إيه هو أشهر “كلاسيكو” في الألعاب التانية غير الكورة؟
إحنا متعودين إن كلمة “كلاسيكو” تيجي في دماغنا على طول مثلًا مع البارسا والريال.. بس الحقيقة إن فكرة الكلاسيكو مش حكر على الكورة بس.. الرياضة في العالم كله مليانة مواجهات تانية في ألعاب مختلفة.. تاريخ طويل.. جماهير بالملايين.. وعداوة رياضية بتتجدد مع كل مباراة. علشان كده الإعلام الأجنبي دايمًا بيستخدم مصطلحات زي Classic Rivalry وأحيانًا Clásico بشكل مباشر.. خصوصًا في أمريكا اللاتينية.
كلاسيكو السلة
مواجهة لوس أنجلوس ليكرز ضد بوسطن سيلتكس هي الكلاسيكو الأشهر في تاريخ كرة السلة الأمريكية.. وبتتحط دايمًا كأكبر صراع في الـNBA والفريقين عمومًا مسيطرين على البطولات لسنين طويلة.. وكل واحد فيهم خرّج أساطير غيرت شكل اللعبة والماتش بينهم مش مجرد لقاء دوري.. دي مواجهة مدارس مختلفة.. والإعلام الأمريكي بيتعامل معاها كحدث تاريخي قبل ما تكون مباراة عادية.
كلاسيكو البيسبول
ولو هنتكلم عن البيسبول.. يبقى لازم نقف عند ماتش نيويورك يانكيز ضد بوسطن ريد سوكس ودي عداوة رياضية بدأت من أوائل القرن الـ20 ولسه مكملة بنفس السخونة.. لدرجة إن الصراع بقى جزء من هوية المدينتين نفسهم وكل سلسلة مباريات بينهم بتتحول لمهرجان جماهيري وإعلامي.. وعلشان كده بتتصنف دايمًا كواحدة من أعنف Classic Rivalries في تاريخ الرياضة.
الكلاسيكو الدومينيكاني
دي حالة نادرة فعلًا كلمة El Clásico بتتقال فيها رسمي.. مواجهة آجيلاس سيباينياس ضد تيجريس ديل ليسي معروفة باسم الكلاسيكو الدومينيكاني.
الفريقين أصحاب أكبر قاعدة جماهيرية في “الدومينيكان” والماتشات بينهم البلد كلها بتقف عندها.. والصراع مش بس على بطولة ده كرامة وتاريخ.. وعلشان كده الإعلام اللاتيني دايمًا بيحطه ضمن أكبر الكلاسيكوهات برّه كرة القدم.
كلاسيكو فردي للتنس
حتى في الألعاب الفردية فكرة الكلاسيكو موجودة زي مثلًا روجر فيدرير ضد رافاييل نادال.. المواجهات بينهم عدّت فكرة مكسب وخسارة.. وبقت قصة رياضية كاملة.
اختلاف أسلوب اللعب.. وتبادل السيطرة على البطولات الكبرى.. خلا كل ماتش بينهم يتقدم للجمهور على إنه كلاسيكو التنس الحديث وواحدة من أعظم المنافسات الفردية في تاريخ الرياضة.
كلاسيكو السلة الجامعية
مواجهة ديوك ونورث كارولاينا هي كلاسيكو كرة السلة الجامعية في أمريكا والجامعتين قريبين جغرافيًا.. وده زوّد سخونة الصراع سنة بعد سنة وكل ماتش بينهم بيبقى تحت ضغط جماهيري وإعلامي ضخم.. وغالبًا بيأثر على شكل المنافسة على لقب الموسم وعلشان كده الإعلام الأمريكي دايمًا بيصنفه كـ Classic College Rivalry.
كلاسيكو الهوكي
مواجهة بوسطن بروينز ومونتريال كانديانز تعتبر من أعرق وأشرس المنافسات في تاريخ الهوكي.. بل ومن أقوى الـRivalries في كل الرياضات والفريقين اتقابلوا أكتر من أي خصمين تانيين في الدوري.. وكل ماتش بينهم له طعم خاص والمنافسة هنا مش بس على الجليد.. دي هوية وكرامة وتاريخ.
ولحد نهاية موسم 2024-25 الفريقين لعبوا قدّام بعض حوالي 943 مباراة.. رقم مرعب يخلي المواجهة دي واحدة من أطول وأعنف الكلاسيكوهات في تاريخ الرياضة.
وأخيرًا يعني الكلاسيكو مش كلمة.. ده حالة سواء كورة أو سلة أو بيسبول أو تنس أو هوكي.. الفكرة واحدة: تاريخ طويل.. جماهير مجنونة ومواجهة لما تيجي.. الدنيا كلها بتقف تتفرج.
