موضوع مايهمكش: لو بيطلعلك حبوب بعد استخدام منتجات السكين كير.. جربي صيام البشرة!
قعدتي سمعتي ريفيوهات لمنتجات سكين كير قد كده وحوشتي عشان تطلبيهم.. ولما جُم وبدأتي تستخدميهم.. لقيتي إن بقى يطلعلك حبوب أكتر من الأول والبقع الداكنة بتزيد.. قبل ما تحسي إن اتضحك عليكي فيها.. تعالي نقولك إيه هو صيام البشرة عن منتجات العناية بيها وإيه فوايده؟
هو إنك توقفي استخدام أي منتج للعناية بالبشرة زي المرطبات أو الغسول أو السيرومات لمدة معينة.. بحيث تدي للبشرة بريك إنها تجدد نفسها بشكل طبيعي.. وفكرته قايمة على إن استخدام منتجات البشرة بيأثر على توازن البشرة وبيمنعها من إفراز زيوتها الطبيعية
الاستخدام المتواصل لمنتجات العناية بالبشرة بيسبب:
- ضعف في حاجز البشرة.. خاصة مع استخدام المكونات النشطة (مركبات بتعالج مشاكل البشرة بشكل مباشر) زي حمض الهيالورونيك ومضادات الأكسدة وحمض الساليسيليك والنياسيناميد
- تهيج البشرة وانسداد المسام: بسبب الطبقات الكتيرة اللي بتحطيها عليها
- تعطيل قدرة البشرة على تنظيم إفراز الزيوت والحفاظ على الترطيب
1- إصلاح حاجز البشرة: تقليل منتجات العناية بالبشرة بيدي فرصة للطبقة القرنية_ اللي هي الطبقة الخارجية للبشرة_ إنها تستعيد وظيفتها وتقوى.. خاصة إن منتجات العناية الحمضية للبشرة بتضعفها وتكسرها
2- توازن الميكروبيوم: ودي مجموعة من الكائنات الحية الدقيقة النافعة اللي بتساعد على صحة البشرة.. فقلة استخدام منتجات العناية بالبشرة بتقلل من نمو البكتيريا دي بشكل طبيعي
3- تقليل الحساسية: عشان تقللي التهيج والالتهاب اللي بيحصل لبشرتك.. بتحتاجي تتخلصي من السموم والمنتجات الزيادة.. فالديتوكس ده بيقوي البشرة ويقلل من الالتهابات
4- تنظيم إفراز الدهون: البشرة بتنتج زيوت طبيعية بترطبها.. فلما بتحطي منتجات عناية كتيرة عليها توازن الدهون الطبيعية دي بيختل فإما بيزيد الإفراز أو بيقل جدًا فبتبدأ البشرة تجف
5- التقشير الطبيعي: صيام البشرة بيدي فرصة ليها إنها تجدد خلايا البشرة بشكل طبيعي.. فخلايا الجلد الميتة بتتقشر وبالتالي ملمس بشرتك هيبقى أنعم ونضر أكتر
6- بشرة مشرقة: وده لأن تعرض بشرتك المستمر للمنتجات بيزود من السموم وده بيخلي الحبوب والرؤوس البيضاء والسودا تزيد.. غير إن شكل البشرة نفسها بيبقى باهت.. فلما هتديها فرصتها إنها تتنفس هتلاقي شكلها بقى صحي و Glowy كده
7- امتصاص أفضل للمنتجات: لما تبسطي روتين عنايتك بالبشرة لمدة معينة وترجعي تستخدمي تاني المنتجات هتلاقي نتيجتها بقت فعالة أكتر وبتاخدي أقصى استفادة منها
السؤال ده إجابته نسيبة أوي وبتختلف من شخص للتاني:
- فيه حالات معينة مابيجيبش معاها نتيجة خاصة لو بشرتهم بتعتمد على منتجات العناية بالبشرة كعلاج أكتر من إنه عناية
- في حالات تانية بيكون فعال وناجح معاهم جدًا.. زي اللي بشرتهم حساسة وعندها حبوب شديدة.. فبيكونوا بيعتمدوا على صيام البشرة بشكل كبير بحيث يدوا لبشرتهم المساحة إنها تستعيد توازنها وكمان يحددوا أنهي منتج أو روتين بيسبب لهم الحساسية أو الحبوب
1- الترطيب: ابدأي بمرطب أو سيروم مكوناته خفيفة زي الصبار أو الجلسرين
2- التدريج في الرجوع لاستخدام المنتجات: فدخلي منتج واحد كل 3 – 5 أيام.. وراقبي ردة فعل بشرتك.. خاصة لو دخلتي تونر فيه عطر
3- استخدمي المكونات الفعالة في آخر مرحلة.. يعني ما رجعتي لاستخدام منتجات العناية كلها.. دخلي بقى المكونات القوية زي النياسيناميد.. بس برضه بالتدريج يعني ابدأي بأقل تركيز وزودي مع الوقت
4- حافظي على الحماية من الشمس: فلو كنتي وقفتي استخدام واقي الشمس_ مع إنه الشئ المسموح استخدامه وقت الصيام عند التعرض للشمس بس_ فارجعي حطيه تاني بانتظام بس يبقى قوامه خفيف عشان تتجنبي سد المسام
وفي الآخر عايزين نقولك إن الحاجات الحقيقية اللي بتفرق فعلًا في نضارة بشرتك هي الفلوس.. الضحك.. البُعد عن الستريس
