بعد فوزهم بالكأس والدوري.. مين كتيبة تشـابي ألـونـسـو “Bayer Leverkusen”؟
بعد الفوز بالكأس الألماني وقبله الدوري الذهبي في ألمانيا.. باير ليفركوزن وقصة كتابة التاريخ.. من بداية موسم 2023/2024 في فرق عملت إنجازات في الدوريات الخمس الكبرى بس الاستمرارية من العوامل المهمة عشان توصل لنتيجة حقيقية وإنجاز تاريخي متشاف ومكتوب.. وده اللي عمله الباير فا تعالوا نعرف أكتر عن الفريق ومدربهم
النادي بطله الرئيسي هو المدرب “تشابي ألونسو” اللاعب الأسباني السابق.. لعب في أندية كبيرة زي ريال مدريد وباير ميونخ وليفربول أخر موسم لعب فيه كان 2017 مع باير ميونخ وبعدها اعتزل
أما باقي النجوم في التشكيلة فا هم أكتر لاعب شارك في الأهداف “فلوريان فيرتز” وبعده هداف الفريق في الدوري الألماني وهو “فيكتور بونيفاس” كمان “أليكس جريمالدو” واللاعب “جيريمي فريمبونج” ونجوم تانية كتير في الفريق زي “جرانيت شاكا” وأغلبها لاعيبة كانت في فرق كبيرة زي أرسنال وباير ميونخ وفرق تانية بس مش بيلعبوا أساسيين لكن المدرب الكبير تشابي قرر إنه يستثمر فيهم ويراهن عليهم من أول الموسم
بطولات النادي القديمة:
النادي سجله في البطولات مش كبير لأنه خد بطولتين اتنين بس طول تاريخه لحد الموسم الحالي اللي احنا فيه.. بطولة كأس ألمانيا سنة 1993 واللقب التاني كان “كأس الاتحاد الأوروبي” أو الدوري الأوروبي بسماه الحالي سنة 1987 لما كسب فريق إسبانيول ضربات جزاء
الإنجازات التاريخية دلوقتي:
الفريق كتب تاريخ جديد لنفسه وكبير كمان بإنه حسم بطولتين مهمين وهما كأس ألمانيا التاني في تاريخ النادي ولكن المرة دي برضه بإنجاز تاريخي وهو إنه ما خسرش ولا ماتش في البطولة وده حصل بعد 31 سنة من المرة الأولى اللي حققوا فيها البطولة
والدوري الألماني وبفارق كبير عن الفريق اللي بعده في عدد النقط وكمان حسمه قبل أكتر من ماتش وده بيحصل لأول مرة في تاريخ النادي!
حقق أطول سلسلة “لا هزيمة” في تاريخ الأندية الألمانية في جميع المسابقات
حقق أطول سلسلة “لا هزيمة” في جميع المسابقات من بداية المسابقات الأوروبية تاريخيًا وبكده يكون كسر الريكورد الأكبر اللي من حوالي 60 سنة!
رقم مكتوب بإسم نادي “بنفيكا” البرتغالي اللي عمل سلسلة لا هزيمة بـ 48 ماتش واللي كسرهم باير ليفركوزن بـ 51 ماتش لما كسب روما في ذهاب نص النهائي 2-0 واتعادل في الوقت الضايع قدام نادي روما 2-2 في عودة نص النهائي ولكنها انتهت لما خسر من نادي أتلانتا 3-0 في فاينال الدوري الأوروبي.. ريكورد بنفيكا فضل صامد من 1963-1965 لحد موسمنا الحالي 2023-2024 وهنا تاريخ جديد بيتكتب لنادي الباير
ولسه فاضله ماتش السوبر الألماني وساعتها هيكون حقق الثلاثية وتكون أول ثلاثية في تاريخ النادي!
ملوك الـ +90′
النادي نزل صورة على فيسبوك بيستعرض فيها الماتشات اللي كان خسران أو متعادل فيها لحد الدقيقة 90 لكنه بعد الدقيقة 90 إما بينقذ سلسلة اللاهزيمة بإنه يسجل التعادل في الوقت الضايع أو بإنه يسجل هدف الفوز برضه في الوقت الضايع.. موسم للتاريخ صعب تكراره لنادي باير ليفركوزن مانعرفش هيقدروا يستمروا بنفس المستوى ولا لأ بس كل اللي نعرفه إن أكيد “أدمن السوشيال ميديا” عندهم زهق من كتر ما بيجهز بوست “أول خسارة في الموسم” ويرجع يمسحه تاني لما الفريق يتعادل أو يكسب..
السؤال هنا: تفتكر في نادي هيقدر يكسر الريكورد اللي عمله الفريق الكبير “باير ليفركوزن” ولا ممكن يستمر لمدة 60 سنة زي الريكورد اللي حققه فريق بنفيكا وكسره الباير؟؟
