظبط بيها يومك في رمضان:
1- اظبط ساعة معينة لنومك:
عموما جسم الإنسان بيحب الروتين وبيتعود عليه بسرعة، فحاول يبقى عندك مواعيد نوم وصحيان ثابتة حتى في أيام إجازتك، عشان كده حاول تحافظ كمان على الروتين اللي بتعمله قبل النوم لإن ده هيظبط مخك على جدول نوم معين وبالتالي هتعرف تروح في النوم أسرع، وحاول تفتح الشباك أو تدخل نور الشمس عشان جسمك يفهم إن ده وقت الصحيان.
2- العب رياضة:
الرياضة عموما مفيدة في حاجات كتير مش بس للعضلات وفقد الوزن لكن مفيدة كمان عشان تخليك تنام بهدوء، بالإضافة كمان إن مواعيد ممارسة الرياضة بتأثر على النوم، فالرياضة قبل النوم على طول بتدي الجسم طاقة واللي بينتج عنها نشاط وبالتالي بيبقى فيه صعوبة في النوم عشان كده أحسن وقت للرياضة بيبقى قبل النوم بـ 3 أو 4 ساعات.
3- اعرف بتاكل إيه إمتي:
نوع الأكل له تأثير مباشر على النوم، وبما إن السحور بيبقى الوجبة الأخيرة وكل الأكل في رمضان بيبقى بليل أصلا، فحاول تقلل من الأكلات الدسمة والأكلات اللي فيها سكريات لإنها بتسبب ارتفاع في مستويات السكر في الدم وده اللي بيدي الجسم طاقة كبيرة ومابيكونش وقتها برضه، عشان كده عموما حاول تخلى آخر وجبة تاكلها تبقى قبل ما تنام بساعة على الأقل.
4- لو هتنام في نص اليوم يبقى وقت قليل:
طبعا ماننكرش إننا لما بننام في نص اليوم بيقى فيه طاقة نكمل اليوم، بس لو بلاش النوم لفترات طويلة لإنها بتقلب روتين اليوم، فحاول تبقى القيلولة دي لمدة 20 دقيقة.
5- قلل من التعرض للإلكترونيات:
معروف إن في رمضان بيبقى فيه مسلسلات كتير وأغلبنا بنتفرج على التلفزيون كتير ده غير الموبايل اللي دايما بنبص فيه، وده اللي بيخلينا نتعرض للضوء الأزرق اللي بيجي من الموبايلات والتلفزيونات والكمبيوتر وغيرهم، عشان كده حاول ماتتعرضش للإلكترونيات من بعد المغرب لحد قبل النوم لإن ده بيأثر على الساعة البيولوجية، فحدد وقت تتفرج فيه على التلفزيون أو تتابع فيه اللي عايز تتابعه، أو توقف استخدام الإلكترونيات قبل النوم بساعة على الأقل.
6- قلل من الكافيين والنيكوتين:
طبعا في رمضان اللي بيحصل إن لو حد بيدخن أو بيشرب قهوة كتير، بيعوض الكميات دي كلها بعد الفطار، حاول تقلل الكميات وتشرب القهوة مثلا بعد الفطار مرة عشان تظبط نومك، وطبعا خلي بالك من الكافيين المتخفي في صورة الشوكولاتة والبيبسي لإن كل ده بيقلل راحة الجسم في النوم وبيساعد على الأرق.
