9 حاجات محتاج تعرفهم قبل ما تتم 40 سنة
أغلب جيل التمانينيات دلوقتي مصدوم إزاي دخل في التلاتينات بالسرعة دي وإزاي الحياة جريت بيه بالسرعة دي!، ولو أنت مواليد أول التمانينيات أو أواخر السبعينيات فأنت أكيد مصدوم دلوقتي بفكرة الأربعينيات لكن مع الصدمة بتدرك إنك عديت بحاجات وتجارب كتير أوي في العشرينات والتلاتينات.
بس لو ماوصلتش لسه للأربعين خلينا نقولك على شوية حاجات محتاج تعرفهم قبل ما توصل للأربعين حسب ما قال موقع “Brightside”:
1- اختيارتك ملكك لوحدك:
قبل ما توصل للأربعين محتاج تعرف إنك كبير وحكيم بما فيه الكفاية عشان تبقى فاهم ومسؤول عن اختياراتك في الحياة وتعرف كمان إن الاختيارات دي بتاعتك أنت لوحدك، والمفروض ماتسبش نفسك إن حد يبقى مسؤول عنك ولا إنك تبقى تحت إشراف حد.. وأعرف كمان إنك المفروض تعمل الأنسب ليك وماتركزش مع كلام الناس وخلي عندك إرادة عشان تغيير حياتك.
2- تخلي الدراما للمسلسلات:
لما بنكون أصغر في السن كل نكسة أو خذلان بتبقى كأنها حاجة مدمرة لينا وبنحس إننا مش قادرين نتعافى منها بسهولة، لكن من الواضح كده إن الحزن ده بيساعد الشخص في النهاية إنه يحس بتحسن، والدراسات كمان أثبتت إن “ميكس” مشاعر الحزن والسعادة ده بيحسن صحة الشخص العقلية وبيخليه يبقى حاسس بمعنى أكبر لحياته.
لكن اللي بيحدد مدى مرونتنا ومقاومتنا هو إحنا بنعمل إيه بالنتيجة دي عشان كده حاول تدور على النسخة الأفضل من نفسك قبل الأربعين عشان نفسك وماتحاولش تدور بس على النسخة السعيدة.
3- تظبط وقت لصحابك:
جدول أعمالك كل سنة بيتزحم عن السنة اللي قبلها سواء كان شغل أو أطفال أوتمارين أو شوبينج وبقالة ونشطات كتير.. بعدين بتدرك فجأة إن آخر مرة شوفت فيها صحابك كنت من وقت كبير، عشان كده حط ده من ضمن أولوياتك مهما كبرت لإنه بيشحن طاقتك وممكن تعتبره وقت للعلاج أصلا.
4- اعرف إن مفيش حاجة كاملة:
كل ما تكبر كل ما هتقدر تتقبل حاجات كتير أسهل وأحسن وهتعرف إننا مش المفروض نبقى مثاليين، عشان كده هتبدأ تحس بالراحة تجاه نفسك وشكلك وجسمك اللي تعب من كتر ما أنت بقالك سنين بتحاول تحققله معايير الجمال، عموما كب سنة هتتأكد إن مافيش حاجة مثالية وهتقبل نفسك زي ما أنت.
5- مافيش حاجة اسمها بتاعتك بس:
هتعرف إن كل حاجة ممكن تروح عادي خصوصا في كل مرة بتروح بيها بشنطة حاجات جديدة وأول ما تلبسهم هتتوصل لاستنتاج إنهم مجرد شوية هدوم وهتقول إنهم بنفس تمن فواتير المياه أو الكهربا وهتلاقي كل الإثارة بتتلاشى في الأخر.. عشان كده اعرف تشارك إزاي واعرف برضه إنك تحب اللي حواليك خصوصا عائلتك.
6- هتتأكد إنك شخص يستحق:
لما بنكون صغيرين بيبقى لازم نشتغل كويس عشان ننجح في الأخر بس لما بنكبر بنخلي النجاح ده يحصل بنفسنا ومش لسه هنستناه يحصل، فابدأ إنك تقول أفكار لتطوير شغلك وبطل تحبط نفسك واطلب من مديرك الزيادة اللي تستحقها وهتتفاجئ باللي بتحققه.
7- خليكي مستعدة يتقالك يا مدام:
ممكن تبقى واقفة في طابور في السوبر ماركت أو في الأسانسير أو في أي مشوار عادي وهتلاقي شخص بيقولك يا مدام، في الأول هتفتكري إنهم بيكلموا حد تاني بس لا، بغض النظر عن الوقت اللي ممكن يحصل فيه ده فأنتي محتاجة تبقى مستعدة ومن الأفضل تعتبريها علامة عن الاحترام وماتبالغيش تفكير فيها.
8- المرونة هي طبيعتك الجديدة:
كل ما بنكبر كل ما بنحس إن الأنشط البسيطة زي الاستعداد للشغل، أو ممارسة الرياضة، أو حتى إنك تقعد لوحدك عايزة مجهود كبير، لكن مرونتك ورغبتك في بذل مجهود إضافي ممكن تعمل فرق كبير، والفرق الوحيد اللي هتلاحظه في المرحلة دي هو إنك هتبقى مؤمن بنفسك وعندك إرادة أكبر إنك تحقق إنجازات.
9- هتعرف قيمة البيت:
هتلاقي إن خططك المثالية في الويك اند هي إنك تقعد في البيت، وإنك تروق الشقة وتتابع مسلسلات وتقرأ حاجات جديدة وتهتم بالزرع والحيوانات الأليفة وهتعرف إن أحلى جزء في اليوم هو إنك لما تروح البيت.
