مونديال 2026 | فلوس بالمليارات.. وأزمة تذاكر

كأس العالم 2026 اللي هتتلعب في أمريكا وكندا والمكسيك قربت.. وكالعادة هي حديث العالم الفترة دي.. مش بس عشان أول مونديال بـ48 منتخب لكن ده عشان الفلوس ومليارات الدولارات اللي هياخدوها منتخبات البطولة.. وده اللي أعلنوا بشكل رسمي الاتحاد الدولي لكرة القدم “فيفا”.. لكن كمان فيه غضب جماهيري كبير بسبب أسعار التذاكر قبل ما الاتحاد الدولي يحاول يحتوي الأزمة في اللحظة الأخيرة ويعلن عن فئة جديدة بسعر مخفّض لدعم الجماهير.

جوائز خيالية

النهاردة الأربعاء 17 ديسمبر “فيفا” وافق رسميًا في اجتماعاته على المكافآت المالية بإجمالي 727 مليون دولار ولو هنقارن بالنسخة اللي فاتت مونديل قطر هنلاقيهم زيادة حوالي 50%
وعمومًا من الرقم ده هيتوزع 655 مليون دولار كجوائز مباشرة على الـ48 منتخب المشاركين وده بسبب كِبر حجم البطولة اللي هتشهد 104 مباراة لأول مرة في التاريخ المونديالي.

 التوزيع بيبدأ من: 50 مليون دولار للبطل و33 مليون للوصيف.. ويوصل لحد 9 ملايين دولار للمنتخبات اللي تخرج من الدور الأول.. غير كده كل منتخب متأهل هياخد 1.5 مليون دولار لتجهيزاته وده معناه إن أي منتخب مشارك مضمون له 10.5 مليون دولار على الأقل.

جدل التذاكر

من أول ما “فيفا” فتح باب التقديم على تذاكر كأس العالم ظهرت حالة جدل كبيرة خاصة بعد تداول أسعار اعتبرها كتير من الجماهير مرتفعة جدًا مقارنة بالنسخ اللي فاتت خصوصًا في مباريات الافتتاح والأدوار النهائية

ووفقًا للتذاكر اللي أعلنت من اللجنة المنظمة فالمشجع  محتاج يدفع 6900 دولار على الأقل لمتابعة فريقه من أول مباراة في دور المجموعات إلى المباراة النهائية

التقارير الإعلامية وتعليقات المشجعين على السوشيال ميديا أكدت إن حضور المونديال بقى حلم صعب لقطاع كبير من الجماهير المسافرة وده ظهر بوضوح رغم تسجيل 20 مليون طلب تذاكر حتى الآن في مرحلة البيع الحالية بنظام السحب العشوائي حسب ما أعلنه فيفا رسميًا.

وسريعًا وعلى عكس العادي حصل رد على حالة الغضب وأعلن “فيفا” في بيان رسمي امبارح الثلاثاء 16 ديسمبر  قال فيه هيكون متاح فئة جديدة من التذاكر باسم “Supporter Entry Tier” بسعر ثابت 60 دولارًا للتذكرة الواحدة وتشمل كل مباريات البطولة الـ104 بما فيها النهائي.

“فيفا” كمان وضح إن الفئة دي مخصصة حصريًا لجماهير المنتخبات المتأهلة وتوزيعها هيكون عن طريق الاتحادات الوطنية المشاركة بحيث كل اتحاد له الحرية في تحديد معايير الأحقية مع التركيز على الجماهير الأكثر ولاءً لمنتخباتها.

وكمان كشف “فيفا” إن 50% من حصة كل اتحاد وطني هتكون للفئات الأقل سعرًا (40% Supporter Value Tier و10% Supporter Entry Tier) والباقي للفئات الأعلى مع إعفاء الجماهير من الرسوم الإدارية عند استرداد الأموال للطلبات غير الناجحة.

في النهاية احنا قدام مونديال مختلف بكل المقاييس.. بين فلوس بالمليارات وأزمة تذاكر كانت هتضيع الحلم على ناس كتير.. وواضح إن كأس العالم 2026 مش بطولة عادية ده هيكون مونديال يعيد شكل اللعبة ويختبر قوة “فيفا” وهيجاوب على سؤال متداول: هل المونديال هينجح ولا بالكلام والفلوس دي كلها هتتحول وتكون بطولة استثمارية ؟