مين أول سنجل احتفل بيوم السناجل العالمي؟ وبدأ إزاي؟
يوم 11 نوفمبر من كل سنة بنفتكر أنا وانت وكل البؤساء في العالم إننا لسه سنجل وماعندناش حد يقولنا يا كوتي.. بس هو ليه في يوم للسناجل الناس كلها اتفقت عليه؟
كيف بدأ الـ “حداشر حداشر”؟
سنة 1993 وفي جامعة اسمها “نانجينج” في الصين.. ودي الرواية الأشهر يعني.. إن أربع طلاب في ريعان شبابهم وهم قاعدين في السكن الجامعي بدأوا يتكلموا عن حياتهم العاطفية ويفضفضوا لبعض.. زهقانين بقى انت عارف.
ومن هنا بدأوا يدوروا على طريقة يحتفلوا بيها بحياتهم وهم مش مرتبطين.. وفكروا إزاي يعملوا مناسبة خاصة بالسناجل اللي زي حالاتهم زي ما في عيد حب كده للي والعة معاهم.
ومن جامعة لجامعة.. الفكرة لفت جامعات الصين كلها.. ومنها للإنترنت والتجمعات والكافيهات.. ومن هنا ظهر لنا يوم الاحتفال بالـ Single Life اللي عارفينه دلوقتي.
اشمعنا يعني 11 ؟
يوم 11/11 فيه أربع أرقام كلهم رقم 1.. والرقم 1 لما بنكتبه بالإنجليزي شكله بيكون شبه العصاية المستقيمة الوحيدة كده.. وده بيودينا لتعبير في اللغة الصينية اسمه: Guanggun – 光棍
والتعبير ده معناه الحرفي “العصا العارية”.. وكانوا بيستخدموه زمان للإشارة للشخص السنجل اللي لوحده.. ومن هنا ارتبط الرقم والمعنى باليوم.
11/11 والتجارة شطارة
بعد شوية سنين.. وفي 2009 كانت نقطة تحول للتاريخ ده.. لما شركة Alibaba الصينية قررت تستغل المناسبة وتحولها لحدث تجاري كبير.
وبمشاركة 27 تاجر اختاروا يوم 11/11 عشان خلاص بقى مهم وموجود عن الشباب الصيني.. وعملوا حملة تخفيضات ضخمة.. تحت شعار إنك لو شخص سنجل تقدر تدلع نفسك برضه وتشتري لنفسك هدية ماتستناش حد يشتريهالك.
ونجحت التجربة.. وبدأوا التجار يزيدوا والمبيعات تكتر.. لحد سنة 2019 لما قدمت Alibaba الـ 11.11 بشكل عالمي.. واتحول الاسم رسميًا لـ 11.11 Global Shopping Festival.
ففي النهاية لو انت سنجل نحب نقولك إنك مش لوحدك.. ده الموضوع واصل للصين انت متخيل؟
ولو مش سنجل.. روح كلم كتكوتك يلا وجهز هدية الفلانتين من دلوقتي.. يابن المحظوظة يا فوزي!
