إيه هي لعبة “كابادي” وليه الناس بقت تتكلم عنها؟
لو أول مرة تقرا كلمة “كابادي” فهنقولك إنها مابقتش مجرد لعبة شعبية في قرى الهند.. دي بقت رياضة عالمية بتجمع بين القوة والسرعة والذكاء وبتقدّم حالة حماس غير عادية.. لعبة بسيطة في شكلها بس معقدة في تفاصيلها.. ومع الوقت قدرت تخطف اهتمام جماهير كتير في آسيا والعالم.. ومؤخرًا بدأت تبقى موجودة في مصر وسط الشباب واللي بيدوروا على رياضات جديدة ومختلفة.. الكابادي مش مجرد لعبة جماعية.. دي تجربة تنافسية مليانة إثارة وأدرينالين.
جذور اللعبة
الكابادي لعبة قديمة جدًا وظهر اسمها في نصوص جنوب الهند من آلاف السنين وكانت معروفة باسم Sadugudu أو أسماء تانية حسب كل منطقة.. زمان كانت بتتلعب بين المزارعين والشباب كنوع من اختبار القوة والتحمل والشجاعة.
مع بداية القرن العشرين بدأت اللعبة تاخد شكل منظم.. وفي ولاية ماهاراشترا تحديدًا اتحط أول شكل رسمي لقوانين الكابادي في العشرينات.. وفي سنة 1950 اتأسس الاتحاد الهندي للكابادي واللي وضع قواعد موحدة للعبة وبدأ تنظيم بطولات قومية بشكل منتظم.
اللعبة ظهرت كعرض استعراضي في أولمبياد برلين 1936 بس ما دخلتش المنافسات الرسمية.. وبعد كده في التمانينات اتضافت الكابادي لألعاب آسيا وبقت رياضة أساسية من سنة 1990 في دورة بكين.. ومن ساعتها واللعبة بتكبر خطوة خطوة على الساحة الدولية.
لعبة سهلة وصعبة!
الكابادي فكرتها بسيطة بس تنفيذها محتاج شغل عالي.. كل فريق مكوّن من سبعة لاعبين والماتش بيتلعب على ملعب مستطيل مقسوم نصين لكل فريق جزء.
الهدف إن لاعب واحد من الفريق يدخل نص ملعب الخصم ويحاول يلمس أكبر عدد من لاعيبة الفريق التاني ويرجع بعدها لنص ملعبه من غير ما الدفاع يمسكه أو يوقعه.
واللاعب اثناء الهجوم لازم يفضل يكرر كلمة Kabaddi Kabaddi في نفس واحد من غير ما يتنفس.. وده دليل إنه مكمل الغارة في نفس النفس.
المباراة بتتلعب على شوطين كل شوط 20 دقيقة مع استراحة قصيرة.. النقاط بتتحسب حسب عدد اللمسات أو نجاح الدفاع في إيقاف المهاجم.. اللعبة محتاجة لياقة بدنية عالية وسرعة ورد فعل قوي وتكتيك جماعي وذكاء في اختيار التوقيت.
مين بينظم اللعبة؟
الاتحاد الدولي للكابادي World Kabaddi Federation هو الجهة المسؤولة عن تنظيم اللعبة على مستوى العالم.. الاتحاد اتأسس في بداية الألفينات وهدفه توحيد كل اتحادات الكابادي ونشر اللعبة في كل القارات.
الاتحاد بينظم بطولات عالم رسمية وبيشتغل على تطوير القوانين وتوحيدها وكمان بيسعى إن الكابادي تاخد اعتراف أوليمبي في المستقبل.. وده جزء من خطة طويلة المدى لنقل اللعبة لمرحلة أكبر.
من آسيا لكل العالم
الكابادي دلوقتي بتتلعب في أكتر من 65 دولة.. وبقى ليها بطولات عالمية وبطولات قارية وبطولات ناشئين وكمان كابادي شاطئية
وفي 2025 اتنظمت أول Real Kabaddi League في دبي بمشاركة خمس دول والهدف منها نشر اللعبة في الشرق الأوسط وجذب جماهير جديدة.. ودي خطوة مهمة في طريق توسع اللعبة خارج آسيا.
أقوى منتخبات الكابادي
منتخب الهند هو القوة التاريخية الأولى في اللعبة وفاز بمعظم البطولات الآسيوية والعالمية ودايمًا في صدارة التصنيف.. وإيران بقت المنافس الأخطر للهند في السنين الأخيرة وقدرت تكسبها في أكتر من بطولة وتثبت نفسها كقوة حقيقية.
باكستان كمان ليها تاريخ قوي في اللعبة وفي دول زي كوريا الجنوبية وبنجلاديش ونيبال وأستراليا وإنجلترا بدأوا يظهروا بشكل أقوى في البطولات الأخيرة.
في الكابادي الشاطئية اتعملت أول بطولة عالم سنة 2024 في إيران وفازت بيها إيران.. أما بطولة الناشئين فبدأت سنة 2019 وإيران فازت بالنسخة الأولى وبعدها الهند سيطرت على أغلب النسخ.
الكابادي في مصر
في مصر الكابادي بدأت تظهر في الفترة الأخيرة.. ووزارة الشباب والرياضة أطلقت مبادرات لنشر اللعبة في المدارس والمدن بالتعاون مع الاتحاد المصري للكابادي.
وفي 30 يوليو 2024 اتنظمت بطولة India Egypt Friendship Kabaddi Tournament في نادي جامعة حلوان بمشاركة 12 فريق رجال وسيدات وشهدت حضور جماهيري كبير وساعدت في تعريف المصريين باللعبة.
والاتحاد المصري للكابادي برئاسة د أسامة سعيد شغال على نشر اللعبة وبناء قاعدة لاعبين قوية وتكوين منتخب وطني يشارك في البطولات الدولية.
ليه الكابادي جذابة؟
الكابادي لعبة سريعة ومباشرة ومليانة احتكاك وإثارة.. بتعتمد على الذكاء والتكتيك أكتر ما تعتمد على القوة بس.. قواعدها سهلة ومش محتاجة تجهيزات معقدة وده بيخليها مناسبة لأي مكان.
علشان كده الكابادي عندها فرصة كبيرة تكبر في مصر وتبقى واحدة من الألعاب الجماعية اللي ليها جمهورها ولاعبيها في المستقبل القريب.
