ليه بتلاقي صفحات غريبة عاملها لايك؟.. وإزاي تحل المشكلة دي؟
مساء الفل، طبعا أنت قريت عنوان الموضوع وقررت تدوس وتخش عشان واضح إنك بتمر بنفس القصة دي وهي إنك بتلاقي نفسك عامل لايك لصفحات أنت مش عارفها ومتأكد إنك ماعملتلهاش لايك.. طيب إيه الحل؟
قبل ما أقولك الحل، خلينا نفهم ده بيحصل ليه.. حسب بحث بسيط عملناه، توصلنا إن اللي بيحصل ده بيعمله بعض الناس اللي ماسكين صفحات وهما إنهم بيعملوا نسخ من الصفحات اللي ماسكينها بعدد كبير جدا وبعدين بيتم بيعها وتغيير اسمها عن طريق ثغرة في فيسبوك.. شغل سوشيال ميديا بس من تحت تحت تحت بير السلم.. فمش عايزينك تقلق أنت مش مخُترق ولا حاجة، ولكن لما بيعمل نسخة من الصفحة، بتتنسخ بكل تفاصيلها يعني اسمها والفولورز واللايكس اللي عليها. طب إزاي نحل القصة دي؟
لو فاكر الباسورد بتاع فيسبوك هيكون الحل سهل، والحل عن طريق كذا خطوة هنمشيهم مع بعض واحدة واحدة:
1- هتفتح ابلكيشن فيسبوك على موبايلك وتختار Menu من تحت على الشمال لو عامله بالإنجليزي
2- تنزل تحت خالص وتختار Settings وتختار Password and Security
3- وتنزل تحت وتختار If you think your account was hacked
4- وتختار I found a post, message or event that I didn’t create ودوس Continue وبعدين Get Started وهيبدأ يراجع شوية بيانات وبعدين ابدأ امشي مع الخطوات زي تغيير الباسورد وتراجع إيميلك وبعدين الخطوة التالتة والأهم هي إنك تشوف الصفحات اللي عاملها فولو أو لايك والناس اللي عاملها أدد أو فولو
5 – لو لقيت كل الصفحات في القائمة مش عاملها لايك، دوس Select All واعمل Unfollow
وممكن تعمل الخطوة دي كل مدة، لحد دلوقتي نفذناها مرتين خلال أقل من 24 ساعة.. خلينا نشوف أخرتها مع فيسبوك وثغراته!
المصادر:
