ليه بتستمتع بإنك تغلس على الناس اللي بتحبهم؟
“من الأساليب الشائعة عن عدد لا يستهان بيه من الناس في التعامل مع مشاعرهم الكويسة، هي استبدالها باستمرار بكلام مستفز أو محاولة لإثارة غيظ الشخص اللي بتحبه واللي ممكن نقول عليها “مناغشة” بردو لأنها نابعة من حب وطالما إنها ما تعدتش الهزار ودخلت في التنمر أو تعدي الحدود بأي شكل، فنقدر نقول عليها تعبير غريب عن الحب، خصوصًا لما تلاقي نفسك بتعملها مع حد معجب بيه ومش عارف تقوله “الكراش”.
زي ما ذكر موقع “cosmopolitan” فالأسلوب ده له فوايد كتير في حالات الإعجاب واللي ممكن نلخصهم في النقط الجاية:
1- بيساعد إنه يقلل من الضغط أو “التنشنة” الرومانسية اللي بتحصل لو لقيت نفسك في مواجهة الشخص ده، خصوصًا وإن التعامل بجدية مع فكرة إنك دلوقتي ممكن تروح تعترف بمشاعرك وتلاقي نفسك في علاقة، دي فكرة مرعبة بالنسبة لناس كتير، فأحيانًا بيكون التعامل بهزار أو إنك تنكش الشخص ده هو تعبير عن اهتمامك بيه لكن من غير ما تقدم على الكلام في الموضوع بشكل مباشر.
2- بيكون مفيد في حالة الرفض، لأنك بتبقى عملت مساحة صداقة لطيفة، أو عندك طريقة لتدارك الموضوع، وطبعًا مش معنى ده إنك تبقى شخص بيهزر طول الوقت لدرجة إن ماحدش ياخدك على محمل الجد.
3- ده بيثبت إنك بتبقى مرتاح وعلى طبيعتك جنب الشخص ده، عشان كده بتقدر تتكلم وتهزر براحتك ومعاه وانت مش مفترض إنه هيزعل.
4- لو بتقدروا تهزروا مع بعض فدي علامة تفاهم كويسة، مش أي حد بيقدر يفهم نكتة التاني بسهولة!
5- من أهم النقط هي إن ده بيبني بينكوا صداقة بتبقى أكبر من أي انجذاب عاطفي أو جنسي، ولو كل الحاجات دي انتهت، هتلاقي إن الشخص ده انت لسه بتعرف تتكلم معاه، أو بينكوا لغة حوار حقيقية بغض النظر عن أي حاجات تانية، سواء راحت بسبب إن ماحصلش نصيب بينكوا، أو بالفعل بقيتوا مع بعض وراحت فترة “شهر العسل” ومابقاش فاضل غير الصداقة!
6- طريقة جميلة إنك تقول لحد إنك متقبله، محاولتك إنك تغيظ حد باستمرار، وإنك تتناول مشاكله بهزار وبشكل ما يضايقهوش هي طريقة غير مباشر عشان تقوله أنا شايف الحاجات دي ومتقبلها ومتقبلك!
7- لو انت فعلًا شخص كويس، والطريقة دي بتطلع منك نوع من التوتر أو لأنك بتتجنب المواقف المؤثرة والكلام الجميل المباشر، فأكيد هتبقى مدرك لثقافة الاعتذار، كل شخص كثير الهزار، دايمًا بيقع في إنه ساعات بيبالغ أو بيقول حاجة تضايق فعلًا، وهنا مش مطلوب منك غير إنك تروح وتعتذر وتقول أسف بشكل مباشر بدون تعالي.
