7 أسباب تخليك تتقبل الماضي.. واعرف إزاي تتخطاه!

كتبت/ علياء عبد الغفار

حكايات مواقف كلها.. في الماضي دي أنا عيشتها.. كلنا اتأثرنا بأغنية بسرح وأتوه للفنان أمير عيد، وبهدلنا الدنيا عياط ودراما، لمجرد إحساسنا بإن فعلا الماضي سرق عمرنا، وإن خذلانه وذكرياته بتطاردنا وبنحاول ننساها بأي شكل.

بس الهروب اللي أغلبنا بيلجأ له مش هو الحل المثالي ولا هو الحل خالص.. فلو عايز تتخطى الماضي بطريقة صح من غير ما تهرب وخلاص هنقولك 7 أسباب تخليك تتقبل ماضيك بحلوه ومره!

1. خط المستقبل:

أول حاجة ماضي أي إنسان ما هو إلا خطوط بيمشي عليها مستقبله، وكان حد زمان قال إن اللي مالهوش خير في ماضيه مالهوش خير في اللي جاي.. وإحنا فعليا من غير ذكريات الماضي اللي عايزين ننساها دي مانسواش حاجة، في جملة تانية بتقول، “إن كانت الذكريات الحزينة هي آخر ما تملك .. فلا تنساها وتذكّرها”، لأن بالرغم من إن فيه ذكريات مؤلمة، بس في الآخر هي جزء من عمرك اللي مش بيتكرر مرتين، فلازم تقدّرها لأنها أكيد بقت سبب في وجود تغيير إيجابي حصلك في حياتك.

2. لا للبكاء على اللبن المسكوب:

لما نتعلم من كل حاجة مرينا بيها في الماضي بدل ما نقعد نبكي على اللبن المسكوب، ده هيساعدنا دايما نحط قدامنا أهداف على المدى القريب والبعيد، ونشوف إيه اللي حصل في الماضي اللي كان السبب في تعطيل الأهداف دي إنها تتحقق ونحاول نواجهه.

3. ذكرياتي يا ذكرياتي: 

الماضي له جوانب إيجابية كتير تخلينا نتقبله، زي جانب الذكريات مثلا، وعلى رأي أغنية وردة، ذكرياتي يا ذكرياتي انتي كل حياتي وأكتر من حياتي، إحنا كلنا بلا استثناء بييجي علينا أوقات صعبة وضغط شغل وضغط حياة عموما ومابنبقاش عارفين نكون ذكريات جديدة، بس مش بيطلّعنا من المود ده غير ألبوم الصور اللي بنفتحه، وتلقائيًا ابتسامة عريضة تغطي وشنا.

4. الرحيل الأبدي:

معاك إن الذكريات أحيانًا بتكون سلاح ذو حدين، زي مثلا لما تفتكر مواقف قضيتها مع ناس مابقوش في حياتك، ساعتها بيكون أسوأ شعور ممكن تمر بيه، خصوصا لو كان رحيل أبدي في حالة الموت، بس ده برضه نقدر نتغلب عليه، بإننا نفتكر مواقفنا معاهم، ونحط في دماغنا إننا واخدين بريك صغير من بعض، وهنرجع نعمل ذكريات أحلى تاني.

5. ماضيك هو مُعلمك:

ممكن نستفيد من الماضي لما يبقى دايما قدامنا ! يعني لازم نكتب وندون كل حاجة حصلتلنا وبتحصلنا في وقتها؛ عشان قدام لما نقراها وهي ماضي، نفتكر قد إيه كنا مبسوطين في اللحظة دي، ونفتكر إن الابتلاءات مش بتدوم أبدا، أو نفتكر موقف سخيف عدينا بيه، فنتأكد إن أيا كان المود المخيم علينا دلوقتي، فهو أكيد أحسن من وقت الذكرى دي.

6. عايزين نلبس ألوان كفاية أسود:

إحنا لو ماتخطيناش الماضي، هنفضل لابسين أسود مدى حياتنا، وده لأننا هنفضل فاكرين كل يوم الناس اللي سابونا ومشوا، كل ما نحاول نتخطى وفاة حد هنفتكر التاني والتالت، فبالتالي هنفضل حاسين بتأنيب الضمير من ناحيتهم وإننا ماينفعش نعيش حياتنا من غيرهم ولازم نفضل لابسين الأسود حزنًا عليهم، وده لأننا مش بنسمح للوقت ينسينا أو يخفف من صدمة الموقف ومُصرين نوقف الزمن ونفضل عايشين في لحظات معرفة الخبر.

7. أنت هنا بسبب إمبارح: 

وزي ما قولنا قبل كده في النقطة السادسة إن الماضي له فضل كبير في إنه يعلمك، عشان كده هو السبب إنك تكون في مكانك النهاردة، في المنصب ده في شغلك، في أفكارك الناضجة دلوقتي، في علاقاتك اللي سطحتها مع ناس يستحقوا إن مايكونش في بينكم علاقة أصلا، في إنك دلوقتي عايش في 2023، بتعاصر حاجات جديدة في العالم، بتجرب حاجات مكنتش جربتها إمبارح، كل ده بسبب إن إمبارح بماضيه، عدى بكل خبراته وتجاربه وخلاك توصل لـ النهاردة.

ودلوقتي بعد ما عرفت الأسباب اللي تخليك تتقبل الماضي وتتخطاه أو بعض الأسباب حتى.. تعالى نقولك شوية طرق علمية تساعدك في التخطي فعلا حسب ما ذكرت مجلة medical news today في أحد مقالاتها:

1. أول خطوة عشان تتخطى الماضي، لازم تدرك من جواك وتتأكد من ضرورة التخطي ده، وقرار التخطي بييجي في أوقات مختلفة لمختلف الناس، ولكن المهم إنه بمجرد ما ياخد الشخص القرار ده، بيكون بإمكانه إنه ينفذه.

2. عشان تتخطى أحداث الماضي لازم تسمح لنفسك تحس بكل شعور سئ ومش لطيف الماضي بيخليك تعيشه، من غير ما تحاول تحارب أو تصلح المشاعر دي، وده هيساعدك تعالج وتتخطى أي حاجة حصلتلك في الماضي، بس لازم تتأكد إنك بتخرج الطاقات دي في مكان آمن، زي مع حد من صحابك، أو دكتور متخصص.

3. الأشخاص اللي حاسين بالخجل أو الذنب ناحية الماضي، ممكن إحساسهم بالمسؤولية ناحية المستقبل يساعد في إنهم يتخطوا الشعور ده، وبالتالي يساعد في تحملهم ملكية أفعال الماضي، وإنه لو كان بإمكانهم تحمل مسؤولية الماضي، فهيقدروا يتحملوا مسؤولية المستقبل.. بس يعني بلاش تجلد ذاتك أنت اتعلمت برضه.