جهاز التحكم فيه بالموبايل  ممكن يبقى بديل للغرز الجراحية

دايمًا لما حد بيتعور.. الحل المعتاد بيكون الغرز أو الدبابيس الجراحية عشان يقفلوا الجرح ويبدأ يلتئم لكن المشكلة إن الطرق دي بتشد الجلد في اتجاه واحد.. وده بيكون مناسب للجروح المستقيمة لكن مش للجروح اللي أشكالها معقدة

عشان كده باحثين في الصين طوروا جهاز جديد وسموه “السحاب الجراحي المرن” وهو جهاز صغير بيتلزق حوالين الجرح ويشتغل بطريقة قريبة من فكرة السوستة

تخيل مثلًا إن عندك كيس مفتوح وفيه حبل بيشد أطرافه كلها ناحية النص في نفس الوقت.. الجهاز بيعمل حاجة شبه كده لكنه بيشد أطراف الجرح على بعضها بشكل مدروس يساعده يقفل أسرع

المميز كمان إن الجهاز مش بيشد من ناحية واحدة بس لكن يقدر يشتغل في أكتر من اتجاه.. وده بيساعده يتعامل مع الجروح الدائرية والبيضاوية والمستطيلة وغيرها من الأشكال اللي الغرز التقليدية ممكن ما تكونش مثالية ليها

والأغرب إن قوة الشد نفسها ممكن تتظبط من بأبلكيشن من على الموبايل.. بمعنى إن الدكتور – أو مستقبلًا المريض – يقدر يتحكم في قوة الإغلاق بدل ما تفضل ثابتة من أول لحظة لآخر العلاج

طيب هل الموضوع مجرد فكرة لطيفة؟

الباحثين جربوا الجهاز على فيران عندها أنواع مختلفة من الجروح وكانت النتائج ملفتة.. ففي بعض الجروح المستقيمة قدر الجهاز يقفل الجرح بالكامل تقريبًا خلال ثوان قليلة.. أما الغرز احتاجت وقت أطول

وفي الجروح الدائرية ساعد الجهاز على تسريع الالتئام بشكل ملحوظ وزود تدفق الدم للمنطقة اللي حصلت فيها الإصابة وده مهم لأن الدم هو اللي بيوصل الأكسجين والعناصر الغذائية اللي الخلايا محتاجاها عشان تصلح الأنسجة التالفة أصلًا

الباحثين لاحظوا كمان إن الجلد الجديد اتكون بشكل أفضل وإن ترتيب ألياف الكولاجين – وهي المادة المسؤولة عن قوة الجلد – كان أقرب للشكل الطبيعي وده ممكن يساعد على تقليل الندبات في المستقبل

والأهم إن الفيران اللي استخدمت الجهاز ما ظهرش عليها علامات تهيج أو مشاكل واضحة مكان ما لبسوه.. وده مؤشر مبدئي على إنه آمن على الأقل في التجارب الحيوانية

لكن قبل ما نتخيل إن الغرز الجراحية هتختفي بكرة الصبح لازم نعرف إن الجهاز لسه في مرحلة مبكرة جدًا.. وكل التجارب اللي اتعملت عليه كانت على الحيوانات بس ولسه محتاج اختبارات ودراسات على البشر عشان يتأكد الباحثين من أمانه وفعاليته قبل ما يوصل للمستشفيات