طريقة جديدة لعلاج السرطان خلال جلسات مدتها دقيقة واحدة بس!
يوم الاثنين 4 مايو 2026 أعلنت هيئة الخدمات الصحية البريطانية “NHS” عن تطوير طريقة علاج جديدة للسرطان بحقنة بتتاخد في 60 ثانية بس!
التطوير ده بيتم باستخدام دواء اسمه “Pembrolizumab” والمعروف تجاريًا باسم “Keytruda” بس مش ده الجديد.. الجديد في طريقة إعطاء الدواء نفسه للمريض
يعني الأول المرضى كانوا بياخدوا العلاج عن طريق محلول وريدي.. في جلسات علاج كانت مدتها من “30 دقيقة” لحد “ساعتين”.. دلوقتي بقى الطريقة الجديدة هتساعد المريض ياخد نفس الدواء “بحقنة تحت الجلد” وده خلال “60 ثانية”.. يعني في خلال دقيقة أو اتنين بالكتير هيكون مريض السرطان خد جرعته العلاجية بسلام وأمان
التغيير في طريقة العلاج ده هيستفيد منه حوالي 14 ألف مريض سنويًا في إنجلترا.. والدواء ده بيستخدم لعلاج أنواع كتير من السرطان زي:
– سرطان الرئة
– سرطان الثدي
– سرطان عنق الرحم
– سرطانات الرأس والرقبة
الدواء ده نوع من العلاج المناعي (Immunotherapy).. وبيشتغل عن طريق تعطيل بروتين اسمه “PD-1”.. البروتين ده بيمنع جهاز المناعة إنه يهاجم الخلايا السرطانية
فلما الدواء يعطله… جهاز المناعة بيقدر يتعرف على السرطان ويبدأ يهاجمه
النسخة الجديدة من الحقن تحت الجلد اتطورت عشان تحافظ على نفس كفاءة الامتصاص ونفس التأثير بتاع المحلول الوريدي.. وده احتاج تجارب ودراسات كتير عشان يتأكدوا إن مفيش فرق في الفعالية أو الأمان
الميزة هنا مش بس في راحة المريض.. لكن كمان في تقليل الضغط على المستشفيات وتوفير وقت كبير للفرق الطبية.. والتقديرات بتقول إن النظام الصحي ممكن يوفر عشرات الآلاف من ساعات العمل سنويًا بسبب التغيير ده
رغم إن الدواء نفسه مش جديد لكن تغيير طريقة استخدامه بالشكل ده ممكن يفتح الباب لتطوير نفس الفكرة مع أدوية تانية.. وده ممكن يغيّر شكل علاج السرطان في المستقبل من جلسات طويلة داخل المستشفى.. لإجراءات سريعة وأسهل بكتير للمرضى.
