حمد فتحي لاعب سلة الاتصالات لـ “جلوكال سبورتس”: عايز الناس تفتكرني بلاعب سلة مشهور.. وطموحاتي لسه كتيرة
تألق في بطولة كأس مصر وفرض نفسه كواحد من نجوم البطولة ونجح في لفت الأنظار بمستواه القوي مع المصري للاتصالات .
“جلوكال سبورتس” حاورت حمد فتحي عشان تعرف منه أكتر عن مشواره.. وكواليس تألقه وطموحاته الجاية.
إيه أكتر حاجة اتغيرت في حياتك الموسم ده بعد التألق مع المصرية للاتصالات؟
“أحسن حاجة حصلتلي الموسم دة أني بقيت أحسن وأفضل وطمعان أكون أفضل وأحسن الموسم الجاي”.
قلنا ايه سبب تفوق المصرية للاتصالات السنة دي ؟
سبب تفوق الاتصالات الموسم ده إننا إيد واحدة وكلنا كان هدفنا واحد.
هل في مواقف معينة ليك في أندية لعبت فيها.. وهل تكمل مع الاتصالات ولو مش هتكمل خطتك إيه؟ وشايف ممكن سن الاعتزال يكون امتى؟
المواقف مش كتيرة الصراحة ماكنش في حاجة بعينها معينة.. في عروض جيالي السنة الجاية هقيم الموقف والعرض لو كويس همشي ولو مفيش أنا مكمل مع الاتصالات.
الناس بقت بتشوفك بشكل مختلف؟ ولا أنت لسه نفس “حمد فتحي”؟
“الناس بقت بتشوفني بطريقة مختلفة بعد مستوايا في السلة والكل بيقول إني كويس وظهرت بشكل جيد.. لكن أنا شايف إن لسه عندي كتير وعايز أتطور أكتر”.
كونك من أطول اللاعبين في مصر.. هل ده كان دايمًا ميزة ولا في وقت كان عبء عليك؟ وهل حصل موقف طريف قبل كده بسبب طولك برا الملعب؟
“الطول ده ميزة من عند ربنا ولازم استغلها واحافظ عليها.. المواقف مش كتير اتعرضت ليها لكن عشان طولي دائمًا الناس بتحب تتصور معايا وفي ناس تعرفني من أيام التمثيل”.
لو هتدي نصيحة لأي لاعب طويل في بدايته.. تقوله يستغل الطول إزاي صح؟
بنصح كل اللاعيبة الطوال واللي بيمتلكوا الميزة دي إنهم يحترفوا بره وياريت لو من هما صغيرين.
إيه اللي خلاك تسيب كرة اليد وتتجه للسلة؟
سبت كرة اليد عشان كان فيها مشاكل كتيرة.. وأنا مش بحب المشاكل عشان كده رجعت للباسكت.
إيه أصعب حاجة واجهتك في التحول بين لعبتين مختلفتين وهل في مهارات من كرة اليد ساعدتك تبقى لاعب سلة أفضل؟
اللي ساعدني في كرة السلة دلوقتي كان لما كنت بلعب يد لأنه اليد كانت لعبة بدنية قوية جدًا وده خلاني أقوى وبدنيًا أفضل لما رجعت للسلة.
قبل الرياضة بدأت في التمثيل.. قولنا مشوارك وقولنا التغييرات دي حصلت إزاي من تمثيل للرياضة وكنت شغال إيه؟
أنا بدأت رياضة ماكنتش بمثل في البداية.. لكن جالي مسلسل “خلصانه بشياكة” مع “أحمد مكي” وكنت بوفق بين الرياضة ساعتها والتمثيل.
لو جالك دور جديد في التمثيل.. ممكن تسيب ماتش مهم عشانه؟ ولا العكس؟
الرياضة والباسكت عندي أهم حاجة لو جاتلي أي حاجة تانية أو شغل تاني بتكون أولوية تانية بس الأهم أهتم بلعبي وتدريبي.
إيه السر ورا مستواك القوي السنة دي؟
السر في مستوايا اللي ظهر السنة دي يرجع لخمس سنين ورا.. أنا بقالي 5 سنين بدرب كل يوم ومش بريح وبدرب طول النهار وبشتغل على نفسي كتير وكمان بدرب مع مدرب خاص بعيد عن التدريب العادي.
يومك العادي بيبقى عامل إزاي بعيد عن التمرين؟
يومي العادي كله تمرين وأنا مش بخرج كتير ولا بميل للخروج أو السهر وساعات في يوم الإجازة بنزل الجيم.
قلنا اكتر ماتش مش هتنساه في السلة؟
أكتر ماتش مش هنساه ماتش سموحة في ملعبهم.. كان فاضل ثواني على ماتش وأنا كنت بموت نفسي في ملعب وكنت فاكر إننا خسرانين وطلعنا كسبانين فرق تلاتة.
لاعب عالمي نفسك تبقى زيه؟
باخد “إسماعيل أحمد” كقدوة ليا ونفسي أكون زيه وامشي على مسيرته شرف كبير إني أوصل للي عمله.. وإزاي هو محافظ على نفسه.
عايز الناس تفتكرك بإيه؟
عايز الناس تفتكرني ب”حمد فتحي” لاعب السلة اللي ناس حبوه عشان اللعبة دي وبيتصوروا معاه.
