ملخص نكش أبو الأنوار للجوكر ولمبة عفروتو

من يومين، فانز الجوكر لاحظوا إن تراك “مش زي اللي حاسه” اختفى من على اليوتيوب، وده خلى الناس تستغرب.

بس إمبارح الجوكر  حاول يفسر للناس اللي استغربت من اختفاء التراك ده وقال في ستوري، إن التراك اتمسح بسبب مزيكا التراك اللي شاريين حقوقها، ولكن في “شخص مريض” مسح له التراك عشان هو كمان كان شاري حقوق المزيكا، يعني هي لا بتاعته ولا نيلة وهي مزيكا متاحة لأي حد يشتريها” حسب كلام الجوكر.

وقال في الستوري اللي بعدها، أي مزيكا هتعجبني هغني عليها طالما مش سارقها، وسواء عاملها بروديوسر ليا مخصوص أو شاريها أونلاين.

الكلام لحد هنا ماكنش مفهوم هو يقصد بيه مين، لحد ما وضح في الستوري التالتة وقال: “من سبع سنين، صفحة من صفحات الفانز بتاعته كانت بتعمل مسابقة لدعم المواهب الجديدة، وكانت المواهب دي بتسجل تراك من تراكات الجوكر بصوتها، ومن المواهب اللي شاركت دي، هو “حفيده” محمد نور، والشهير بـ”ستة” حسب كلام الجوكر، ونزل الجوكر لينك لأبو الأنوار وهو بيغني الأغنية على الساوند كلاود، اللي اتسمعت 56 ألف مرة وكان عليها 1552 لايك و1848 كومنت.

ونزل سكرين شوت لكومنت كتبه “أبو الأنوار” من 7 سنين وهو بيسأل: “هل الجوكر هيقول رأيه ولا لا” وكان بيقصد وقتها هل الجوكر هيقول رأيه في أدائه ولا لا.

وقفل كلامه بستوري قال فيها: “أنا عارف إن اللي بعمله ده تسويق ليك يا ستة، بس عادي ياما دعمنا ستات وأعز من الولد ولد الولد، وكلكم سمعتوا راب بسببي”.

طيب ليه الجوكر قال كل الكلام ده؟ لإن أبو الأنوار نزل من كام ساعة تراك اسمه “كولومبيا” ونكش فيه الجوكر وقاله: “ماتسعناش إحنا التلاتة.. فكك من الراب يا كلاون وارجع لكتاباتك”، وكمان لاحظنا إن الأرت ورك بتاع التراك على يوتيوب كان فيه باتمان وهو بيضرب “الجوكر”.. أمممم!

وأبو الأنوار بعد ستوريز الجوكر، نزل هو كمان ستوري وكتب فيها: “من سبع سنين كان عندي 14 سنة وده نفس سن فانزك، ولكن الواحد لما كبر، ذوقه الموسيقي نضج وإنه كان بيسمع حاجات بتأثر عليه بالسلب”.

ومن كام ساعة، عفروتو دخل هو كمان في الموضوع ونزل ستوري للمبة وكتب عليها: “ياض اسكت ياض هيفنطزك”، وطبعا كلنا عارفين اللمبة دي بتشير لأبو الأنوار.

وعلى جانب تاني تماما، أبيوسف نزل ستوري وهو بيطارد برص، بعد ساعة من نزول تراك “كولومبيا” وستوريز الجوكر، فهل يقصد بيها حد مثلا؟ ولا هو بيقولهم أنا مش فاضي عشان بطارد البرص اللي عندي؟ محدش فاهم بس كده نقدر نقول إن السين والع اليومين دول.

Related Articles

Back to top button