“الهايدريشن بريك” والقلق اللي عامله في مونديال 2026

من أول أيام كأس العالم 2026 الجماهير كانت مستنية تشوف أهداف النجوم الكبار والمفاجآت اللي بتحصل في كل نسخة من البطولة لكن فجأة بقى فيه موضوع تاني خطف الأضواء وبقى حديث اللاعبين والمدربين والجماهير وهو استراحة المياه الإلزامية اللي فرضتها “الفيفا” كل ماتش

القرار اللي اتقدم على إنه خطوة هدفها حماية اللاعبين من درجات الحرارة المرتفعة اتحول بسرعة لواحد من أكتر القرارات المثيرة للجدل في البطولة لدرجة إن ناس كتير بقت شايفة إنه أثر على شكل المباريات أكتر من أي تعديل قانوني حصل في السنوات الأخيرة

1- القرار اتعمل عشان صحة اللاعبين.. لكن الاعتراضات بدأت بدري!

قبل انطلاق البطولة فيفا أعلنت إن كل مباراة هيكون فيها استراحة مياه لمدة 3 دقائق في كل شوط بغض النظر عن حالة الطقس ودرجة الحرارة وبررت القرار بأنه لحماية اللاعبين من الإجهاد الحراري خاصة إن البطولة بتتلعب في أمريكا وكندا والمكسيك وبعض المدن معروفة بدرجات الحرارة والرطوبة العالية لكن بعد أول جولة تقريبًا بدأت الاعتراضات تظهر من اللاعبين نفسهم

• “فيرجيل فان دايك” قائد منتخب هولندا قال إن الفكرة ممكن تكون مفيدة لو الجو حر جدًا لكن مش منطقي تتطبق في كل المباريات بنفس الشكل حتى لو الطقس معتدل

• ونفس الكلام تقريبًا قاله “يوري تيليمانس” لاعب منتخب بلجيكا اللي أكد إن بعض المدن فعلًا محتاجة الاستراحة لكن فيه مدن تانية مفيش أي سبب يخلي المباراة تتوقف فيها

• “كيليان مبابي” قال: “بصراحة مش لازم نسأل اللاعبين عن رأيهم في الموضوع لأن آراءنا بتتغير طول الوقت.. لو فريقنا مسيطر على المباراة ومكسب ممكن الاستراحة دي تبوظ الإيقاع وتكسر النسق بتاعنا لكن لو الجو حر جدًا وقتها هبقى سعيد إنها موجودة”

وكمل كلامه وقال الناس دايمًا بتعترض على أي قوانين أو أفكار جديدة في البداية عشان كده لازم نستنى ونشوف الموضوع هيمشي إزاي خلال البطولة كلها قبل ما نحكم عليه بشكل نهائي”

2- الجماهير دخلت على الخط

الانتقادات ماوقفتش عند اللاعبين.. في أكتر من ملعب بدأت الجماهير تطلق صافرات الاستهجان أول ما الحكم يعلن عن استراحة المياه خصوصًا في المباريات اللي اتلعبت داخل ملاعب مكيفة أو في أجواء مريحة نسبيًا.

والموضوع زاد أكتر لما خبراء طقس أكدوا إن عددًا من المباريات اللي شهدت استراحات مياه ماكانش فيه أي مبرر مناخي حقيقي لإيقاف اللعب خلالها.

وده خلّى ناس كتير تسأل إذا كانت الحرارة مش السبب في كل المباريات يبقى ليه الإصرار على تطبيق القرار بشكل موحد؟

3- استراحة مياه ولا استراحة إعلانات؟

هنا بدأت واحدة من أكبر موجات الانتقاد.. تقارير إعلامية كشفت إن شبكات البث التليفزيوني بتحقق مكاسب ضخمة من الدقائق الإضافية اللي بتوفرها استراحات المياه.

ووصل الأمر لدرجة إن بعض اللاعبين اتكلموا بشكل مباشر عن النقطة دي.. أليستير جونستون لاعب منتخب كندا قال إن استراحة المياه بقت أقرب لفاصل إعلاني منها لاستراحة رياضية.

وكمان عدد كبير من الجماهير اشتكى من إن بعض القنوات كانت بتقطع البث وتعرض إعلانات أثناء فترة التوقف وده أثر على تجربة المشاهدة وخلى ناس كتير تحس إن كرة القدم بدأت تتحول لمنتج ترفيهي أقرب للرياضات الأمريكية.

