أسباب تخليك فخور إنك حاسس نفسك لسه صغير من جواك
أكيد غنيت في وقت ما أغنية “أنا مهما كبرت صغير” وحسيت إن أه فعلا أنا كبرت في السن بس أنا لسه صغير من جوايا، أو قولت في يوم جملة “العمر مجرد رقم” وحسيت إن لا الرقم اللي في البطاقة ده مش حقيقي وكتير أوي عليك وإن سنك أصغر من كده.
ماتخفش إنت مش لوحدك اللي بتحس الإحساس ده، والإحساس ده مش معناه إنك بتصغر نفسك بالعافية أو بتتصابى يعني، لإن العمر اللي بتحس نفسك فيه هو أهم من عمرك الحقيقي اللي بتقوله لما حد بيسألك عندك كام سنة أو مكتوب في البطاقة وشهادة الميلاد.
موقع “Insider” بيقول إن العقول هي أكتر عضو معقد في جسمنا ومن ضمن المعلومات المؤكدة إن الشخص اللي بيحافظ على دماغه تبقى شباب ده شئ صحي وحيوي، وإن الإحساس ده بيمنع آثار الشيخوخة إنها تبان على الشخص.
ووفقًا لبحث جديد اتنشر في مجلة “Frontiers in Aging Neuroscience” ممكن يكون فيه سر كمان عشان الشخص دماغه تفضل شباب والسر ده مرتبط بالعقل.
فقررت دكتورة اسمها “Jeanyung Chey” من جامعة سيول الوطنية في كوريا إنها تحقق في العلاقة اللي بين عمر الدماغ اللي الشخص بيقولها لنفسه والعمر الحقيقة، وعملوا البحث على 68 شخص سليم عمرهم بين 59 سنة و 84 سنة، وعملوا فحوصات بالرنين المغناطيسي للدماغ عشان تحلل دماغهم.
وجاوب المشاركين على استبيان قالوا فيه عمرهم ولو كانوا حاسين إنهم أكبر من سنهم أو أصغر، وطبعا تم تقدير قدراتهم المعرفية وصحتهم الجسدية.
التجربة دي لقيت إن الأشخاص اللي قالوا إنهم حاسين إنهم أصغر كانوا عرضة أكتر إنهم ياخدوا درجات أحسن في اختبارات الذاكرة لواعترفوا إن صحتهم أحسن كانوا أقل عرضة للإصابة بالاكتئاب، والموضوع ماكنش متعلق بأدائهم بس، ” لأن اللي حسوا إنهم أصغر زاد عندهم حجم المادة الرمادية في التلفيف الأمامي السفلي والتليف الصدغي العلوي ، ودي مناطق مرتبطة باللغة والكلام والصوت.
وقال “Jeanyung Chey” في بيان إنها لقيت الأشخاص اللي بيحسوا إنهم أصغر الخصائص الهيكلية لدماغهم أصغر في السن، والأهم كمان إن شخصيتهم أحسن وصحتهم الجسدية أحسن والوظائف الإدراكية كمان أفضل وإنهم أقل عرضة للاكتئاب.
الباحثين ماكنوش متأكدين لو كانت خصائص الدماغ الأصغر مسؤولة عن العمر الشخصي للشخص ولا لا، ” لكنهم كانوا بيشكوا إن اللي بيحسوا إنهم أكبر في السن ممكن يبقوا وعيهم أكتر بعملية الشيخوخة اللي في دماغهم.
وقالوا تفسير تاني محتمل إن الأشخاص اللي بيحسوا إن دماغهم أصغر بيزودوا نشاطهم البدني والعقلي وبيعيشوا حياة أكتر طاقة بشكل عام، وده اللي بيحسن صحة دماغهم، واللي بيحسوا إن سنهم أكبر بيستسلموا لسنهم وبيتوقفوا عن حبهم للحياة وده بيأثر على قدراتهم المعرفية.
وقالت “Jeanyung Chey” إن لو حد حس إنه أكبر من سنه فدي بتبقى علامة بالنسبة له عشان يقيم أسلوب حياته وعاداته ونشاطاته.
ده غير إن موقع “safe365” قال إزاي تحسس نفسك إنك أصغر من سنك الحقيقي في الخطوات دي:
1- خلي هدفك إنك تبقى شخص شاب:
افتكر نفسك وأنت صغير لما كنت في العشرينات لما كنت منفتح أكتر لتجارب أكتر واجتماعي أكتر، لإنك المفروض تفضل بنفس حيوية شبابك مهما كبرت، فمثلا على سبيل المثال جرب حاجات جديدة زي إنك تسافر أو تروح أماكن جديدة سواء محلية أو لا، وخلي جنبك أشخاص بيحسسوك بالنشاط.
2- حاول تحافظ على جسمك يبقى شاب:
قالت بعض الدراسات إن زيادة النشاط البدني ممكن يخلي الشخص يحس إنه أصغر في السن، وبيحسن الذاكرة والإدراك والصحة العامة طول العمر، وعشان تستغل كل الفوايد دي كل اللي عليك إن تحافظ على ممارسة رياضة بشكل روتيني منتظم بس.
3- زود رفاهيتك:
هنحس إزاي إننا أصغر لو كانت صحتنا العقلية متضررة من الحياة نفسها، عشان كده لزم تحس إن صحتك العقلية طول الوقت في رفاهية بالرغم من إنك بتكبر، وطبعا حاول تقلل التوتر حتى لو عن طريق إنك تقضي وقت أكتر من عيلتك وصحابك وخلي فيه وقت لنفسك تبسط نفسك فيه.
في النهاية السن مجرد رقم فعلا أهم حاجة اللي إنت حاسه بنفسك لإن ده اللي هيأثر فيك وفي طريقة تعاملك مع الأمور وده اللي هيأثر على صحتك سواء النفسية أو الجسدية.
