في شهر التوعية بيه..إيه هو مرض الذئبة الحمراء وأعراضه وكمان أسبابه وأنواعه!
مرض الذئبة الحمراء من أصعب الأمراض المناعية لأنها بتهاجم أكتر من جهاز في الجسم.. وعشان كل ما الوصول للتشخيص بيبقى بدري كل ما السيطرة على المرض بتبقى أسهل.. ففي شهر التوعية بالذئبة الحمراء هنقولك على أهم أعراضها وأسبابها وكمان أنواعها المختلفة!
مرض مناعي مزمن وذاتي.. يعني جهاز المناعة المسؤول إنه يحمي الجسم من أي عدوى بيبدأ يهاجم الأعضاء والأنسجة السليمة.. وبيسبب التهابات بتأثر على أجهزة مختلفة في الجسم
الأعراض بتظهر وتختفي على شكل نوبات وساعات بتبقى شديدة لدرجة إنها تأثر على روتين اليوم.. وفي بداية المرض بتظهر علامة أو علامتين وبعدين بيظهر أكتر من عرض.. وأشهر أعراضها:
- التهاب المفاصل والعضلات والصدر
- طفح جلدي معروف باسم طفح الفراشة
- تحول لون صوابع الإيد والقدمين للون الأبيض أو الأزرق خاصة وقت الضغط النفسي
- تساقط الشعر
- تقرحات الفم
- ضيق تنفس
- تورم الغدد
- تعب وإرهاق شديد
- جلطات الدم
- الذئبة الحمامية الجهازية: ودي اللي بتهاجم معظم أجهزة الجسم
- الذئبة الجلدية: دي اللي بتهاجم الجلد بس
- الذئبة الناتجة عن الأدوية: ودي بتحصل لما يكون الشخص بياخد دوا من آثاره الجانبية الإصابة بالذئبة الحمراء
- الذئبة الوليدية: ودي حالة نادرة بتيجي لأطفال الأمهات المصابة بالذئبة
مفيش أسباب معروفة للإصابة بالذئبة بس فيه شوية عوامل بتحفز الإصابة بيها:
- الهرمونات: الجسم بيكون ليه ردود فعل معينة تجاه شوية هرمونات خاصة هرمون الإستروجين.. وعشان كده السيدات هما الأكتر إصابة بيها
- العوامل الوراثية: فيه اختلافات جينية بتزود احتمالية الإصابة بيها
- أشعة الشمس: بتحفز استجابة الجسم لظهور الذئبة الجلدية
- التاريخ الصحي: التدخين والضغط النفسي الشديد وكمان الأمراض المناعية التانية بتزود احتمالية الإصابة بيها
مفيش تحليل واحد ليها.. والدكاترة بيستبعدوا أمراض معينة الأول عشان يحددوا سبب الأعراض.. والتحاليل الأشهر هي:
- اختبار الأجسام المضادة للنواة (ِANA)
- تحاليل الدم اللي بتشوف كفاءة عمل جهاز المناعة
- تحليل البول اللي بيدور على علامات العدوى
- خزعات من الجلد وأنسجة الكلى
1- الحماية من أشعة الشمس.. فالكاب أو الجاكيت ضروري لتغطية الجلد ووضع واقي شمس بعامل حماية مايقلش عن 50
2- النوم من 7 لـ 9 ساعات.. والراحة مش رفاهية ففي حالة الإرهاق في نص اليوم.. الاسترخاء بيكون ضرورة
3- الحماية من الفيروسات والعدوى.. وده من خلال اللقاحات والتطعيمات
4- المواظبة على نظام صحي مضاد للالتهابات.. زي الأكلات أو المكملات الغذائية اللي فيها كركم أو جنزبيل أو أوميجا 3 وبذور كتان أو شيا.. والبعد عن اللحوم الحمراء والأكل المقلي والكربوهيدرات.. وطبعًا التدخين لأنه بيزود من هجمات الذئبة
5- المحافظة على صحة الأسنان واللثة لأنهم بيزودوا من أعراضها
6- الانتظام على الرياضة والحفاظ على الوزن.. لأن ده بيكافح فقدان الكتلة العضلية اللي بتعملها الذئبة
7- المحافظة على مستوى فيتامين د.. ومستوى الكوليسترول والهيموجلوبين.. وضغط الدم إنهم يكونوا ضمن المعدل الطبيعي ولو مش مظبوطة مهم متابعة الموضوع مع دكتور المناعة والروماتيزم لحد ما يكونوا ضمن المعدل الطبيعي ليهم
8- طلب الدعم من العيلة والصحاب في حالة تأثير التعب على الحالة النفسية
1- ثقف نفسك أكتر عن الذئبة وأعراضها.. عشان كل ما هتعرف أكتر كل ما هتقدم الدعم المظبوط اللي المصاب محتاجه
2- لو حسيت إنه مرهق أو موده مش كويس.. اتكلم معاه واعرف منه دي أعراض جديدة تعباه ولا نفسيته متأثرة بتعبه.. عشان يطمن ويقولك الأبديتس عن حالته
3- حسسه إنك فاهم هو عايش إيه سواء بكلام أو بأفعال زي إنك تجيبله كاب هدية عشان عارف إن الشمس غلط عليه
4- اعرف دكتوره اللي متابع معاه ومواعيد زياراته
5- فكره بمواعيد أدويته وجرعاتها ولو شاركته في نظام أكله هتبقى حاجة جميلة منك
6- تفهمه لو كنسل النزولة أو الخروجة معاك على آخر لحظة.. واعرف إن ده غصب عنه وإن طاقته مش ثابتة طول الوقت
وفي الآخر المصابين بالأمراض المناعية محتاجين يبعدوا على قد ما يقدروا عن الضغوطات النفسية لأنها السبب الأكبر في ظهورها.. ودايمًا يخلوا صحتهم أولوية عندهم!