وبحسب تقديرات إعلامية الإعلانات المرتبطة بفترات التوقف ممكن تحقق مئات الملايين من الدولارات خلال البطولة وده زود الشكوك حوالين الدوافع الحقيقية للقرار.

4- المدربين لقوا فرصة ذهبية

بعيدًا عن الجانب التجاري المدربون كانوا من أكتر المستفيدين من القرار.. اللي المفروض يكون استراحة لشرب المياه اتحول في أوقات كتير إلى اجتماع تكتيكي مصغر داخل الملعب.

مدرب منتخب سويسرا مراد ياكين اعترف بصراحة إنه استنى استراحة المياه التانية في مباراة البوسنة عشان يعمل تغييراته وقال إن التوقيت ده منحه أفضلية لأنه خلى المنافس مايعرفش يرد بسرعة على التعديلات اللي عملها.

وبالفعل سجل المنتخب السويسري أربعة أهداف بعد التوقف ونجح في حسم المباراة لصالحه أما رودي جارسيا مدرب بلجيكا فاعتبر إن الاستراحة دي فرصة مهمة جدًا للمدربين عشان يوصلوا تعليماتهم للاعبين.

وكمان ديدييه ديشامب مدرب فرنسا أكد إنه استغل فترات التوقف في تعديل بعض الأمور الفنية والتكتيكية أثناء المباريات في المقابل جاري نيفيل لاعب اليونايتد السابق انتقد الوضع بشدة وقال إن المدربين بقوا يستخدموا لوحات وشاشات تكتيكية خلال التوقفات وإن المباريات بدأت تتحول عمليًا إلى أربعة أشواط بدل شوطين.

5- استراحة المياه أثرت على سير المباريات

من أكتر الانتقادات اللي اتوجهت للقرار إنه بيقتل نسق المباراة.. في كرة القدم أحيانًا فريق بيكون مسيطر أو داخل في حالة حماس كبيرة وفجأة تيجي استراحة المياه فتقطع الإيقاع بالكامل.

وده حصل في أكتر من مباراة خلال البطولة.. منتخب كوراساو مثلًا كان نجح في العودة أمام ألمانيا لكن بعدها مباشرة جات استراحة المياه واستغل الجهاز الفني الألماني التوقف لإعادة ترتيب الفريق قبل ما تنتهي المباراة بفوز ألماني كبير.

وفي مباريات تانية اشتكى لاعبين ومحللين من إن التوقفات غيرت شكل المواجهات ومنحت بعض الفرق فرصة لإعادة تنظيم صفوفها في توقيتات حساسة.

6- إنفانتينو يرد على كل الانتقادات

وسط كل الجدل ده خرج جياني إنفانتينو رئيس الاتحاد الدولي لكرة القدم للدفاع عن القرار وأكد إن استراحة المياه “مسألة رياضية بحتة” وإن فيفا ما بتحققش أي أرباح إضافية بسببها لأن العقود التجارية الخاصة بالبطولة كانت متوقعة وموقعة قبل انطلاق كأس العالم بوقت طويل.

إنفانتينو شدد كمان على إن الهدف الأساسي هو حماية اللاعبين خلال بطولة طويلة ومرهقة ممكن بعض المنتخبات تلعب فيها 8 مباريات خلال أقل من 40 يومًا وقال إن تطبيق الاستراحة في كل المباريات هدفه تحقيق العدالة بين جميع المنتخبات.

ومن وجهة نظره ماينفعش مدرب يستفيد من فرصة إضافية لإعطاء التعليمات بسبب ارتفاع الحرارة في مباراة معينة بينما مدرب تاني مايحصلش على نفس الفرصة في مباراة أخرى.

7- الجدل مستمر

رغم دفاع فيفا مازال الجدل مستمر بقوة فيه فريق شايف إن القرار مهم لحماية اللاعبين والحفاظ على صحتهم في بطولة بتتلعب في ظروف مناخية صعبة، وفيه فريق تاني مقتنع إن استراحة المياه فتحت الباب أمام الإعلانات الزائدة والتدخلات التكتيكية وأثرت على متعة اللعبة وإيقاعها.

ومع دخول البطولة مراحلها الحاسمة يبدو إن ملف استراحة المياه هيظل واحد من أكتر الملفات سخونة في مونديال 2026 وقد يكون من أول القرارات اللي هتخضع للمراجعة والتقييم بعد إسدال الستار على البطولة.