إزاي تتعامل مع الناس قليلة الذوق؟
الناس الوقحة حوالينا في كل مكان، مدرسة أو جامعة أو شغل أو حتى معارف وقرايب، وهي جزء من الطبيعة البشرية ومن زمان جدا، وفي نفس الوقت إحنا مش هنربي الناس على كَبر ولا عايزين حد يستفزنا ويخلينا ننزل لمستوى الناس قليلة الذوق، ولذلك في أساليب ذكية تقدر تتعامل بيها مع الأشخاص الوقحة:
- متخليش شخص قليل الذوق يدفعك إنك ترد بنفس أسلوبه، حاول تتعامل بلطافة وبرود، أحيانا الموضوع بيكون صعب ولكن أنت كدة بتديهم زي مثال على الهدوء والأدب، لقيتهم استمروا في قلة الذوق فا دي حاجة تخليك تفخر إنك منزلتش لمستواهم وحافظت على هدوءك وثباتك.
- اتكلم مع الناس قليلة الذوق عن سلوكهم.. يعني هل هما مدركين أفعالهم؟ لو مش مدركين واعتذروا يبقى خير وبركة، لإن مفيش أي شخص مُطالب إنه يستحمل وقاحة الناس اللي حواليه، ولذلك متسحمش لأي شخص يعاملك بشكل غير لائق.
- أحيانا أسلم رد على الوقاحة هو إنك تسكت أو تمشي عشان تتجنب المزيد والمزيد من السلوك الوحش، يعني لو الشخص ده بيتكلم بيتكلم قوم وسيبه أو بطل ترد على رسائله، وده بعدين هيفهم إن قلة الذوق معاك مش بتنفع ومش بتوصل لحاجة معاك وغالبا ممكن يحسنوا أسلوبهم معاك في المرات الجاية.
- لو فشلت في حل المشكلة، يبقى أسلم حل هو تجنب الشخص الوقح، يعني أنت كلمته أكتر من مرة وبقى مدرك أفعاله ولسا مستمر فا نقدر نقول إن الشخص ده عنده مشكلة في التعامل معاك ومع الناس ولما بتبعد عنه أنت وكل اللي حواليك ممكن يكون ده زي جرس إنذار أخير للشخص إن محدش طايقه بسبب أسلوبه الفج مع الناس.
