إيه هي جلطة الرئة اللي اتصاب بيها كريم فهمي؟: أسبابها وأعراضها 

نشرت دانا البناوي زوجة الفنان كريم فهمي صورة على حسابه الرسمي على إنستجرام وهو في المستشفي وفي العناية المركزة وطالبت الجمهور إنهم يدعوله، وقالت إنه اتصاب بجلطتين في الرئة.

وبعد انتشار الصورة بدأت تسود حالة من القلق على السوشيال ميديا بين الفنانين وبدأوا يدعوا لكريم فهمي، وبدأ كمان الجمهور وناس كتير تسأل يعني إيه جلطة على الرئة وإيه سببها وإيه أعراضها والشفاء منها بيكون إزاي وهل ليها علاقة بفيروس كورونا خصوصا لإن كريم فهمي اتصاب بفيروس كورونا في ديسمبر اللي فات.

موقع “Healthline” قال في واحد من مقالاته أسباب الإصابة بالجلطة الرئوية واللي هي:

الجلطة الرئوية بتحصل لما بيحصل تخثر دموي في شريان معين في الرئة، والتخثرات الدموية دي عادة ما بتيجي من أوردة الرجل ومعروفة في الحالة دي بتجلط الأوردة العميقة، ومش ضروري إنها تحصل مرة واحدة، بس بتحصل لما أجزاء من الرئة بتتلف مع كل انسداد بيتم في الشريان وده بيأثر على الشخص لإنه الرئة بتوفر الأكسجين بصعوبة لباقي الجسم.

وفي الغالب بتيجي الجلطات الدموية في الرئة خلال فترات عدم النشاط، زي مثلا:

1- فترة الراحة الطويلة على السرير

2- في حال إن الشخص يفضل في السرير لمدة طويلة بعد جراحة مثلا زي: النوبة القلبية، أو كسر في الرجل، أو الصدمة، أو أي مرض خطير بيخلي الشخص يبقى عرضة أكتر لجلطات الدم.. وده بيحصل لإن في وضعية النوم الأطراف السفلية بتكون أفقية لفترات طويلة، وده بيؤدي لبطء في تدفق الدم الوريدي، وبالتالي بيتجمع الدم في الرجلين وبيسبب بعض الجلطات، ومنها جلطة الرئة.

3- الرحلات الطويلة، لإن الشخص بيفضل قاعد في وضع ضيق في السفر سواء كان بيطيارة أو عربية وده بيبطئ تدفق الدم في الرجل وبيسبب جلطات.

إيه العوامل التي بتزود من خطر الإصابة بجلطة الرئة؟

1- الإصابة بأمراض القلب والأوعية الدموية وتحديدًا فشل القلب، وده بيزويد من احتمالية جلطات الرئة.

2- الإصابة ببعض أنواع السرطان، ومنها سرطانات البنكرياس والمبيض، والرئة، وكلها بتزود احتمالية الإصابة بجلطات الدم.

3- التدخين لإنه بيهيء الجسم إنه يحصل له جلطة دموية في الرئتين، خصوصا لما يبقى فيه عوامل خطر تانية.

4- زيادة الوزن وبالذات عند الستات المدخنات أو اللي بيعانوا من ارتفاع ضغط الدم.

أعراض الإصابة بجلطة الرئة:

احتمال كبير تبقى الأعراض بتختلف من شخص لشخص على حسب حجم الجلطة، وإذا كان الشخص بيعاني من أمراض رئوية أو قلبية في الأساس، وبتشمل العلامات والأعراض:

1- ضيق في التنفس: وده بيظهر بشكل مفاجئ وبيسوأ بسرعة.

2- ألم في الصدر: يكون شبه الإحساس بالنوبة قلبية، وممكن الألم يبقى أسوأ لما الشخص يتنفس بعمق أو لما يكح أو يوطي.

3- كحة مستمرة: وغالبًا يبخرج المخاط مخلوط بالدم.

وممكن يبقى فيه أعراض تانية بتصيب أجزاء تانية في الجسم زي:

1- ألم في الرجل أو تورمها.

2- تغير لون الجلد وبيبقى لونه أزرق.

3- عرق زيادة أوي.

4- ضربات قلب سريعة أو غير منتظمة.

5- الدوار أو الدوخة.

طيب إزاي الشخص يتجنب الإصابة بالجلطة الرئوية دي:

 1- لو كان معرض لتكوين الجلطات الدكتور بيوصفه مضادات تجلط الرئة.

2- نشاط وحركة الجسم باستمرار.

3- اللي عمل عملية جراحية، لازم يحاول يتحرك أو يمارس رياضة أو تمارين لرجله بأسرع ما يمكن.

4- في الرحلات الطويلة اعمل تمارين “إطالة الساق” زي إنك تتني رجليك وقدمك وصوابع رجلك وتفردهم كل 30 دقيقة وأنت قاعد، قوم اقف وامشي شوية في كل مرة تعرف أثناء الرحلة واشرب مياه بانتظام.

5- وأنت مسافر البس شربات الطيران وده لو كنت معرض لخطر الإصابة بجلطات دموية فاسأل دكتور قبل ما تسافر لمسافات طويلة.

6- حاول تبطل تدخين وتمارس رياضة بانتظام على الأقل 150 دقيقة في الأسبوع.

7- بلاش تقعد فترة طويلة زي ما بنقعد قدام التلفزيون أو الكمبيوتر ولو هتقعد كتير حاول تاخد استراحة صغيرة كل نص ساعة.

8- كل أكل صحي ومتوازن زي الفاكهة والخضروات.

9- حافظ على وزن صحي.

10-وآخيرًا حاول تبعد عن الزعل والحزن.

Related Articles

Back to top button