ليه ممكن حد قريب يبعد عنك فجأة ؟
حصل معاك قبل كده إنك لقيت حد قريب منك بيبعد وبيخرج من حياتك فجأة وبدون مقدمات، لو حصل يبقى تعالى كمل معانا الموضوع ده، إنما لو ماحصلش روح ولا أقولك كمل معانا برضه ماحدش ضامن يمكن يحصل معاك كده فتبقى أمنت نفسك برضه
أولًا ليه الناس ممكن تبعد فجأة؟
ده بيحصل لأسباب كتير أوي وكل حالة وليها ظروفها زي ما بيقولوا بس في قواعد واضحة وبديهية لو حصلت هتقدر تلاقي السبب
زي إن Easy Come Easy Go أو بالبلدي اللي بييجي بسرعة بيروح بسرعة، يعني العلاقة اللي هتلاقيها تطورت بسرعة وشخص دخل حياتك بسرعة وفي وقت صغير بقى بيشاركك كل حاجة إعرف إن زي ما القرب ده حصل بسرعة فكمان البعد ممكن يحصل بنفس السرعة.
غياب الأرض المشتركة اللي جمعتكوا، وده بيحصل مثلا مع ناس اتعرفت على بعض عشان كانوا مع بعض في الجامعة أو في الشغل وساكنين قريب مثلًا فبيقضوا وقت طويل مع بعض فبالوقت اتعودوا على وجودهم اليومي في حياة بعض بحكم الظروف المتشابهة، أساس العلاقة دي بيبقى إن الطرفين واقفين على أرض مشتركة مع بعض، فلو حصل وظروف حد منهم اتغيرت هيبعد بشكل بالتدريج لأن مابقاش في اساس تاني يجمعكوا
الانبهار ساعات بيبقى هو الدافع لبعض الناس إنهم يقربوا منك بيبقوا شايفينك مبهر من بعيد ونفسهم يعرفوك عن قرب، وبعد ما بيقربوا ويعرفوك عن قرب ويتعودوا عليك الإنبهار ده طبيعي يقل، وهيبدأوا ينسحبوا تدريجيًا لشخص مبهر جديد ويكرروا نفس الحكاية
فقبل ما تاخد الموضوع على قلبك وتبدأ تفكر ليه حصل معايا كده وهو أنا عملت إيه، قيم العلاقة كده وبص عليها من بعيد شوف هي بدأت إزاي وليه يمكن يكون سبب من الأسباب اللي فوق دي وتقدر تفهم من غير ما تسحل مخك في تفكير
لو مالقتش أي سبب من اللي فاتوا دول يبقى خلينا ندخل في المستوى اللي بعده، وهو دواخل الشخص التاني ده نفسه آه زي ما قريت كده دواخل، كلنا عندنا نقط ضعف أو Insecurities عادة مش بنصرح بيها وبتبان في نص الطريق، حاجة من الحاجات دي بتبقى إن الشخص ده يكون تعرض لخذلان كتير في حياته من ناس كانت قريبة فبمبدأ “اللي اتلسع من الشوربة ينفخ في الزبادي” بيقرر يبعد قبل ما إنت اللي تبعد عنه حتى لو إنت مش هتعمل ده بس هو بسبب خوفه وخبراته السيئة بيبقى ده الشعور المسيطر عليه واللي بيحركه ويخليه يبعد فجأة ومن غير ما يوضح ولا يقول أسباب
لو اللي قدامك عارفك أوي وقاريك وحبيت تحور لأي سبب مش هتحب يبقى الشخص ده موجود لأنك هتحس إنك مقفوش قدامه، ده بالضبط اللي بيحصل مع ناس كتير
بيبقوا عايزين يغلوشوا على حاجة يهربوا من حاجة يوصلوا للناس اللي حواليهم حاجة، وطول ما الشخص اللي قاريهم وعارفهم ده موجود بيبقوا حاسين إنهم مقفوشين ومفضوحين ومش بيرتاحوا غير لما بيبعدوا عنه
الأسباب دي كلها مش عشان نقول إن الشخص اللي بيبعد فجأة ده مش غلطان، لأ هو أناني وجبان لأنه مواجهش وقرر يجري من غير ما يتحمل نتيجة قراره ده
بس الأسباب دي عشان قبل ما تقرر تسحل نفسك في دوامة ليه بيحصل معايا كده، وأنا عملت إيه تعرف إنه مش إنت اللي عملت والمشكلة مش فيك ولا عندك عشان تتعب نفسك في البحث عن حلول، وفي نفس الوقت يمكن الأسباب دي تديك مبرر يخلقلك عذر للشخص ده لو قرر في يوم يرجع وفكرت وكان عندك القدرة إنك تسامحه
خلاصة الكلام، مش من حق حد إنه يطلعك سابع سما بعدين يرميك لسابع أرض ويطلع يجري، ومش من حق حد يشككك في نفسك بإنه يجري ويسيبك فجأة من غير ما يشرح أو حتى يمهد، بس حق نفسك عليك إنك تفهم وممكن الكلام ده يكون سبب لأنك تفهم، عشان لما هتفهم هتقدر تسامح أو هتقدر تتخطى وتكمل.. حسب إختيارك ورصيد الشخص ده عندك!
