إزاي رامي عباس لعب دور كبير في مسيرة محمد صلاح؟
لما محمد صلاح وصل لطرابزون سبور ماكانش الانتقال مجرد خطوة جديدة في مشوار لاعب وصل لأعلى قمة في أوروبا.. لكنه كان كمان فصل جديد في شراكة طويلة بين صلاح ورامي عباس وكيل أعماله ومستشاره القانوني واللي بقى واحد من أهم الأشخاص في حياته الكروية.
واللافت إن صفقة طرابزون نفسها أظهرت من جديد أسلوب عباس في التفاوض والحفاظ على قيمة صلاح لأقصى درجة ممكنة.. سواء في الراتب أو الحوافز أو الحقوق التجارية.
صلاح في النهاية وقع عقد لمدة موسمين مع طرابزون سبور مقابل 17 مليون يورو في الموسم مع حصوله على 20% من عوائد المنتجات اللي تحمل اسمه بجانب حوافز مرتبطة بالأداء.
البداية.. مين كان وكيل صلاح؟
قبل ما رامي عباس يدخل الصورة صلاح كان لاعب صاعد في بازل السويسري قبل ما ينتقل لتشيلسي في يناير 2014 وكان وكيله وقتها مصري.
لكن العلاقة الأهم بين صلاح وعباس بدأت في فترة تشيلسي وقت ما كان صلاح بيعاني من قلة المشاركة وعدم الاستقرار.
عباس اللي كان بيعمل كمحامٍ ومستشار بدأ يبقى الشخص الأقرب لصلاح في الأمور القانونية والتعاقدية ومع الوقت أصبح ممثله الأساسي وبدأ يشارك في التخطيط لمسيرته بشكل كامل.
بعد الفترة الصعبة في تشيلسي انتقل صلاح لفيورنتينا على سبيل الإعارة في يناير 2015.. وبعدها لروما في صيف نفس السنة . وهناك بدأ يستعيد مستواه وبقى لاعب أساسي في فريق كبير بالدوري الإيطالي قبل ما روما يستكمل التعاقد معاه.
أول رهان كبير لعبه عباس في مسيرة صلاح كان خروجه من تجربة تشيلسي لمكان يقدر فيه يلعب ويتطور.. وده اللي حصل فعلًا في إيطاليا.
الصفقة اللي غيرت كل حاجة.. ليفربول
في 2017 وصل صلاح لأهم محطة في مسيرته لحد الوقت ده.. ليفربول. النادي الإنجليزي دخل في مفاوضات قوية مع روما لضم اللاعب وفي نفس الفترة كان رامي عباس موجود في إنجلترا لمتابعة تفاصيل الصفقة. وفي النهاية ليفربول قدر يحسم التعاقد مع صلاح مقابل حوالي 39 مليون جنيه إسترليني في صفقة كانت وقتها الأغلى في تاريخ النادي.
الانتقال ده كان نقطة تحول كبيرة في مسيرة صلاح ومعاه بدأت شراكته مع عباس تدخل مرحلة جديدة، خصوصًا إن اللاعب اللي ماقدرش يثبت نفسه في تشيلسي.. قدر في ليفربول يتحول لواحد من أهم نجوم الدوري الإنجليزي
مش مجرد وكيل.. شريك في القرار
اللافت في علاقة صلاح ورامي عباس إن صلاح نفسه كان بيتعامل معاه كشريك في القرارات المهمة وده ظهر بشكل واضح في مفاوضات تجديد عقده مع ليفربول في 2022. حتى إن كلية هارفارد لإدارة الأعمال أعدت دراسة حالة عن المفاوضات ووصفت عباس بأنه محامي ومستشار صلاح وركزت على تفاصيل المفاوضات الطويلة والمعقدة بين الطرفين.
في الوقت ده كان عقد صلاح القديم قرب يخلص.. واللاعب داخل على عامه الثلاثين فكان عباس عارف إن المفاوضات دي ممكن تكون واحدة من أهم فرص صلاح للحصول على عقد كبير يعكس قيمته. وفي المقابل صلاح كان واضح في رغبته في الاستمرار مع ليفربول لكنه كان عايز يحس إن النادي مقدّر قيمته بالشكل المناسب.
خلال المفاوضات أخبر عباس صلاح إن عرض ليفربول لسه بعيد عن المطالب اللي كانوا عايزينها.. ورفض صلاح العرض الأول. ومع تصاعد التفاوض ظهر عباس بشكل واضح على السوشيال ميديا في أكتر من مناسبة لدرجة إن ردوده ورسائله بقت جزء من قصة المفاوضات نفسها.
وفي النهاية صلاح جدد عقده مع ليفربول في 2022 لمدة موسمين، بعد مفاوضات كانت من أشهر قصص التفاوض في كرة القدم الحديثة.
والقصة كانت مهمة لدرجة إن هارفارد ناقشتها كدراسة حالة كاملة وتطرقت لتفاصيل زي الراتب والحوافز وحقوق الصورة وحتى الاختيار بين الحصول على مقابل ثابت أكبر أو نسبة أكبر مرتبطة بأداء اللاعب.
حقوق الصورة.. عباس دايمًا واقف في الضهر
دور رامي عباس ماكانش مقتصر على العقود والرواتب.. لكنه دخل كمان في ملف حقوق صورة صلاح. في 2018 حصل خلاف بين عباس والاتحاد المصري لكرة القدم بسبب استخدام صورة صلاح في حملة مرتبطة بطائرة المنتخب واعتبر عباس إن حقوق صورة اللاعب ما اتعاملش معاها بالشكل الصحيح خصوصًا إنه كان وقتها مديرًا للكيان المسؤول عن حقوق صلاح التجارية.
وفي أزمة تانية مع الاتحاد.. أكد عباس إن مطالبه كانت مرتبطة بضمانات تخص حقوق صلاح وصورته مع المنتخب وده يوضح إن حماية حقوق اللاعب كانت جزء أساسي من دوره.
أسلوب عباس.. صلاح بعيد عن المعارك
واحدة من أهم مميزات علاقة صلاح ورامي عباس إن عباس غالبًا هو اللي بيتولى المواجهات الإعلامية.. بينما صلاح بيركز على الملعب، عباس بيتعامل مع الشائعات والعقود وحقوق الصورة والردود على الأخبار وظهر ده بشكل واضح خلال مفاوضات تجديد عقد ليفربول.
وعلى مدار مسيرة صلاح كان عباس حاضر في أغلب التحولات المهمة.. من الخروج من تشيلسي والانتقال لفيورنتينا وروما لحد ليفربول وتجديد العقد وأخيرًا اختيار الخطوة الجديدة بعد نهاية رحلته في أنفيلد.
وفي صيف 2026 دخل صلاح في مفاوضات مع أكتر من نادٍ تركي وكان بشكتاش من أبرز المهتمين.. لكن المفاوضات شهدت خلافات مالية مرتبطة بالعمولة وحقوق الصورة قبل ما تتجه الصفقة في النهاية لطرابزون سبور.
وبعدها أتم طرابزون الصفقة ووقع صلاح عقد لمدة عامين مقابل 17 مليون يورو سنويًا بالإضافة لـ20% من مبيعات المنتجات اللي تحمل اسمه.
وده يمكن يكون أفضل تلخيص لعلاقة صلاح بعباس.. صلاح بيكسب الرهان جوه الملعب وعباس بيحاول يكسبه على طاولة المفاوضات والهدف في النهاية واحد.. الحفاظ على قيمة محمد صلاح كلاعب واسم تجاري في كل مرحلة من مسيرته.
