بعد أزمة زين مالك وجيجي حديد: 10 علامات لو لقيتهم في حماتك اهرب من الأول

أكيد كلنا سمعنا عن قصة الحب اللي كلها فركشة ورجوع بين زين مالك وجيجي حديد اللي كان بقالهم سنين بيحبوا بعض، وبعد ما خلفوا بنتهم الوحيدة كان واضح إن علاقتهم مستقرة وفي تطور، أما الحدث اللي شغل أغلب الناس في العالم كله من كام يوم كان عكس اللي واضح ده وهو انتشار أخبار إن زين مالك ضرب والدة جيجي حديد واللي هي “يولندا” أثناء مشكلة عائلية، وكتب هو تويت وقال بعدها إنه كان كلام قاسي بس وماضربهاش ولا حاجة، وانهم تقريبا كده انفصلوا خلاص.

الدروس المستفادة من قصة زين مالك وجيجي حديد هو إن ساعات الأهل بيكون سبب إن بعض العلاقات ماتكلمش وبالتالي تدخل الأهل طول الوقت في مشاكل العلاقات مابيكونش أصح حاجة عشان كده بيفضل إنهم يتدخلوا في الأوقات الصعبة أو اللي فعلا بيقرر فيها الطرفين الانفصال.

وعشان ماتقعش في نفس غلطات اللي سبقوك وتفضل تتخانق مع حماتك طول الوقت.. خلينا نقولك على شوية حاجات لو لقيتها في حماتك اعرف إنها هتخلي حياتكوا صعبة حسب ما قال موقع “we have kids”:

1- هي دايما عندها حق:

بدون استثناء دايما هي الصح ومابتغلطش أبدا، ومابتعترفش بغلطها ولا بتعتذر،  وطبعا من وجهة نظرها أنت أو مراتك اللي غلطانين دايما.

2- دايما مش مهتمة:

هتتجاهلك في معظم الأوقات عشان بس توصلك إنها مش مهتمة، ومش هتسمع اللي بتقوله يعني لو سألتك جعان وقولتلها لا هتحطلك برضه أكل في الطبق، وهتتجاهل إنجازاتك وتتعامل معاها إنها تافهة ومالهاش قيمة.

3- هتبين إنها مابتحبكش:

هتحاول توضح إنها مابتحبكش بكل الطرق للستات مثلا هتبين إنك مابتعرفيش تطبخي كويس ولا بتعملي حاجة في البيت صح وهتقول ده في وشك، عشان كده حاولي ماتخليهاش تأثر عليكي ولا على احترامك لنفسك وخليكي واثقة في نفسك.

4- هتتوقع منك إنك دايما تسمع الكلام:

عشان تثبت هيمنتها فهي بتقى متوقعة منك إنك تقول حاضر وتحاول ترضيها وتوافقها في الرأي وده بيشمل كل حاجة زي الطبخ والتنضيف والظهور في المناسبات العائلية والثقافة، ومش بعيد كمان تبقى متوقعة إنك لازم توافق إنكوا تخلفوا وتجيبولها أحفاد عشان هي تربيهم بس، ولو ماسمعتش الكلام فهتشتكي منك لطوب الأرض.

5- عندها مشاكل سيطرة:

لو ماعرفتش تقنعك باحترام سلطتها فهتقفش على ابنها أو بنتها عشان توصل للي عايزاه عن طريقه، وهتخلي الحاجات البسيطة معقدة أكتر عشان تثبت للكل إنها صاحبة قرار.

6- مابتحترمش مساحتك الشخصية:

يعني مثلا هتجيلكوا البيت من غير ميعاد ومن غير ما تقول، وهتبقى متوقعة تاخدها بالحضن ومبسوط بالزيارة، وهتفضل تعدل طول الوقت على نضافة الشقة أو الأطفال أو تنظر لمجرد التنظير وخلاص.

7- هتمارس التلاعب العاطفي:

هتحاول تحسسك بالذنب واللوم أو تخوفك أنت ومراتك أو أنتي وجوزك، خصوصا لو كنت مابتسمعش كلامها فهتلجأ للطرق اللي فيها تلاعب زي إنها تبين إنها بتحب أزواج ولادها التانين أكتر وولادهم وهتديهم صلاحيات أكتر مش عندكوا.

8- مهتمة بالمظاهر جدا:

لازم تبان قدام الناس إنها مثقفة ومهتمة بنفسها وولادها وأحفادها وست مثالية في كل حاجة حتى لو هي مش كده المهم الصورة اللي قدام الناس بس.

9- شخصية نرجسية كل حاجة بتتمحور حواليها:

زي أي شخص نرجسي مابيشوفش ولاده أفراد بيشوف إنهم امتداد ليه، وكل اللي بيعملوه بينعكس عليه، وهتفضل تبذل كل جهدها عشان تصحح أي إنحراف عن المسار اللي اختارته ليهم وده بيشمل اللي اتجوزوهم كمان.

10- بتتصرف كأنها مهتمة بس هي مش مهتمة:

فيه أوقات هتبقى لطيفة معاك وعادة ده هيبقى بعد ما تعمل حاجة بتوافقها فبعدها ممكن تدعم رأيك وتفضل تكلمك وتطمن عليك لكن لو أول ما ترفض حاجة بتوافقها هتظهر الحقيقة إنها برضه مش بتتقبلك فخد بالك دي خدعة.

وطبعا مش بالضروري يبقي الكلام موجه للزوج بس خصوصا لإن أغلب المشاكل بتكون بين مرات للأبن وحماتها.. ومش ضروري تهرب أو تهربي لو لقيتي المشاكل دي في حماتك بس أهم حاجة تعرفوا تحموا نفسكوا وبيتكوا من أي شخص ممكن يبقى سبب إنه ينهار وتعرفوا تعملوا حدود للعلاقات دي كويس وتعرفوا إزاي ماتخلوش حد ياثر عليكوا.