ليه اللي بيخرج من داره بيتقل مقداره؟ وإزاي نتجنب ده؟
فيه مثل أو مقولة بتقول “من خرج من داره اتقل مقداره”.. والمقولة دي ناس كتير بتستخدمها لما تحصلهم مشكلة برا البيت بمعنى إن اللي يخرج من بيته بيتهان أو بيتمرمط.. وممكن تتطبق على مفاهيم كتير.. من أول معنى الدار اللي هو البيت أو المنزل بالمفهوم السطحي.. أو بمعنى أعمق إن الدار ممكن كمان يبقى البيئة أو الشغل أو البلد أو شلة الصحاب أو المجتمع.. تعالوا نتكلم أكتر بقى عن المفاهيم دي.. وليه ممكن الواحد يتقل مقداره لو خرج من داره.. وإزاي ممكن يواجه ده؟ وبدل ما يتقلّ مقداره.. يتّقل مقداره أكتر؟
مبدأيًا وبشكل عام.. لما الشخص بيخرج من داره.. بيحصل تغيّر كبير، خلينا نقول في “السياق الاجتماعي” اللي كان متعود عليه.. وده ممكن يخلي مكانته تتأثر لأسباب مختلفة.. وممكن تقيس كل الأسباب الجاية دي على سكن أو شغل جديد أو صحاب مختلفين أو بلد ومجتمع جداد.. أو أي دايرة اجتماعية جديدة عليك في المطلق
- برا دارك لو إنت في مكان جديد.. الناس غالبًا بتقيمك بناءً على معايير مختلفة عن اللي كنت متعود عليها.. وده ممكن يخلي تأثيرك عليهم أقل لو ما كنتش جاهز تتأقلم مع التوقعات دي.. يعني ماتتوقعش إنهم هيعجبوا بيك أو هينبهروا بيك لنفس الأسباب اللي دوايرك الحالية ممكن تبقى معجبة أو مبهورة بيك بسببها
- جوا دارك في بيئتك الأصلية بيكون حواليك ناس يعرفوك ومقدرين قيمتك.. سواء أهلك أو صحابك أو زمايلك في الشغل.. لما تخرج من البيئة دي.. ممكن تفقد الدعم ده.. وده ممكن يخليك تحس إن أهميتك أقل في المكان الجديد.
- برا دارك في المكان الجديد ممكن تحس بغربة لأنك مش متعود على عادات وتقاليد المكان الجديد أو طريقة التعامل.. وده ممكن يأثر على ثقتك بنفسك وطريقة تعاملك مع الآخرين..
- جوا دارك في مكانك الأصلي.. الناس عارفينك من زمان وده بيخلي عندك قيمة كبيرة بسبب التاريخ والماضي المشترك بينك وبينهم.. ونفس الكلام في الثقة.. الثقة مبنية على تعاملات طويلة ومواقف مشتركة لكن لما تروح مكان جديد بتكون مجرد شخص “عادي”.. والناس لسه ما عندهاش أي خلفية عنك.. وكأنك بتبدأ من الصفر كل حاجة.. وده بياخد وقت وبيقلل من مكانتك عندهم مؤقتًا.
- برا دارك في المكان الجديد.. الناس ممكن يقارنوك بالناس القديمة.. المقارنات دي غالبًا مش في صالحك عشان إنت لسه جديد ولسه بتحاول تثبت نفسك وتتأقلم مع الوضع الجديد اللي إنت فيه.
- جوا دارك في مكانك الأصلي بتبقى عارف إزاي تستغل كل الموارد اللي عندك والمتاحة ليك.. لكن في مكان جديد هتحتاج وقت عشان تتعلم.. وده ممكن يأثر على إنتاجيتك أو وضعك الاجتماعي في الأول.
- برا دارك لو دخلت بيئة جديدة مختلفة ثقافيًا أو لغويًا.. ده ممكن يصعّب عليك التواصل أو الاندماج بسرعة
- وأخيرا التأثير النفسي للخروج من دارك.. الانتقال نفسه بيكون مرهق نفسيًا وده ممكن يخلي ثقتك في نفسك أقل في البداية وده ممكن يبان للناس ويأثر على تقديرهم ليك.
الموضوع كله غالبا بيكون مرتبط بفكرة التغيير الاجتماعي والنفسي اللي بيمر بيهم الشخص لما يخرج من بيئته ومكانه ودايرته اللي متعود عليهم.. وازاي المجتمع الجديد بيستقبله.
طب نعمل إيه بقى عشان منتأثرش بكل ده؟ فيه شوية حاجات بسيطة ممكن تساعدك تثبت نفسك وتحتفظ بقيمتك ومكانتك مهما كنت بعيد عن بيئتك الأصلية:
- حافظ على هويتك.. كونك في مكان جديد ده مش معناه إنك تتخلى عن شخصيتك أو قيمك أو مبادئك.. بالعكس، خليك فخور بأصلك وهويتك وقيمك ومبادئك.. وده هيخليك مميز في أي مكان تروحه.. ولو مش مميز.. الناس هتحترمك.
- حاول تبني شبكة علاقات في المكان الجديد.. سواء مع زمايل شغل أو جيران أو معارف عادية.. العلاقات دي مش بس ممكن تدعمك وقت ما تحتاجهم لكن كمان وجودهم هيقلل إحساسك بالغربة ويديك إحساس بالانتماء.
- حاول تثبت نفسك بكفاءتك.. خلي إنجازاتك وأفعالك هي اللي تتكلم عنك.. لما تكون شاطر أو بتتقن اللي بتعمله.. هيكون صعب لأي حد يقلل من قيمتك مهما حاول لمجرد إن إنت “جديد”
- حافظ على علاقاتك القديمة.. حتى لو خرجت من دارك.. ماتنساش أهلك وصحابك ومعارفك وعلاقاتك القديمة.. الدعم اللي بييجي من العلاقات القديمة دايمًا هيديك قوة وثقة في نفسك
- اتعلم من البيئة الجديدة.. ماتخافش تتأقلم أو تتعلم حاجات جديدة.. ماتخافش تكتشف حاجات ماكنتش تعرفها خالص.. وماتخافش تتعامل مع ناس بعيدة كل البعد عنك.. ده مش ضعف.. ده ذكاء اجتماعي هيخليك تعرف تتعامل مع أي وضع أو تحدي.. وفيه فرق بين القبول والتسامح والتعلم والتأقلم وبين فقدان الهوية.. إقرأ أول نقطة تاني.
- حاول تواجه السلبيات بهدوء.. لو حسيت إن حد بيقلل منك.. رد عليه بطريقة محترمة بس قوية في نفس الوقت.. وحاول تحسس الناس إن قيمتك مش مرتبطة بالمكان اللي إنت جاي منه.. قيمتك مرتبطة بشخصيتك وإنجازاتك في المكان الجديد
- خليك صبور.. التقدير والمكانة والاحترام والحب.. كل ده بياخد وقت.. خلي عندك صبر.. ومع الوقت، الناس هتعرف قيمتك، سواء في مكانك الجديد أو القديم.
وبكده ممكن تتحول من “اللي خرج من داره اتقلّ مقداره” لـ “اللي خرج من داره تقّل مقداره”
