الحرب الكلامية بين لابورتا وفونت قبل انتخابات رئاسة برشلونة

15 مارس 2026 هيكون معادنا مع انتخابات برشلونة اللي بتتحول تقريبًا لمعركة سياسية كاملة.. الموضوع مش مجرد اختيار رئيس جديد لكن تحديد الطريق اللي هيمشي فيه واحد من أكبر أندية العالم خلال السنين الجاية.. انتخابات 2026 تحديدًا جاية في توقيت حساس جدًا لأن النادي خرج خلال السنين اللي فاتت من أزمة مالية ضخمة، ولسه بيحاول يرجع تاني لقوته الاقتصادية والرياضية.

الانتخابات المرة دي بتدور أساسًا بين الرئيس الحالي خوان لابورتا ورجل الأعمال الكتالوني فيكتور فونت.. المواجهة دي مش جديدة على جماهير برشلونة لأن الاتنين اتنافسوا قبل كده في انتخابات 2021 لكن الظروف دلوقتي مختلفة تمامًا.

النادي حاليًا بيعيش مرحلة انتقالية مهمة خصوصًا مع مشروع تطوير ملعب كامب نو اللي يعتبر واحد من أكبر المشاريع في تاريخ النادي بجانب كده الإدارة بتحاول ترجع الفريق للمنافسة بقوة في أوروبا بعد سنين من التراجع.

ميزة برشلونة إن النادي مش مملوك لمستثمر أو شركة زي أغلب الأندية الأوروبية لكن مملوك لأعضاء النادي نفسهم المعروفين باسم “السوسيوس”.. الأعضاء دول هم اللي بيختاروا رئيس النادي عن طريق الانتخابات علشان كده كل انتخابات بتتحول لحدث ضخم بيتابعه الإعلام الأوروبي كله لأن النتيجة بتحدد شكل النادي لسنين قدام.

انتخابات 2026 بقت أشبه باستفتاء داخل النادي هل الأعضاء يفضلوا الاستمرار مع مشروع لابورتا ولا يقرروا التغيير مع مشروع فيكتور فونت.

ليه حدث كبير ؟

انتخابات برشلونة مش مجرد انتخابات داخل نادي كرة قدم لكنها حدث عالمي بيتابعوه الصحفيين والمحللين في أوروبا كلها.. السبب في ده إن نادي برشلونة واحد من أكبر المؤسسات الرياضية في العالم سواء من ناحية الجماهير أو الإيرادات.

النادي الكتالوني عنده قاعدة جماهيرية ضخمة جدًا في كل القارات وإيراداته بتوصل لمئات الملايين من اليورو سنويًا.. علشان كده أي قرار إداري بيتاخد جوه النادي بيكون له تأثير كبير على سوق الكورة في أوروبا.

كمان رئيس برشلونة مش بس مسؤول عن الفريق الأول لكنه بيدير مؤسسة كاملة فيها ملفات اقتصادية ورياضية كبيرة ومن أهم الملفات دي العقود التجارية والرعايات تطوير الملعب والمنشآت إدارة أكاديمية الشباب بالإضافة طبعًا لملف الصفقات وسوق الانتقالات.

ميزة برشلونة كمان إن النادي بيشتغل بنظام ديمقراطي حقيقي.. الأعضاء هم اللي بينتخبوا الرئيس وكمان يقدروا يحاسبوه لو الأمور مشت بشكل غلط.. النظام ده موجود في عدد قليل جدًا من الأندية الكبيرة في أوروبا.. علشان كده كل انتخابات في برشلونة بتبقى حدث مهم لأن النتيجة مش بس بتحدد رئيس جديد لكنها بتحدد مستقبل واحد من أكبر أندية الكورة في العالم.

مشروع لابورتا

يعتبر خوان لابورتا واحد من أشهر رؤساء نادي برشلونة في العصر الحديث.. أول مرة مسك رئاسة النادي كانت سنة 2003 ووقتها كان النادي بيمر بمرحلة صعبة لكن لابورتا نجح يبني مشروع كروي قوي جدًا خلّى برشلونة يدخل واحدة من أعظم فتراته في التاريخ.

في الفترة دي ظهر الجيل الذهبي للنادي اللي كان على رأسه النجم الأرجنتيني ليونيل ميسي وحقق الفريق بطولات كتير محليًا وأوروبيًا علشان كده لابورتا ما زال عنده شعبية كبيرة وسط جماهير برشلونة.

رجع لابورتا لرئاسة النادي تاني في انتخابات 2021 وقت ما كان برشلونة بيمر بأزمة مالية ضخمة وقتها وعد بإعادة الاستقرار للنادي ومحاولة إصلاح الوضع الاقتصادي اللي كان متدهور جدًا.

خلال الفترة دي اتخذت الإدارة قرارات صعبة علشان تقلل الديون وتحسن الوضع المالي وفي حملته الانتخابية الحالية بيركز لابورتا على فكرة الاستمرارية وبيقول إن المشروع اللي بدأه محتاج وقت أطول علشان يكتمل.

أهم نقطة بيركز عليها لابورتا في برنامجه هي مشروع تطوير ملعب كامب نو اللي من المتوقع إنه يزود إيرادات النادي بشكل كبير في المستقبل كمان بيؤكد إن الإدارة الحالية نجحت في إعادة الفريق للمنافسة محليًا وإن المرحلة الجاية هدفها رجوع برشلونة بقوة لدوري أبطال أوروبا.

