القصة الكاملة لأزمة حفلة مروان بابلو

يوم الجمعة 1 أكتوبر 2021 مطرب الراب مروان بابلو عمل حفلة بعد غياب لفترة طويلة عن الحفلات في مركز المنارة أرينا بالقاهرة الجديدة، وحضر الحفلة عدد كبير من الجمهور اللي كانوا متحمسين لها، ولكن بعد الحفلة انتشر على السوشيال ميديا كلام كتير عن سوء تنظيم الحفلة وبعض المشاكل اللي حصلت في الحفلة.

من ضمن ترتيبات الحفلة اللي تم الإعلان عنها هو إن مطرب الراب الفلسطيني شب جديد هيظهر مع مروان بابلو في الحفلة وهيغنوا سوا، وحصل فعلا ولكن غير في كلمات ابتهال “مولاي” للشيخ النقشبندي وبدل كلمة مولاي بكلمة مروان، وقال “مروان إني ببابك قد بسطت يدي” وده حصل بالرغم إنه ماقلش الشتايم اللي في أغانيه طول الحفلة وكان الجمهور بس اللي بيرددها.

وتاني يوم الحفلة السبت الصبح كان فيه اتهامات لشب جديد بالإلحاد واتهامات لمروان بابلو برضه، ولكن كان لسه الموضوع مانتشرش أوي وكان عبارة عن تعليقات وبوستات لناس على الحفلة على السوشيال ميديا بس زي:

بس مروان بابلو يوم السبت الصبح نزل ستوري على الأكونت الرسمي بتاعه على انستجرام غامضة شوية واتأسف فيها للجمهور على أي غلط في الحفلة وقال “الحمد لله الذي تتم بنعمته الصالحات، توفيق ربنا كان السبب الأول في اللي حصل، إحنا كنا sold Out إمبارح، من غيركم ده بجد ماكنش هيحصل، شكرًا لكل فرد شارك في الحفلة إمبارح، إنتوا بجد أحسن جمهور في العالم، وبعتذر عن أي أخطاء حصلت إمبارح، ولأي شخص كانت له تجربة مش كويسة أنا آسف جدا، ولأي حد ماعرفش يجي المرة دي هتتعوض إن شاء الله في مرة تانية”

 

وعلى آخر اليوم كانت انتشرت الأحداث اللي حصلت في الحفلة وانتشرت جملة شب جديد، فأصدرت نقابة المهن الموسيقية السبت بليل 2 أكتوبر بيان قالت فيه: “قررت نقابة المهن الموسيقية منع التعامل مع المؤدي مروان بابلو باعتباره أحد مؤدي الراب، خاصة وأنه ليس عضوا بالنقابة وكان يحصل على تصريح اليوم الواحد، وأخطرت نقابة الموسيقيين كافة الجهات والهيئات والمتعهدين بهذا القرار، لأنه تناول في إحدى حفلاته ابتهال ديني ثابت ويحمل معاني روحانية وقيم سامية لدى المصريين واستهان بهذا الدعاء بابتذال وأفرغه من محتواه الأخلاقي وجعله وكأنه عن ذات المؤدي، فضلا عن تناول الفيديو ألفاظا خرجت عن كل الأخلاق والتقاليد الحميدة وهو الأمر الذي أصاب المصريين بخيبة أمل”.

وبعدها كتب شب جديد ستوري على الأكونت الرسمي بتاعه على انستجرام وقال فيها “أولًا كل الشكر والتقدير للجمهور على الحفلة الجامدة، ثانيًا أنا بعتذر عن سوء التفاهم اللي حصل وكل الحب والاحترام لأخوي مروان، واضح إني أسأت التقدير في العبارة اللي قلتها ولو إني كنت أعرف إنو الاشي هلقد حساس ومسيء لجمهوري المصري الحبيب كان مستحيل يطلع مني، بتمنى إنكم ما تزعلوا مني نيتي كانت صافية والله ولي التوفيق”.

الجدير بالذكر إن مروان بابلو كان اعتزل في مارس 2020، ورجع تاني بأول أغنية له في 25 فبراير 2021 وهي أغنية “غابة” اللي كانت تريند رقم 1 على اليوتيوب وقتها.