امبارح الأربعاء 20 أغسطس.. الغواص الكرواتي “ماريتشيتش” قال في بوست على انستجرام إنه تم رسميًا تسجيل رقم قياسي جديد ليه في موسوعة جينيس عن فئة “أطول فترة حبس نفس طوعي تحت الماء” (بدون استخدام أنبوبة أكسجين تحت المياه) لمدة 29 دقيقة و3 ثواني

ليه ده رقم مميز؟

وعلشان تعرف قد إيه الرقم ده كبير.. فأطول فترة متسجلة قبله كانت أقل بخمس دقايق كاملين.. وضعف المدة اللي “الدولفين ذو الأنف القنيني” بيقدر يقعدها تحت المياه وده نوع مشهور من أنواع الدولفين

إزاي تم التحضير؟

في الأول كده.. الإنسان بيغير بس 20% من الهوا الموجود في رئته.. بعكس بعض الحيوانات البحرية زي الدولفين اللي بيغير 90% من الهوا وده اللي بيخليهم يقدروا يقعدوا تحت المياه فترات أكبر بكتير من الإنسان

“ماريتشيتش” علشان يتغلب على المشكلة دي.. قعد 10 دقايق يتنفس أكسجين نقي.

الهوا اللي بنتنفسه بيتكون تقريبً من 21% أكسجين و78% نيتروجين وفيه شوية غازات تانية كمان.. وعلشان جسم الإنسان يقدر يستحمل إنه يغطس تحت المياه لفترات طويلة بيحتاج أكسجين أكتر.. وده اللي عمله “ماريتشيتش” بإنه يتنفس أكسجين بس.. يعني 100% أكسجين وده بيطرد النييتروجين الزيادة في الجسم وبيزود مخزون الأكسجين في الجسم واللي بيخلي الجسم يستخدم من الأكسجين ده وبيأخر الاحساس بالاختناق وبيقلل مشاكل الغوص زي الدوخة أو فقد الوعي بسبب كتم النفس.

بس كده و”ماريتشيتش” عرف يعمل رقم قياسي جديد.. قولنا انت بقى عملت مسابقات غطس مع زمايلك قبل كده ولا كنت بتضحك عليهم وتعمل نفسك بتغطس معاهم؟