احذر.. الطموح فيه سم قاتل
كتب: علي يحيى
بيعدي علينا كتير بوستات وقصص وحكايات عن ناس عملت إنجازات كبيرة ونجاحات ينحني لها الناس من جمدانها.. وفي النص بيطلع علينا بوستات بتكمل كلام عنها بيكون محتواها إن مفيش مستحيل مع المجهود.. وإن ده دليل على إن اللي مابيوصلش بيكون بسبب تقصير منه أو إنه قرر ينسحب في نص الطريق وماكملش.
بس هو ده حقيقي؟
الناس ساعات كتير بتنسى تبص للصورة الكبيرة.. وأنا هنا مش بقلل من إنجازات حد ولا بقول إن الناس الناجحة ماتعبتش ولا من جروب “أعداء النجاح” .. أنا بس ببص من فوق. لما حد بيقولك إن نجاح الشخص ده دليل على إن أي حد لو اشتغل على نفسه هينجح بيقطع جزء من الحكاية.. بينسى يقول شوية “امتيازات” والامتيازات هنا هتختلف من قصة لقصة.. يعني مستوى التعليم هيفرق في تحقيق النجاح.. البيئة المحيطة أكيد بتساعد في النجاح.. توافر حاجات كتير أوي زي الوقت والمساندة.. فهتلاقي الشخص بيحكيلك قصة نجاح لكن مابيقولكش إن الشخص ده كان من مستوى معين وتعليم معين وكان عنده رفاهية إنه يجري وقت حلمه.
وطبعًا الكلام ده مش على طول.. وفيه ناس جابتها بجد “من تحت” بمجهودهم ويعني مفيش أكتر من “محمد صلاح” دليل على الكلام ده.. بس إحنا هنا بنتكلم عن فكرة المونتاج اللي بيحصل للامتيازات.
طب والحظ؟
قليلين برضو اللي هيكلموك عن الحظ في النجاح.. عمر الشريف كان دايمًا بيحكي قد إيه هو محظوظ في حياته.. وفي أسرته.. وبالتبعية الحظ ده وفرله إنه يكون عمر الشريف.
نور الشريف له لقاء مشهور بيقول فيه إن “فيه ناس أرق من الحياة” مابيستحملوش الكلام وممكن ده يخليهم ينهوا مسيرتهم قبل ما تبتدي وممكن يكونوا كانوا هيبقوا ممثلين جامدين.
يعني هتلاقي نفسك تعرف واحد على الأقل حريف كورة مفيش زيه.. بس نصيبه إنه مايكملش.. كام واحد كان ممكن يبقى نور الشريف أو تبقى سعاد حسني.. بس الفرصة ماظبطتش معاها.. وطبعًا مفيش حظ من غير اجتهاد.. هي تركيبة كده.. بتجتهد ونصيبك وإرادة ربنا بيودوك للحتة دي.
يعني إيه؟
أنا مش بقول إن الناس تبطل تجتهد.. ولا بقول إن كل الناجحين كانت ضربة حظ.. بس كل اللي بقوله إننا نحط الحاجات في مكانها الصح.. ومش لازم تيجي على نفسك عشان الدنيا مش بتظبط أو مش عارف تبقى زي اللي بتشوفهم كل يوم بيحكوا إنهم نجحوا بجهود فردية.. وعايز أفكرك إن مفهوم النجاح كبير ومش لازم يبقى زي اللي بيظهر على الشاشات.. فممكن تبقى ناجح عشان مبسوط.. عشان ليك اصحاب.. أو عشان مرتاح البال.. وحتى لو مفيش من ده عادي.. هي الدنيا كده.
