اكتشاف جبانة أثرية فيها مئات التوابيت والقطع الذهبية في المنوفية

أعلنت البعثة الأثرية المصرية التابعة للمجلس الأعلى للآثار عن اكتشاف جبانة أثرية في منطقة تل آثار أبو بللو بمحافظة المنوفية.. بتضم عدد كبير من المقابر اللي بترجع لفترات تاريخية مختلفة.. من نهاية العصر المتأخر للعصر البطلمي وبداية العصر الروماني

عرفنا إيه عن الاكتشاف؟

والدراسات الأولية بتشير إلى إن الجبانة كانت مخصصة على الأغلب لدفن أفراد من الطبقة المتوسطة في المجتمع.. وإن استكمال الحفائر ممكن يكشف معلومات أكتر عن حياتهم وعاداتهم في الدفن

وبحسب الدراسات الأثرية.. فالجزء الأكبر من الجبانة بيرجع للعصر البطلمي المبكر.. وتحديدًا القرنين الثالث والثاني قبل الميلاد.. مع وجود دفنات أقدم بترجع لنهاية العصر المتأخر

واللافت إن الدفنات المكتشفة بتوضح استمرار المصريين في اتباع عادات ومعتقدات دينية قديمة.. وارتباطها بآلهة زي رننوت وأوزير وإيزيس وحتحور

والجبانة موجودة داخل المنطقة الأثرية لمدينة الطرانة القديمة (Teranothis).. اللي كانت عند المدخل الشرقي لوادي النطرون.. المعروف تاريخيًا باستخراج ملح النطرون المستخدم في التحنيط

وكمان المنطقة نفسها فيها بقايا المدينة القديمة ومعبد مخصص للإلهة حتحور اللي كانت معروفة بلقب “سيدة الفيروز”

إيه أهمية الاكتشاف؟

وقال وزير السياحة والآثار إن الكشف ده مهم لأنه بيساعد في فهم تاريخ مصر بشكل أكبر.. وبيوضح إزاي عادات الدفن اتطورت عبر العصور المختلفة

والأمين العام للمجلس الأعلى للآثار وضح إن الكشف مميز بسبب العدد الكبير من التوابيت اللي ظهرت في مكان مفتوح.. بالإضافة لوجود أجزاء من مبانٍ أثرية لسه مدفونة تحت الرمال والرديم

إيه أبرز الاكتشافات في الجبانة؟

  • مئات التوابيت الحجرية، بعضها من غير أغطية.. ومنها اللي متكسر بسبب أعمال تخريب ومحاجر حصلت في المنطقة قبل كده

  • توابيت فخارية بأشكال مختلفة.. منها اللي عليه ملامح وشوش آدمية بطابع كاريكاتيري، ومنها اللي على شكل جسم إنسان كامل

  • بقايا مومياوات في حالة حفظ سيئة.. لكن الدراسات كشفت عن وجود آثار لمواد التحنيط والراتنجات.. وطبقات من الكارتوناج والجص الملون بالأصفر والأحمر والأزرق والذهبي

  • قطع ذهبية مختلفة.. منها ألسنة ذهبية.. وقرط أذن.. ودلاية قلادة.. وشرائح ذهبية

  • عدد كبير من تماثيل الأوشابتي المصنوعة من الفيانس.. ومنها اللي عليه نقوش هيروغليفية

  • تمائم وجعارين مصنوعة من أحجار مختلفة.. منها الشست واللازورد الأزرق.. بالإضافة لعيون الأوجات

  • موائد قرابين ورؤوس تماثيل صغيرة من الحجر الجيري

  • تماثيل من التراكوتا (الفخار المحروق) بتصور إيزيس أفروديت.. ومن بينها تمثال لإيزيس قاعدة فوق زهرة اللوتس وبترضع طفلها حربوقراط

  • تماثيل صغيرة لأبي الهول.. وأجزاء من تماثيل الصقر حورس

  • بقايا قطع طينية عليها رسومات لواجهة قصر ملكي.. وصور لأسدين متواجهين برؤوس صقور.. لابسين التاج المزدوج

  • دفنتين لصقور اتلاقوا وسط التوابيت

 

ومن المقرر إن أعمال الحفائر والدراسة والتوثيق هتكمل في المنطقة عشان تكشف  عن تفاصيل أكتر عن الجبانة وتاريخ مدينة الطرانة القديمة

Related Articles

Back to top button