الكتب دورها إيه؟ تعلمك وتفيدك.. ولا تعلم الـ “AI”؟
موقع 404 Media نشر وثائق لتحقيقات بتثبت إن شركات الـ AI بتشتري كميات كبيرة من الكتب الورقية الناردة خاصة اللي نجت من الحروب والحرايق وبتمسحها ضوئيًا (يعني تخليها رقمية) وفي الآخر تقطعها وتدمرها وده اسمه “مسح ضوئي تخريبي – destructive scanning”.. والسبب عشان يحسنوا معلومات وكتابة الذكاء الاصطناعي.. فهنقولك على كل التفاصيل!
ليه شركات الذكاء الاصطناعي بتعمل ده؟
الفترة الأخيرة زادت كمية المعلومات المولدة بالـ AI .. فحصل نقص في البيانات الجديدة اللي البشر بينتجوها وكتبها مؤلفين محترفين وحصلها تحرير وكمان مراجعة لغوية.. فشافوا ضرورة لزيادة المعلومات يقدروا يطوروا بيها أداء نماذجهم عشان كمان يقدر الـ AI يكتب رسايل ومحتوى دقيق ومتماسك
العملية دي بتحصل إزاي؟
- في 2024 عينت المدير التنفيذي السابق في شركة Anthropic المُشغلة لـ Claude عشان يجمع كل كتب العالم” وده عشان يزودوا معرفته بالبيانات.. وبدأت المكاتب يجيلها طلبات أكتر من اللي متعودين عليه ومش متناسبة مع طبيعة سلوك الشراء
- عمليات الشراء كانت بتحصل من خلال وسطاء.. فمعلومات الشركات كانت سرية وده من خلال خدمة اسمها ISBNdb بتسمح لشركات الذكاء الاصطناعي إنهم يشتروا لحد مليون كتاب في المرة الواحدة من غير ما حد يعرف مين الشركة اللي بتشتري الكميات دي
- العمال يشيلوا غلاف الكتب باستخدام آلات قطع هيدروليكية فالصفحات تنفصل عنه.. بعدين يعملوا المسح الضوئي لإنتاج النسخة الرقمية والنسخة الورقية الأصلية يعيدوا تدويرها فتدمر تمامًا.. والنسخة الرقمية يدربوا بيها نماذج الـ AI
طب وموقف القانون من ده إيه؟
القاضي الأمريكي “ويليام ألسوب” أصدر حكم سنة 2025 بإن استخدام الكتب المُشتراة في تدريب الـ AI حاجة قانونية.. واعتمد على مبدأ قانوني في أمريكا اسمه “مبدأ البيع الأول” معناه إن من حق المشتري يتصرف في النسخة الورقية بتاعته من غير ما ياخد موافقة جديدة من صاحب حقوق النشر
قال “ألسوب” إن التدمير اللي حصل للنسخ الورقية بعد المسح الضوئي كان لتوفير مساحة تخزين وتمكين الناس إنهم يلاقوها كنسخة رقمية أول ما يدورا عليها.. ومفيش دليل على إن تم عرضها أو مشاركتها أو بيعها خارج الشركة.. وده مش انتهاك لقانون حقوق النشر الأمريكي
حصل نزاع قانوني على الموضوع ده لحد ما انتهت بتسوية مالية حوالي 1.5 مليار دولار.. وده من غير اعتراف الشركة إنها ارتكبت مخالفة
تفتكر انت بقى إن الكتب فقدت قيمتها بعد التحول الرقمي ليها؟ وهل الشركات ليهم الحق في تدمير الكتب النادرة عشان تطوير الذكاء الاصطناعي؟
