إزاي ممكن تمرين كرة اليد.. يفيد حراس مرمى القدم؟

في مدربين كتير خصوصًا  في أوروبا بيحطوا كرة اليد جوه برنامج تدريب حراس المرمى مش عشان يبقوا “لاعبين هاندبول” لكن عشان في حاجات كتير الرياضتين دول بيشتغلوا فيها على نفس العضلة والمهارة.. هنا هنحاول نفكك الموضوع من خلال شوية مصادر اتكلمت في النقطة دي.

الحكاية الأساسية

أول حاجة بتربط بين الرياضتين هي تنسيق العين مع اليد.. موقع “فانيا راديتش” المتخصص في تدريب حراس الهاندبول بيقول إن التنسيق ده اللي هو تعاون بين العين والمخ والعضلة بينتقل بسهولة بين رياضات مختلفة يعني الحارس اللي بيطور المهارة دي في الهاندبول ممكن يستفاد منها في أنشطة تانية. 

ومع إن سرعة الكرة في الهاندبول بتوصل لأكتر من 100 كم/الساعة فالتدريب على استقبالها بيدي الحارس شغل مركّز جدًا على تقليل زمن رد الفعل وده بالظبط اللي حارس الكورة محتاجه وهو بيتابع مسار الكورة في اللحظة الأخيرة.

 وفيه دراسة منشورة على موقع PubMed العلمي قارنت التحسس اللمسي وتنسيق العين واليد عند لاعبين من رياضات مختلفة زي كرة السلة واليد والطايرة وكرة القدم والألعاب القتالية.. وطلع إن الرياضات اللي بتعتمد على الطرف العلوي بشكل مباشر زي الهاندبول بتنمي فعلاً حساسية اليد وتنسيقها مع العين بشكل أوضح من غيرها.

سرعة رد الفعل والانعكاسات

كمان فيه دراسة منشورة على قاعدة الأبحاث الطبية NCBI اتعملت على 40 لاعب هاند بول محترف مقارنة بـ50 شخص مش بيتمرنوا ولقت إن اللاعبين عندهم زمن رد فعل وزمن حركة أسرع بشكل واضح من غير المتمرنين وده بيرجع لطبيعة اللعبة اللي محتاجة قراءة سريعة لمسار الكرة والتصرف فورًا.

 وفيه دراسة تانية حديثة على نفس القاعدة العلمية بتستخدم تكنولوجيا زي الأنظمة الضوئية التفاعلية عشان تحسن نفس مهارة الاستجابة البصرية الحركية عند لاعبي الهاندبول الناشئين وده نفس المبدأ اللي بيتبع في تدريب حراس الكورة بالكرات الصغيرة وتمارين رد الفعل.

وموقع تدريبي متخصص اسمه “تيم ستاتس” بيقول إن استخدام كرات صغيرة زي كورة التنس أو كورة الهاندبول بيرفع مستوى الصعوبة لأن الهدف الأصغر محتاج تنسيق أدق وانعكاس أسرع وده سبب إن مدربين كتير بيدخلوا كورة اليد كأداة تدريب مش كبديل كامل.

القوة الانفجارية والحركة الأفقية

نقطة تانية مهمة هي القفز والحركة الانفجارية.. موقع “ساينس فور سبورت” المتخصص في اللياقة الرياضية بيشرح إن فيه دراسة على لاعبين محترفين في الهاندبول برنامج بليومتري (تمارين قفز انفجاري) بشكل أفقي حقق تحسن أكبر في مهارات زي تغيير الاتجاه والتسارع مقارنة ببرنامج بليومتري رأسي بس.. وحارس المرمى محتاج قوة انفجارية أفقية عشان يوصل للزوايا في وقت قصير فالمبدأ ده بيطبق عليه.

دراسة تانية منشورة في مجلة علمية متخصصة عملها باحثون على حراسة الهاندبول من الصفوة في رومانيا لقت إن تدريبهم المتخصص أدى لتحسن ملحوظ في اختبارات القفز وسرعة رد الفعل وده بيأكد إن مركز الحراسة في الهاندبول نفسه بيبني عناصر بدنية قريبة جدًا من اللي محتاجها حارس الكورة.

إزاي بيطبق عمليًا

مدرب متخصص في تدريب حراس المرمى كتب على موقعه إن فيه مدربين حراس مرمى بيستخدموا لعبة هاندبول مصغرة كتمرين جماعي عشان يدربوا الحارس على “التحكم في منطقة جزاءه” والتواصل مع الفريق والتحرك من غير الكورة.. وإن اللعبة بتحط الحارس في موقف دفاعي مستمر شبيه بالمرمى لكن بقواعد مختلفة شوية بتخليه يفكر بسرعة أكبر.

ببساطة كرة اليد فعلاً ليها فايدة لحارس مرمى القدم.. خصوصًا في سرعة رد الفعل وتنسيق العين واليد والقفز الانفجاري.. واللي اتأكد بالدراسات  لكن لازم يستخدم في السياق الصح كتمرين مساعد جنب التدريب المتخصص.. مش كبرنامج قائم بذاته.