3 متاحف زيارتها مجانية النهاردة 6 أكتوبر في ذكرى نصر أكتوبر الـ 52
بمناسبة النهاردة 6 أكتوبر واليوم كله ذكريات عظيمة.. فالذكريات دي بتكمل بزيارة متحف يعرفنا تاريخ بلدنا ومنها خروجة ونكسب شوية معلومات حلوة
وكان المتحدث العسكري للقوات المسلحة المصرية أعلن إن فيه 3 متاحف مفتوحة النهاردة مجانا بمناسبة ذكرى انتصارات أكتوبر.. وتعالوا ناخدكم جولة فيهم:
1- منطقة العرض المكشوف للأسلحة ببانوراما حرب أكتوبر:
واللي حسب وزارة الدفاع المصرية بيحتوي على ساحة عرض مكشوف وقاعات عرض دائم.. ساحة العرض المكشوف بتعرض مجموعة من الأسلحة والمعدات العسكرية المصرية واسلحة العدو المستولى عليها خلال حرب أكتوبر
كمان بيشمل نافورة وأنظمة عرض الصوت والضوء عشان يقدم عروض ليلية على المجسم الدائري بتقنية “Projection Mapping”
أما قاعات العرض الدائم بيكون فيها “بهو استقبال” فيه مجسم توضيحي لمبنى المتحف وملحقاته ومرافقه وخدماته.. بيشرحه مرشد إفتراضي مدعوم بـ 3 لغات وهي العربية.. الإنجليزية والفرنسية
بالإضافة لعدد من اللوحات الجدارية فيها أهم المعارك العسكرية اللي خاضها الجيش المصري من التاريخ المصري القديم ولحد حرب أكتوبر 1973 بالإضافة كمان لعرض مجموعة من الأسلحة بتقنية الهولوجرام وشاشات العرض الرقمي
و “قاعة الصمود والتحدي” اللي بتعرض فيلم الصمود والتحدي الذي بيتناول مراحل إعادة بناء القوات المسلحة وحرب الاستنزاف بعد عام 1967م.. واللي استعدادًا لمعركة النصر عن طريق سينما ثلاثية الأبعاد مزودة بالمؤثرات المختلفة “صوت – دخان – ماء – وغيرهم”
كمان “قاعة بانورامية” بتضم مسرح دائري متحرك بيطل علي لوحة زيتية عملاقة ومجسم لمسرح المعركة وبتحكي ملحمة العبور ومزودة بأنظمة مؤثرات صوت وضوء تفاعلية.. أما “قاعة العبور” فيها زيادة “مفاوضات السلام” من خلال فيلم جرافيك على شاشة.. قاعة “جيش وشعب” فيها بيتحكي أهم الأحداث المعاصرة لثورتي 25 يناير و 30 يونيو وإبراز مظاهر تلاحم الجيش والشعب في الدفاع عن الوطن
2- متحف بورسعيد الحربى:
حسب وزارة الدفاع المصرية بيحكي “العرض المتحفي” ملحمة صمود وبسالة شعب بورسعيد في التصدي للعدوان الثلاثي اللي حصل سنة 1956م من خلال عرض مجموعة متنوعة من الأسلحة والمعدات العسكرية اللي تم استخدامها أو الاستيلاء عليها في حرب 1956 وكذلك حرب أكتوبر 1973 وبينقسم العرض المتحفي إلى ثلاثة أقسام وهي “ساحة العرض المكشوف” و”قاعات العرض الدائم” و”قاعة العرض المؤقت”
“ساحة العرض المكشوف” بتعرض الأسلحة اللي تم الاستيلاء عليها بالإضافة لبعض المقتنيات الأثرية من أسلحة ومدافع ترجع إلي عصر محمد علي
تنقسم “قاعات العرض الدائم” إلي قسمين هما البهو الرئيسي وثلاثة قاعات هي “قاعة قناة السويس – قاعة العدوان الثلاثي – قاعة أكتوبر ١٩٧٣م”
أولهم بيحكي تاريخ مدينة بورسعيد وتاريخ المنطقة بدايةً من العصور المصرية القديمة مرورًا بالعصور الإسلامية وانتهاءً بالعصر الحديث وده من خلال عرض بعض الأعمال الفنية اللي بتدي معلومات للزائر
تانيهم بتعرض شوية مقتنيات بتحكي قصة حفر قناة السويس من التخطيط لحد الانتهاء من الحفر وبتعرض وثائق التاريخية لمشروع قناة السويس الخاصة بمراحل التنفيذ لحد الافتتاح.. ودور قناة السويس الحيوي في تاريخ مصر السياسي والعسكري والاقتصادي وقرار التأميم عام 1956م
تالتهم بتضم مجموعة من الأعمال الفنية اللي بتحكي بطولة شعب بورسعيد وبعض البورتريهات الفنية لأبطال المقاومة الشعبية.. وعرض بعض من نماذج الأسلحة والمقتنيات الشخصية للجنود المشاركين في العدوان الثلاثي والقاعة بتعرض ديوراما فنية بتحكي بعض المعارك المهمة زي معركة الجميل ومعركة حي المناخ
3- متحف العلمين العسكرى:
حسب وزارة الدفاع المصرية بيرجع تاريخ إنشاء المتحف إلى 16 ديسمبر 1965م لما أمر جمال عبدالناصر بإنشائه تخليدًا لدور مصر الهام في معركة من أهم معارك الحرب العالمية الثانية وهي “معركة العلمين” واللي حصلت بين دول الحلفاء ودول المحور في أكتوبر 1942م
بعدها تم تطوير المتحف وخضع لعمليات ترميم وصيانة وأعيد افتتاحه في الذكرى الخمسين لمعركة العلمين يوم 21 أكتوبر عام 1992م.. وتم تطويره مرة تانية وافتتح يوم 21 أكتوبر 2014م وبيهدف لتوثيق معركة العلمين من خلال عرض مجموعة من الأسلحة والمدرعات والمجسمات اللي بتحكي معارك العلمين والقوات التي شاركت فيها بالإضافة لمجموعة مهمة من خرائط سير المعارك وبعض المقتنيات الخاصة بقادة الجيوش دى
