العشم آااه من العشم.. منين بييجي ونتعامل مع الزيادة منه إزاي؟
“العشم” من أكتر المشاعر اللي بنتعامل معاها في حياتنا لكنه مش مصطلح علمي في علم النفس هو كلمة عامية بتجمع كذا مفهوم نفسي في نفس الوقت.. التوقع والثقة والشعور بالأمان.. والإحساس بالاستحقاق في العلاقة
من المنظور العلمي العشم بيتكون من إيه؟
العشم وده عبارة عن توقع مبني على الخبرة السابقة.. مخك أكيد هيبني توقعاته من خلال تجاربك.. يعني لو شخص كان دايمًا بيساعدك.. بيقف جنبك وبيحتويك.. دماغك بتتعلم إن ده “النمط الطبيعي” فتبدأ تتوقع إنه هيعمل كده كل مرة
علم النفس بيسمي ده Expectation Formation (تكوين التوقعات).. يعني العشم مش بيطلع من فراغ لكنه غالبًا نتيجة تاريخ من المواقف
العشم بيزيد مع قرب العلاقة
كل ما زاد القرب العاطفي.. هتزيد توقعاتنا عشان كده بنزعل من أقرب الناس أكتر من الغرباء.. لو شخص غريب رفض يساعدك.. غالبًا هتتضايق شوية وتمشي لكن لو أخوك أو صاحبك أو شريك حياتك عمل نفس الحاجة الوجع بيكون أكبر.. لأن التوقعات كانت أعلى وده مرتبط بنظرية التعلق Attachment Theory
العشم مرتبط بالإحساس بالأمان
لما الإنسان يحس إن العلاقة آمنة يبدأ يطلب ويعبر ويعتمد على الطرف التاني.. وده في حد ذاته صحي.. المشكلة مش في العشم نفسه.. المشكلة لما يتحول لتوقعات مش معلن عنها.. أو اعتقاد إن الطرف التاني “لازم يفهم من غير ما اتكلم”.. هنا بيحصل الـ “Expectation Gap” وهي الفجوة بين اللي بنتوقعه واللي بيحصل فعلًا ودي من أكبر أسباب الخلافات في العلاقات
العشم المكسور بيعمل إيه في الدماغ؟
الدراسات بتوضح إن خيبة التوقعات بتنشط مناطق في المخ مرتبطة بالألم والانفعالات السلبية خصوصًا لما بتيجي من شخص بنثق فيه.. بمعنى إن الألم مش بسبب موقف واحد لكن بسبب إن الواقع كسر الصورة اللي كانت موجودة في دماغك
هل العشم ضعف؟ لا.. من الناحية العلمية القدرة على الوثوق بالناس وبناء توقعات منهم جزء طبيعي من العلاقات الإنسانية.. لكن لو الشخص بيكرر العشم في ناس أثبتوا كتير إنهم مش هيحققوا توقعاته فهنا المشكلة مش في العشم نفسه وإنما في تجاهل الأدلة اللي قدامه
هل نقلل العشم؟
الأصح مش إننا نقلل العشم لكن إننا نوازن بين الثقة والواقع
اسأل نفسك: هل الشخص وعد فعلًا؟ هل هو قادر أصلًا؟ هل أنا قلت احتياجي بوضوح؟ ولا أنا افترضت إنه هيعرف لوحده؟
أحيانًا اللي بنسميه “كسر عشم” بيكون في الحقيقة اختلاف في التوقعات ولا هو خيانة ولا تقصير متعمد.. العشم من منظور علم النفس هو توقع إيجابي تجاه شخص واثقين فيه مبني على خبرات قديمة وشعور بالأمان في علاقتنا.. ومش حاجة سلبية في حد ذاته لكن بيبقى مصدر للألم لما تكون توقعاتنا أعلى من الواقع أو لما نعتمد على افتراضات معبرناش عنها أصلًا
