كيف بدأت موضة البنطلون للستات

دايمًا لما بنقعد مع نفسنا بنقول ياااه لو الموضة بتاعة زمان ترجع تاني ونشوف البدل والفساتين زي زمان.. ولأن الموضة من الحاجات المتغيرة طول الوقت.. اتغيرت من فساتين وجيبات لبنطلونات مختلفة الهاي ويست مرة والشارلستون مرة والواسع مرة والسكيني مرة ..بس أصلا عمرك فكرت امتى بدأت موضة البنطلونات؟.. وإيه أصلًا اللي خلى الستات تلجأ للبس البنطلون؟.. في الموضوع ده  هنقولك السبب وفقًا لموقع britannica و موقع  cxomedia وموقع medium وموقع theguardian

زمان البنطلونات كانت من الملابس الغير مناسبة للستات لحد أواخر القرن العشرين تقريبًا وكانوا بيعتبروها بتقلل الأنوثة.. وعلى الرغم من وجود ستات كتير  في الوقت ده كانوا بيلبسوا لبس شبه البنطلون بس للتمارين أو في البيت مش في الخروج!

 ووفقًا لمجلة سميثسونيان.. زمان في  القرن الـ 19 في أمريكا كانت الستات كلها بتلبس جيبات طويلة وتقيلة.. وكانوا بيواجهوا مشكلة مع الحر وكمان كانوا بيتكعبلوا بسببها.. وبيقعوا خلال عملهم في المصانع..

على الرغم إن كان في محاولات للبس البنطلونات من سنة 1851م لما صممت الست الطيبة “إليزابيث سميث ميللر ” حاجة بتشبه البنطلون لكن واسعة جدًا واتعرف باسم “البلومرز” وعلى الرغم من إن بعض الستات كانت بتلبسه وقتها لكنه عمل جدل وبطلوا يلبسوه بعدها بكام سنة..

وعلى الرغم من أن الستات اللي كانوا بيشتغلوا في المناجم قبل الحرب كانوا بيلبسوا بنطلونات.. لكنهم كانوا بيغطوها بالجيبات في وقت الراحة وغالبًا كانوا بيستعيروها من أفراد أسرتهم الرجالة.

لكن حصلت نهضة وقت الحرب العالمية الأولى بسبب إن فيه ستات كتير اشتغلوا مكان الرجالة فبقوا يلبسوا بنطلونات عشان يقدروا يشتغلوا في الأعمال الشاقة ويتحركوا براحتهم..

وخلال الحرب العالمية الثانية كانت الستات المدنيات والعسكريات بيلبسوا البنطلونات عشان تسهل حركتهم سواء في الشغل أو في الحياة اليومية.. ومن وقتها بقت تقدر النساء تلبس بنطلونات بعد الحرب خاصة للرياضة أو لراحتهم..

 

لكن خطوط الموضة استمرت في التركيز على الجيبات والفساتين لحد الستينات والسبعينات.

وبعد كده حاولت حركات دعم حقوق المرأة تدعم حرية الستات ويطالبوا بحريتهم في اختياراتهم للبس مريح ليهم وبقت البنطلونات منتشرة ومناسبة للستات في البيت وفي الشغل وفي الأماكن العامة كمان.

وكمان ثورة الهيبيز في السبعينيات عملت قلق وقتها وخلت في مساحة كبيرة للبس بالنسبة للستات وبقوا يقدروا يلبسوا كل حاجة عايزينها..ومع الوقت انتشرت البنطلونات في العالم كله ومابقتش مقتصرة على فئة معينة !

وفي سنة 2013م لغت فرنسا قانون كان بيحظر على الستاتفي باريس يلبسوا بنطلونات .. وقالت وزيرة حقوق المرأة الفرنسية وقتها أن القانون كان هدفه تقييد الستات!.

وفي الأخر كل ست حرة تلبس الحاجة اللي هي عايزاها طول ماهي مريحاها ومحدش ليه الحق يقيد حريتها أو يمنعها من الشعور بالراحة!