أبرز تصريحات محمد صلاح في لقاءه مع عمرو أديب

لقاء فخر العرب محمد صلاح مع عمرو أديب كان حديث السوشيال ميديا من إمبارح، وده لإنه لقاء مميز عرفنا فيه حاجات كتير عن صلاح مكناش نعرفها وحاجات دايما بنسأل عنها وملهاش إجابات وكمان إجابات صلاح كانت صريحة وواضحة وده كان أحسن حاجة.. خلونا نشوف ملخص تصريحاته في اللقاء ده:

  • علاقتي بكلوب كويسة ومن أول يوم بنحاول سوا نطلع أحسن حاجة للفرقة
  • في مصر ماينفعش تسأل المدرب وبيعمل كل حاجة هو عايزها وأنت ماينفعش تعترض لإن له سلطة أكبر من أي لعيب
  • علاقتي بساديو ماني قايمة على الاحتراف وبنحاول نطلع أحسن ما عندنا عشان الفرقة.. ممكن يكون في تنافس على مين أحسن وده طبيعي في أي فرقة ولكن في الآخر بنحاول نخدم الفرقة على قد ما نقدر وممكن يكون في كور بنبقى أنانيين فيها مع بعض ولكن ده مش تعمد مننا وعمرنا ما قفشنا مع بعض ولا اتخانقنا.
  • بتخيل كل تفاصيل الماتش في دماغي قبل ميعاده ولما جبت جول في مانشستر يونايتد كان في دماغي قبله
  • عمري انا وكريستيانو ما اتكلمنا قبل كده
  • أنا لو عليا أنا عايز أقعد في ليفربول بس هو الموضوع متساب للإدارة.. لازم نوصل لاتفاق في العقد
  • الواحد بيبقى مبسوط إن في نادي زي برشلونة مهتم بيه بس أنا مبسوط في ليفربول والدنيا تمام فنشوف إيه اللي هيحصل
  • الدوري الإنجليزي حاليا أقوى دوري في العالم من أي دوري تاني
  • بعمل تأمل كتير وبحاول أكون بعيد عن السوشيال ميديا وأراء الناس ومش عايز أعرف رأي الناس أوي فيا.. بتابع من وقت للتاني بس مش مركز أوي.
  • الحاجة الوحيدة اللي بتضايقني في الملعب إني أضيع فرصة أو محدش يباصيلي
  • بنزل الملعب برجلي اليمين على طول وبخرج بيها برضه
  • بحاول أعيش الماتش في دماغي وأشوف أنا عايز إيه اللي يحصل وهشوط فين
  • فكرة إنك تشوف لاعب هو أحسن لاعب دي أراء.. لما بسأل نفسي أنا بالنسبة لي أنا أحسن لاعب في عقلي
  • معايير بعض الجوائز مش عادلة
  • ليفاندوفسكي وميسي هما أقوى منافسيني
  • الشهرة خلتني أهدى وصريح مع نفسي أكتر.. في بعض الناس بتحاول تبين كل حاجة حلوة في حياتهم بس هما عايزين يثبتوا حاجة لحد.. أنا مش عايز اثبت حاجة لحد.
  • أنا بحب الساقعة وألعب في جو زي ده وبيساعدني أكتر في الماتش.. إنما الحر بيخليني همدان
  • عمري ما نفسي راحت إن أنا أشرب حاجة ومش عايز أجرب
  • أنا شخص هادي وبحب أقعد في البيت
  • بحب الأكل الياباني بجانب الأكل الصحي
  • عمرو أديب لما قاله أنت قدامك 7 أو 8 سنين في الملاعب.. قاله أكتر
  • بفكر أفتح جيم ومعاه مطعم للأكل الصحي في مصر.. عايز أعمل حاجة بحبها مش سبوبة وخلاص
  • مكة بتتكلم بالأكسنت بتاع مانشستر وبتقولي أنت بتتكلم زي العرب وهي ذكية وشخصيتها قوية أوي
  • مشكلتي إني مابحبش المواجهة وبتغاضى عنها ولو بعدت عن حد وخدت خطوة بتبقى خطوة كبيرة، ولكن لو الشخص كان عامل كارثة وجالي أنا بالنسبالي الموضوع خلص.
  • تريزيجيه من أقرب الناس لقلبي، لو كان محظوظ شوية بدري كان هيعمل حاجات كويسة
  • اللاعب المصري بيخاف من المدرب الأجنبي أكتر عشان عارف إنه مش مهتم بالإعلام والضغط اللي بيعمله إنما المدرب المصري بيضغط عليه 100%
  • إحنا عندنا لاعيبة كويسة بس مش كلهم عايزين يوصلوا لحاجة، اللاعب بيقول أنا عندي عربية ومشهور والناس بتشاور عليا.. ده طموحه وبس
  • أنا كل لقاء بيطلع عيني بعدها بس أنا مابخافش عشان بقول الصراحة لكن بالنسبة لهم أنا عايز أقطع
  • الأهلي والزمالك بيضغطوا الحكام بشكل كبير.. ممكن يكون في أخطاء وهنا في الدوري الإنجليزي في أخطاء ولكن الإتحاد واقف وراهم.. أنا بتمنى إن إتحاد الكرة ولجنة الحكام يساعدوا الحكام، ودلوقتي بقى فيه VAR، ومافيش حكم عايز  يكسب الأهلي أو الزمالك متعمد وقدام الناس.
  • ماينفعش لجنة الحكام وإتحاد الكرة يضغط عليهم من الأهلي والزمالك ويعاقبوا متحكم علني عشان يرضوا حد من الطرفين.
  • إتحاد الكرة اتكلموا معايا في المعسكر وقالولي إنهم هيجبولي جاردات عشان خايفين يحصل حاجة فده اللي حصل، ولكن الناس دايما شايفه إن صلاح هو اللي عايز عشان ده بيجيب مشاهدة أكتر.. أنا اللي بأكل الجبنة طول الوقت.
  • الأهلي فيه استقرار أكتر فبيبقى دايما بيضغط لاعيبته إنك هتيجي في سيستم هتمشي عليه ولو غلطت هتبقى برا ده رأيي، ماعرفش الزمالك فرقته ثابتة ولا لا، فعدد الناس اللي بيتغير في الأهلي هو صغير وأنا معرفش أوي لإني مش بتابع الكرة المصرية أوي.
  • ببقى مبسوط وأنا في مصر ووسط اللاعيبة وأول ما بوصل البلد، أول ما أوصل لازم أكل كشري حتى لو في العربية.
  • عمرو دياب ماشاء الله عليه بقاله 30 سنة هو التوب
  • بسمع مهرجانات من وقت للتاني، خايف أزعل هاني شاكر مني
  • لو الست مريحاك ومديالك مساحة لازم تقدر ده، ولو ماقدرتش يبقى ماعندكش دم
  • كل العلاقات اللي بتفشل هي اللي بيبقى فيها خنقة والطرفين خانقين فيها على بعض
  • أنا باكل من 5 لـ 6 مرات في اليوم أكل صحي، الفطار بيكون مرتين، يعني عصير معاه شوية لبن خالي الدسم وبعدها بساعة ممكن أكل بياض بيض وأفوكادو وعيش مفهوش جلوتين، وعلى الغداء خضار وفراخ أو سمك وبعدها بساعتين ممكن زبادي ومعاه شوية فواكه وشوية مكسرات.

Related Articles

Back to top button