ملخص جوائز نوبل لسنة 2026

مع بداية شهر أكتوبر.. بدأ الإعلان عن الفائزين بجوائز نوبل لسنة 2026

وجوائز نوبل بتكون في 6 مجالات: الطب.. الفيزياء.. الكيمياء.. الأدب.. السلام والاقتصاد

ودي قائمة بالفائزين السنة دي.. وكسبوها في إيه؟

• في الطب.. للأمريكي “كارل ديسروث” والألمانيين “بيتر هيجيمان” و”جورج ناجل” 

“كارل ديسورث” هو طبيب نفسي ومهندس حيوي وأستاذ في جامعة ستانفورد .. أما “بيتر هيجيمان” فهو عالم فيزياء حيوية وأستاذ في جامعة هومبولت ببرلين.. و “جورج ناجل” عالم الفيزياء الحيوية ووظائف الأعضاء.. وأستاذ في جامعة فورتسبورج واكتشف مع “هيجيمان” بروتين “Channel Rhodopsin” في الطحالب في أوائل الألفينات

وفازوا بالجائزة عن اكتشافات القنوات الأيونية الحساسة للضوء والـ “Optogenetics”

وده ساعدهم يفهموا الدوائر العصبية اللي بتتحكم في الذكريات والمشاعر وسلوكيات معينة مرتبطة بالاضطرابات النفسية والعصبية زي الصرع.. وممكن تساعد في مجال الطب السريري في محاولة لاستعادة البصر لبعض الأشخاص اللي عندهم ضعف بصري

• في الفيزياء.. للبلجيكي /الأمريكي “فرانسيس هالزن”

من مواليد 1944 وأستاذ في جامعة ويسكونسن – ماديسون

وفاز لوحده بالجائزة.. وده نادر إنه يحصل في الفيزياء.. لأن آخر مرة جائزة الفيزياء راحت لشخص واحد كانت سنة 1991

وفاز بيها السنة دي عن مساهمته الكبيرة في مرصد IceCube في القطب الجنوبي.. واكتشافه لجسيمات صغيرة جدًا جاية من الفضاء

المرصد الضخم ده عبارة عن تليسكوب مدمج جوه كتلة من الجليد في القارة القطبية الجنوبية.. بيرصد جسيمات صغيرة جدًا بتعدي من كل حاجة تقريبًا ويعتبر مالهاش كتلة.. اسمها “نيوترينوهات”.. وأثبت إن بعضها جاي من أحداث عنيفة في الكون بره المجرة بتاعتنا

• في الكيمياء.. للفرنسي “هنري كاجان” والياباني “وكينسو سواي”

“هنري كاجان” أستاذ كيمياء في جامعة باريس- ساكلاي.. واللي كان استحق الجائزة في 2001 وفاتته غالبًا بسبب إن نوبل بتتقسم على 3 أشخاص كحد أقصى.. أما “كينسو سواي” فهو أستاذ فخري بجامعة طوكيو للعلوم.. ويعتبر الياباني رقم 10 اللي بياخد نوبل في الكيمياء

وفازوا بيها عن اكتشافهم للتأثيرات غير الخطية ⁠والتحفيز الذاتي في التخليق العضوي غير المتماثل

وده هيساعد الكيميائيين المتخصصين في صناعة الأدوية.. لأن الجزيئات اللي بيتكون منها الأدوية ليها شكلين.. والجسم بيستخدم شكل واحد بس.. فقدروا يكتشفوا إزاي نتحكم في صناعة الشكل اللي محتاجينه وإزاي ممكن يبقى هو الشكل المسيطر

• في الأدب.. للكندية “آن كارسون”

“آن” من مواليد تورنتو سنة 1950.. شاعرة ومترجمة وباحثة في الأدب الكلاسيكي.. دَرَّست في أماكن كتير زي ماكجيل وميشيجان ونيويورك وبرينستون.. ومن أشهر أعمالها “ 1998- Autobiography of Red”

ولجنة الجائزة اختارتها تقديرًا لأعمالها الجريئة والمميزة اللي بتخلق أشكال جديدة للأدب المعاصر بحوار لطيف مع التقاليد الكلاسيكية

والشاعرة “آن” بتقدر تعمل مزج بين الشعر والنثر.. الحوار والترجمة وبتستلهم في كتابتها كتير من الأساطير الإغريقية

• في السلام.. للجنوب إفريقية “ناڤي بيلاي”

“ناڤي” هي قاضية ومفوضة سامية سابقة لحقوق الإنسان في الأمم المتحدة.. وواحدة من أهم المدافعين عن سيادة القانون الدولي

وكانت رئيسة لجنة تحقيق أممية في 2025 واللي من نتائجها إثبات أن إسرائيل ارتكبت إبادة في غزة 

فازت بالجائزة عن جهودها في تعزيز السلام وملاحقة جرائم الحرب وجرائم ضد الإنسانية والإبادة الجماعية.. ومساهمتها الاستثنائية في ترسيخ العدالة

• في الاقتصاد.. للأمريكيان “روبرت إي هول” و “مايكل وودفورد “

“روبورت” أستاذ في جامعة ستانفورد.. و”مايكل” أستاذ في جامعة كولومبيا بأمريكا

الاتنين طوروا نماذج اقتصادية أحسن تفهمنا تأثير قرارات الحكومات والبنوك المركزية على الاقتصاد.. وقدروا يدخلوا في النماذج دي عنصر مهم تاني وهو إن الناس والشركات بتتصرف بناءًا على توقعاتها للمستقبل

فالنماذج دي هتفهمنا إزاي قرارات زي الفايدة والإنفاق بتقلل الصعود والهبوط في الاقتصاد.. ودلوقتي البنوك المركزية والحكومات حوالين العالم كله بتستخدمها

ولجنة نوبل وصفت شغلهم بإنه “نقلة نوعية” في سياسات الاستقرار الاقتصادي

وبكده بقى معاك زتونة جوائز نوبل السنة دي