سباق الجبنة اللي بتجري وراها من فوق الجبل.. حكاية أغرب وأخطر مسابقة في إنجلترا

تخيّل مجموعة من الناس بيجروا بكل قوتهم ورا قرص جبنة بيتدحرج من فوق جبل شديد الانحدار وكل واحد فيهم بيحاول يوصل لخط النهاية قبل التاني!
المشهد ممكن يبان كوميدي لكنه في الحقيقة مسابقة سنوية حقيقية في إنجلترا واسمها الرسمي سباق “جبنة كوبرز هيل”.
إيه حكاية السباق؟
المسابقة بتتعمل كل سنة خلال عطلة الربيع على تل كوبرز هيل في منطقة بروكوورث القريبة من مدينة جلوستر الإنجليزية.. المشاركين بينطلقوا من فوق منحدر طوله حوالي 200 ياردة وبيجروا ورا قرص جبنة من نوع دابل جلوستر وأول واحد يوصل لأسفل التل بيكون هو الفائز.
لكن المفاجأة إن المتسابقين مش بيحاولوا يمسكوا الجبنة لأن القرص نفسه بيكون أسرع منهم بكتير وكل المطلوب إنهم يوصلوا لخط النهاية قبْل باقي المنافسين.
الجبنة بتوصل لسرعة مرعبة!
قرص الجبنة بيكون وزنه حوالي 3 لـ4 كيلو وبيتحط حواليه غلاف خشبي من الجوانب وبيتزيّن بشرائط ملونة أما سرعته فبعض التقديرات بتقول إنها ممكن توصل لـ70 أو حتى 80 ميل في الساعة لكن مفيش رقم مؤكد بشكل رسمي.
الخطورة الحقيقية مش في الجبنة لكن في المنحدر نفسه اللي بيخلي المتسابقين يفقدوا توازنهم ويتقلبوا أكتر من مرة أثناء النزول وفي مشاهد متكررة بتلاقي المشاركين بيتدحرجوا على الأرض وسط محاولات للوصول لخط النهاية قبل ما يتدخل المسعفون لنقل المصابين وتقديم المساعدة الطبية.
مين بدأ الفكرة؟
أول توثيق مكتوب للسباق بيرجع لسنة 1826 لكن مفيش رواية مؤكدة بتحدد بدايته الحقيقية.. فيه ناس بتربطه بطقوس قديمة للاحتفال بعودة الربيع وطلب موسم زراعي ناجح ورواية تانية بتقول إنه كان وسيلة لإثبات حقوق الرعي في الأراضي المحيطة بالتل.
وفيه كمان فرضية بتربط اسم المكان بصناعة البراميل وإن الفكرة بدأت من دحرجة البراميل لاختبار متانتها قبل ما تتحول مع الوقت لسباق الجبنة المعروف دلوقتي.. مع مرور السنين بقت الإصابات جزء من المشهد المعتاد للمسابقة وده خلّى السلطات والشرطة يحذروا من خطورتها وفي 2010 اتلغى التنظيم الرسمي بسبب مخاوف تتعلق بسلامة المشاركين لكن الأهالي والمتسابقين نظموا سباقًا غير رسمي رغم التحذيرات.
ومن أغرب القصص اللي حصلت في المسابقة سنة 2023 فوز الكندية ديلاني إيرفينج بسباق السيدات وهي فاقدة الوعي وماعرفتش إنها حققت المركز الأول غير لما فاقت في الخيمة الطبية!
من تقليد محلي لمسابقة عالمية
السباق اللي بدأ كتقليد محلي بقى بيجذب آلاف المتفرجين ووصل عدد الحضور في بعض السنوات لحوالي 5000 شخص وبيكون فيه فريق طبي للتعامل مع الإصابات وكمان مجموعة من لاعبي الرجبي في أسفل المنحدر للمساعدة في إيقاف المتسابقين بعد وصولهم.
ومن أشهر الأسماء في تاريخ المسابقة الإنجليزي كريس أندرسون اللي حقق 23 فوزًا حتى عام 2023 وبقى واحد من أبرز الوجوه المرتبطة بالسباق.
نسخة 2026.. الأجانب خطفوا الأضواء
في نسخة 2026 اللي اتعملت يوم 25 مايو قدر الألماني توم كوبكه اللي عمره 24 سنة إنه يتفوق على كريس أندرسون في سباق الرجال الأول ويحقق فوزه الثالث على التوالي وفقًا للتقارير المنشورة عن الحدث.
وفي سباق السيدات فازت الفرنسية أليكس هوجاس بينما حقق نيلس فينيمارس لقب سباق الرجال التاني لتتحول المنافسة إلى مواجهة دولية.. بعد ما كان السباق في الماضي مرتبطًا بشكل أكبر بأهالي المنطقة.
سباق كوبرز هيل مش مجرد منافسة على قرص جبنة لكنه تقليد غريب بيجمع بين الحماس والمغامرة والمخاطرة وبيجذب مشاركين من بلاد مختلفة كل سنة ورغم إن المشهد ممكن يضحكك من أول مرة تشوفه فإن السقوط على المنحدر مش هزار والإصابات بتفكّر الكل إن أغرب سباق في العالم ممكن يكون من أخطرها كمان