مين هو فونت؟

فيكتور فونت يعتبر واحد من أبرز رجال الأعمال في إقليم كتالونيا وظهر اسمه بقوة في المشهد الانتخابي داخل برشلونة خلال السنين الأخيرة.. فونت شغال في مجال التكنولوجيا والإعلام وهو مؤسس مجموعة استثمارية كبيرة لكن اهتمامه ببرشلونة بدأ من زمان وقرر يدخل عالم إدارة النادي من خلال مشروع انتخابي هدفه تغيير طريقة الإدارة داخل النادي.

أول ظهور قوي له كان في انتخابات 2021 لما نافس لابورتا على الرئاسة ورغم إنه خسر الانتخابات وقتها لكنه حصل على نسبة أصوات كبيرة خلت اسمه يفضل موجود بقوة في المشهد داخل النادي.. من وقتها وهو بيحاول يبني قاعدة دعم داخل برشلونة استعدادًا لمحاولة جديدة للوصول للرئاسة.

برنامج فيكتور

برنامج فونت الانتخابي قائم على فكرة الإدارة المؤسسية بمعنى إن النادي لازم يدار عن طريق فريق متخصص في كل المجالات بدل ما تكون القرارات كلها مرتبطة بشخص الرئيس فقط.

كمان بيطالب بزيادة الشفافية المالية وإن الأعضاء يكون لهم دور أكبر في اتخاذ القرارات المهمة وبيؤكد إن برشلونة لازم يطور طريقة الإدارة علشان يقدر ينافس الأندية الأوروبية الكبيرة اللي بقت تعتمد على نماذج اقتصادية حديثة.

كمان من أبرز الحاجات اللي بيلعب عليها فونت هو قدرته على جلب نجوم كبار للبارسا مقدرش يعملها لابورت في السنين اللي فاتت زي هالاند وكين وغيرهم.

الحرب الكلامية 

مع اقتراب موعد الانتخابات بدأت المنافسة بين المرشحين تاخد طابع أكثر سخونة وتحولت الحملة الانتخابية إلى حرب تصريحات بين الطرفين.. فيكتور فونت كان من أبرز المنتقدين لإدارة لابورتا خلال السنين اللي فاتت هو شايف إن الإدارة الحالية بتعتمد على أسلوب قديم في الإدارة وإن النادي محتاج طريقة تفكير جديدة علشان يقدر ينافس في العصر الحديث.

كمان انتقد فونت بعض المشاريع اللي أعلنت عنها الإدارة وقال إن تنفيذها اتأخر عن المواعيد اللي كانت متعلنة واعتبر إن برشلونة محتاج إدارة أكثر احترافية وتنظيمًا.

على الجانب التاني رد لابورتا على الانتقادات دي بقوة وقال إن منافسه بيتجاهل الظروف الصعبة اللي كانت موجودة لما استلم الإدارة وأكد إن النادي كان غارق في أزمة مالية ضخمة وإن الإدارة الحالية نجحت في إنقاذ النادي تدريجيًا.

لابورتا كمان اتهم فونت إنه بيحاول يستغل المشاكل الموجودة علشان يكسب أصوات في الانتخابات وشدد على إن الاستقرار الإداري مهم جدًا في المرحلة الحالية.

الحرب الكلامية بين الاتنين خلت الانتخابات أكثر إثارة لأن أعضاء النادي بقوا قدام اختيار واضح إما الاستمرار مع المشروع الحالي أو تجربة مشروع جديد.

نظام الانتخابات؟

انتخابات رئاسة نادي برشلونة بتتم بنظام محدد موجود في اللوائح الداخلية للنادي.. العملية بتبدأ بإعلان رسمي عن فتح باب الترشح وده بيسمح لأي عضو في النادي إنه يترشح لو استوفى الشروط.

أول خطوة لازم يعملها أي مرشح هي جمع عدد معين من التوقيعات من أعضاء النادي.. التوقيعات دي بتكون دليل إن المرشح عنده دعم داخل النادي بعد كده اللجنة الانتخابية بتراجع التوقيعات علشان تتأكد إنها صحيحة.

لو المرشح قدر يجمع العدد المطلوب من التوقيعات بيتم اعتماده رسميًا كمرشح في الانتخابات.. بعد كده تبدأ الحملة الانتخابية،ودي بيعرض فيها كل مرشح برنامجه ورؤيته لمستقبل النادي.. المرشحون بيشاركوا في مؤتمرات ولقاءات إعلامية ومناظرات علشان يقنعوا أعضاء النادي ببرامجهم.

وفي يوم الانتخابات بيتوجه أعضاء النادي لمراكز التصويت علشان يدوا أصواتهم وبعد انتهاء التصويت بيتم فرز الأصوات وإعلان الفائز اللي بيصبح رئيس النادي لمدة خمس سنوات.

اللوائح الداخلية لنادي برشلونة بتحدد إطارًا زمنيًا واضحًا لإجراء انتخابات رئاسة النادي وطبقًا للنظام الأساسي لازم تتم الانتخابات في أي وقت بين 15 مارس و15 يونيو من سنة الانتخابات.

الفترة دي مش معناها إن التصويت بيستمر 3 شهور لكن معناها إن الإدارة الحالية عندها حرية اختيار اليوم المناسب للتصويت داخل هذا الإطار الزمني.. الهدف من ده هو إعطاء النادي مرونة تنظيمية تسمح له بتحديد الموعد الأنسب حسب الظروف الرياضية والإدارية.

في انتخابات 2026 مثلًا الرئيس الحالي خوان لابورتا اختار 15 مارس لأنه أول موعد يسمح به النظام وده علشان يحسم ملف الإدارة مبكرًا ويمنع تشتيت الفريق خلال الجزء الأخير من الموسم لكن في حالات أخرى ممكن النادي يؤجل الانتخابات حتى يونيو خصوصًا لو الإدارة تفضل انتظار نهاية الموسم لمعرفة النتائج الرياضية قبل التصويت.