دونكي توس.. لعبة الحمير الطايرة

لو فاكر إن كل ألعاب الحفلات واللمة لازم تكون بكورة أو كروت أو حتى كوبايات يبقى لعبة دونك توس هتخليك تراجع نفسك في الموضوع كله لأن اللعبة ببساطة قائمة على إنك تمسك حمار مطاطي منفوخ وترميه في الهوا وتحاول تخليه ينزل بطريقة معينة عشان تكسب نقاط.

اللعبة بدأت كفكرة بسيطة للضحك واللعب بين أصحابها لكن مع الوقت اتحولت من لعبة في الجنينة ووسط الصحاب لمنافسة منظمة ووصلت كمان للتليفزيون من خلال برنامج ذا أوتشو على شبكة إي إس بي إن.

بدأت كلعبة في جنينة البيت

فكرة دونك توس ظهرت في أوستن بولاية تكساس الأمريكية على إيد مجموعة من الموسيقيين المرتبطين باستوديوهات بيربل بي.. في البداية الموضوع ماكانش أكتر من لعبة جماعية للترفيه والضحك واتعملت في أماكن التجمعات والحفلات لكن أصحاب الفكرة اكتشفوا إن اللعبة فيها عنصر منافسة يخلي الناس عايزة تلعب مرة واتنين وعشرة.

طب بنلعبها إزاي؟

الفكرة بسيطة جدًا وده أصلًا جزء من سر انتشارها لأنك مش محتاج تكون رياضي محترف ولا تحفظ قوانين كتير عشان تبدأ.. كل اللي محتاجه حمار مطاطي منفوخ وسجادة للعبة وخط رمي وبعدها تبدأ التحديات وتشوف مين يقدر يعمل أفضل رمية.

اللعبة بتستخدم حمير مطاطية منفوخة بألوان مميزة وبيكون شكلها أقرب للعبة أطفال كبيرة لكن استخدامها هنا مختلف تمامًا.. في النسخة الأساسية فيه حمير باللون البرتقالي أو البنفسجي وعليها تفاصيل باللون الأبيض والبنفسجي وفيه كمان نسخة صغيرة من اللعبة مناسبة للبارات والتجمعات الداخلية.

كل لاعب بيقف ورا خط الرمي والمسافة بين الخط والسجادة حوالي 5 أقدام يعني تقريبًا متر ونص.. بعدها اللاعب بيرمي الحمار في اتجاه السجادة لكن الرمية مش كفاية لوحدها لأن لازم الحمار يعمل لفة كاملة واحدة على الأقل في الهوا قبل ما ينزل.

مش أي وقعة بتجيب نفس النقاط

هنا بقى الجزء اللي بيخلي اللعبة مسلية لأن النقاط بتتحسب حسب الطريقة اللي الحمار هينزل بيها على السجادة.. لو الحمار نزل واقف على رجليه اللاعب بياخد نقطتين ودي واحدة من أبسط الطرق اللي ممكن تسجل بيها.

ولو نزل على مناخيره ورجليه الأماميين الرمية بتتحسب 3 نقاط وبالتالي اللاعب بيبدأ يدور على الطريقة اللي تدي له أعلى نتيجة.. في نص السجادة فيه شكل سداسي مخصص للهدف ولو الحمار لمس المنطقة دي النقاط اللي حصل عليها اللاعب بتتضاعف.

يعني لو الرمية كانت هتجيب نقطتين لمس الهدف في النص بيخليها 4 نقاط ولو كانت 3 نقاط ممكن تتحول لـ6 نقاط.. وده بيخلي اللاعب قدامه اختيار صعب يرمي بأمان ويحاول يضمن النقاط ولا يخاطر ويحاول يجيب الهدف اللي في النص ويضاعف النتيجة؟

“السودن دونك”

أغرب وأحسن طريقة للفوز في اللعبة اسمها سودن دونك.. لو الحمار وقع مقلوب على ديله وودانه بالشكل المطلوب اللعبة ممكن تنتهي فورًا، واللاعب بيضمن الفوز.. يعني ممكن تكون متأخر في النتيجة وتعمل رمية واحدة مثالية وتقلب المباراة كلها في ثانية.

نظام اللعب بيخلي كل لاعب يحصل على رمية واحدة في كل جولة وده معناه إن مفيش فرصة كبيرة للتعويض في نفس الجولة.. لازم تستغل الرمية كويس وتحاول تتحكم في القوة والزاوية وطريقة دوران الحمار لأن أي غلطة ممكن تضيع عليك النقاط

مزيج بين ألعاب مختلفة

اللي مميز في دونك توس إنها بتجمع بين أكتر من فكرة موجودة في ألعاب تانية.. ممكن تشبهها شوية بلعبة كورنهول بسبب فكرة الرمي ومحاولة إصابة منطقة معينة وفي نفس الوقت فيها جزء شبيه بتحديات قلب زجاجة المية لأن طريقة دوران الحمار قبل ما يقع بتفرق جدًا في النتيجة.

لكن في النهاية شكل اللعبة نفسه بيخليها مختلفة تمامًا عن أي لعبة تانية.. جزء كبير من شعبية اللعبة جاي من إنها سهلة جدًا في الفهم وفي نفس الوقت مش سهلة في التنفيذ.

أي حد يقدر يمسك الحمار ويرميه لكن إنك تخليه يعمل اللفة المطلوبة وينزل بالطريقة اللي انت عايزها هنا بقى الموضوع محتاج تدريب وحظ وتركيز وده بيخلي كل رمية فيها حالة من الترقب خصوصًا لما الحمار يلف في الهوا والناس تستنى يشوفوا هينزل إزاي.

من لعبة أصحاب للظهور على التليفزيون

النجاح اللي حققته اللعبة خلاها تخرج من نطاق التجمعات وتدخل مرحلة المنافسات لحد ما ظهرت على شبكة إي إس بي إن من خلال برنامج ذا أوتشو وهو برنامج معروف بعرض الرياضات والألعاب الغريبة والمختلفة وبكده اللعبة اللي بدأت كفكرة للضحك في تجمعات الأصحاب بقت ليها قواعد وأدوات وطريقة احتساب نقاط ومنافسات قدام الجمهور.

النهارده دونك توس بقت مناسبة جدًا للتجمعات والحفلات والرحلات والفعاليات العائلية لأنها مش محتاجة مساحة ولا مهارات رياضية وفي نفس الوقت اللعبة بتعمل جو من المنافسة والضحك لأنك ممكن تشوف لاعب داخل الرمية وهو واثق إنه هيجيب أعلى نقاط وفي الآخر الحمار يلف بطريقة غريبة وينتهي بيه الحال في مكان محدش كان متوقعه.