بعد فيدرر ونادال.. مين الجيل اللي هيمسك مضرب التنس ؟
لو اتولدت في التسعينات يبقى أكيد صورة لعبة التنس عندك اتبنت على 3 أسماء في اللعبة: فيدرر.. نادال.. دجوكوفيتش.. الجيل اللي فضل سنين طويلة محدش عارف ياخد منه ولا بطولة ولا لقب “الأفضل”
ومع اعتزال فيدرر ونادال اللي ودّع الملاعب.. ودجوكوفيتش اللي خلاص بيعدّ أيامه.. اللعبة دخلت في مرحلة جديدة وبدأنا نسأل:
مين بقى نجم التنس الأول؟ مين الجيل اللي شال الراية بعد العمالقة؟
الحقيقة إن التنس ماوقعش ولا اتأثر.. بالعكس من 2022 ولحد دخول 2026 الدنيا ولّعت وظهر جيل صغير في السن بس مرعب أداءً وسرعةً وشراسة
أول واحد في الجيل ده هو كارلوس ألكاراز.. إسباني صغير بس عامل دوشة في الملاعب وبياخد بطولات يمين وشمال والناس كلها بتقول إنه الوريث الشرعي لنادال
خلص سنة 2025 وهو رقم 1 عالميًا بعد ما كسب 8 بطولات منهم رولان جاروس والـUS Open
بعده على طول ييجي يانيك سينر الإيطالي اللي فجأة بقى حديث العالم!
كسب بطولتين جراند سلام في نفس السنة: أستراليا وويمبلدون وبقى واحد من أقوى منافسين ألكاراز على لقب “ملك التنس”
وييجي ألكسندر زفيريف الألماني اللي قدر يثبت إنه حلقة الربط بين الجيل القديم والجديد.. فضل ثابت في التوب 3 أغلب السنة رغم المنافسة المجنونة اللي حوالينه
ومش هننسى الكندي فيليكس أوجيه-ألياسيم اللي فجّر مفاجأة في 2025 ودخل لأول مرة ضمن أفضل 5 لاعبين في العالم وقدم موسم شارح فيه ملاعب العالم.. ومعاهم طبعًا تايلور فريتز الأمريكي اللي رجّع صورة التنس الأمريكي زي زمان وبقى أعلى لاعب من بلده في التصنيف
الجيل الجديد ده مش مجرد لاعيبة بتكسب بطولات وخلاص..
دول حرفيًا بيبنوا شكل جديد للتنس: سرعة أعلى، قوة أكتر.. ومنافسة مولّعة وأساليب لعب عمرنا ما شفناها مع الجيل القديم
وجمهور التسعينات اللي كان متعلق بفيدرر ونادال ودجوكوفيتش بقى بيدوّر على نجوم يعيش معاهم نفس الشغف اللي عاشه قبل كده والواضح جدًا إن الجيل الجديد جاهز يكمل الرحلة ويكتب تاريخ جديد للعبة.
