ميعاد طرح PUBG الجديدة وشركة Ubisoft بتستهزأ باللاعبين.. وأخبار تانية في الملخص الأسبوعي
مساء الجمال والكريستال على كل الجيمرز الجُمال، خلونا من غير أي مقدمات نخش في ملخصنا الأسبوعي عن أخبار الألعاب.
وأخيرا.. نشرت صفحة Call of Duty على فيسبوك تفاصيل الموسم الجديد من لعبة Warzone ولعبة Call of Duty: Vanguard وفي المقدمة والأهم هي الخريطة الجديدة اللي اسمها “Caldera” وهيتم طرحها في 2 ديسمبر الجاي بالإضافة لوجود طائرات في الخريطة تقدر تستخدمها.
وكمان جزء Vanguard هيحتوي على خرائط وأطوار وأسلحة جديدة، مع إضافة تحديث لطور الزومبي. وكل ده هيتم طرحه في 1 ديسمبر الجاي.
أما بخصوص ميعاد طرح Vanguard واللي هيكون في 5 نوفمبر الجاي، فا اللعبة هيكون فيها القصة وطور الأونلاين اللي فيه 20 خريطة جديدة من ضمنهم خريطة “Shipment” وأطوار مختلفة منهم طبعا طور الزومبي.
وفي شهر نوفمبر برضه، هيكون في إيفنت بوقت محدود بعنوان “Last Days of Verdansk” وده هيكون في لعبة Warzone.
شركة “Ubisoft ” قررت تهزأ اللاعبين اللي انسحبوا من استكمال لعبة “Far Cry 6”.. إزاي؟ هقولك.
الشركة بعتت إيميلات للناس اللي ماكملوش اللعبة، وكان الإيميل على لسان الممثل الأمريكي “جيانكارلو اسبوزيتو” اللي بيقوم بدور الشرير في اللعبة، وكان محتوى الإيميل هو شكر ليهم على إنهم سابوا مدينة “يارا” في اللعبة ومنحوا له السيطرة الكاملة عليها.
ولو قررت تكمل اللعبة، هيجيلك إيميل تاني عبارة عن تحذير على لسان “جيانكارلو” برضه، بيحذروا من الاستمرار في محاربته وإلا هينتقم منه.
وطبعا شابوه لصاحب الفكرة الصايعة دي في شركة”Ubisoft”.
الخبر تاني هيعجب عدد كبير.. أو كل لاعبين” Call of Duty”، لإن شركة “Activision ” أعلنت إن الجزء الجديد “Call of Duty: Vanguard ” مساحته هتكون أقل بسبب تقنية الـ”Texture Streaming”، والمساحة هتقل بنسبة من 30% لـ 50% على أجهزة الجيل الجديد أو الكمبيوتر.
ولكن للأسف الشديد.. تويت الشركة ماذكرتش أجهزة الجيل القديم من المنصات المنزلية سواء PS4 أو Xbox.
Good news for hard drives everywhere: #Vanguard’s install size at launch will be significantly below previous #CallOfDuty releases.
New on-demand texture streaming tech expected to save up to 30%-50%+ on next-gen console and PC hard drive disk space 💥 pic.twitter.com/oYZoyIDTuO
— Call of Duty (@CallofDuty) October 26, 2021
شركة” Saber Interactive ” بالتعاون مع مطورين زي “Illogika و Ep1t0me” شغالين على لعبة بعنوان “A Quiet Place”.
أحداث اللعبة مش هتكون مبنية على أحداث الفيلم ولكن هتكون بنفس فكرته، ومن المفترض إننا نشوفها في 2022، حسب موقع اللعبة اللي ماكنش فيه أي معلومات زيادة باستثناء ميعاد الإصدار.
لعبة “eFootball ” كان من المتفرض يجيلها تحديث ولكن تم الإعلان عن تأجيله لبداية شهر نوفمبر الجاي، وده لإنهم حابين يقدموا أفضل ما عندهم عشان يحسنوا أداء اللعبة.
Update for our followers: pic.twitter.com/uCWiqitO52
— eFootball (@play_eFootball) October 22, 2021
فكلها كام يوم ويخلص شهر أكتوبر ونعرف ونشوف هينزل إمتى.. ده لو حد لسه محتفظ باللعبة ومامسحهاش.
من أسبوع تم الإعلان عن ريماستر “Grand Theft Auto: The Trilogy – The Definitive Edition” للي هيتم طرحه في شهر نوفمبر الجاي وهيكون فيه أهم 3 أجزاء من السلسلة وهما “GTA 3” و “Vice City” و”San Andreas”.
الجميل في الموضوع، إن ريماستر GTA 3 ممكن تشتريه في ديسمبر الجاي لوحده لو مش عايز تشتريهم كلهم، وده بخصوص PS لو مشترك في Playstation Now، وبخصوص Xbox، تقدر تشتري San Andreas لو مشترك في Xbox Game Pass في شهر نوفمبر الجاي.
تم الإعلان عن طرح لعبة “PUBG: New State “في 11 نوفمبر الجاي على نظام الأندرويد والـ iOS واللعبة أحداثها هتدور في سنة 2051.
اللعبة هيكون فيها 4 خرائط بما فيها الخريطة الأصلية “Erangel ” وطبعا هيكون في محتوى جديد مع التحديثات اللي هتتبعت.
وكمان هيكون فيه إجراءات قوية ضد الهاكرز والغش، والشركة قالت إنها هتركز على كشف الغش وحظر الغشاشين.
