أجسام طائرة مجهولة على مر التاريخ

من زمان وبنشوف في أفلام الخيال العلمي والكارتون أجسام مجهولة بتنزل من السماء وأحيانًا كمان بيكون جواها كائنات غريبة وبتكون نازلة تدمر الأرض.. أو تنهي العالم كله.. وده بيخلينا من زمان خايفين من الأجسام المجهولة ومش عارفين هي حقيقية فعلا ولا لا.. عشان كده هنقولك في الموضوع ده قصص الـ (UFO) أو الأجسام الطائرة المجهولة واللي بنسميها الأطباق الطايرة.

انتشرت ظاهرة الأطباق الطايرة خصوصا في أمريكا من زمان بسبب إن في عدد من الطيارين الأمريكان قالوا إنهم شافوا أجسام غريبة أو رصدوها خلال استطلاعاتهم
وسنة 2017 م نشرت “نيويورك تايمز” موضوع عن وزارة الدفاع الأمريكية بيقولوا فيه إن عندهم مقاطع فيديو بتوثّق مشاهدات طيارين أمريكان لأجسام بتظهر وتختفي.. وقالت القوات المسلحة الأمريكية أن مقاطع الفيديو كانت حقيقة لكن لسه ماتمش تفسيرها..

وفقا لموقع BBC  الكونجرس الأمريكي طالب وزارة الدفاع الأميركية بتقديم تقرير عن تقييمها للأجسام الطايرة المجهولة من خلال متابعتهم ليها.. وفعلا وكالة ناسا شكّلت لجنة مكونة من علماء مختصين وبدأوا يبحثوا عنها..
وقال رئيس اللجنة: إن البيانات الموجودة دلوقتي وكلام الشهود عنها لوحدها مش كافية للوصول لدليل عن أصل الظواهر .. وقال كمان إنهم محتاجين بيانات دقيقة أكتر عشان يقدروا يفهموا الظواهر وحتى لو تم جمعها مفيش ضمانات إنهم يفسروا كل الأجسام الغريبة اللي تم التقاطها..

ووفقًا لموقع listverse.. دي مشاهدات لأجسام طائرة مجهولة اتبلغ عنها

1- سنة 1947م في واشنطن.. قال طيار إنه شاف جسم غريب وسريع جنب جبل رينييه بواشنطن وتعتبر دي أول مشاهدة لجسم غريب تنتشر وكان في اهتمام عالمي بيها وقتها.. وقال الطيار إنه شاف حوالي 9 أجسام بتتحرك بسرعة كبيرة وقال إنها كانت شبه القرص المعدن.. وفعلا حقق سلاح الجو وقتها لكن ماقدروش يعرفوا كانت إيه.. ورجحوا إنها ممكن تكون مجرد حاجات من صنع الإنسان.

2- سنة 1948م.. طيار أمريكي كان سايق طيارته في رحلة تدريبية.. لكن لاحظ وجود جسم غريب.. في الأول افتكره منطاد أو طائرة تجريبية لكن لما قرب منه لقى كرة من الضوء متوهجة جدا وبتتبع طيارته وفضلت لازقة فيها.. واتقسمت النظريات إنها ممكن تكون جسم من خارج الأرض أو مجرد ظاهرة جوية أومجرد حدث طبيعي.. والبعض قال إنها تجربة حكومية سرية.

3- سنة 1951م.. وقت الحرب الكورية مجموعة مكونة من 20 جندي أمريكي كانت متمركزة في تشوروون بكوريا الشمالية.. شافوا حاجة مش عادية في السماء.. وقالوا إنه جسم بحجم العربية.. وقالوا إنهم حسوا إنهم تعبوا بعد ماشافوا الجسم ده.. وكالعادة برضو ماتمش تفسير الموضوع.

4-سنة 1952م في فلوريدا.. فرقة كشافة شافت جسم غريب.. وقالوا إنه كبير وطالع منه ضوء قوي.. وقال قائد الكشافة وقتها إن الجسم اتحرق وسببله عمى مؤقت بسبب شعاع الضوء بتاعه.. وبرضو كان في كذا تفسير ولحد دلوقتي ماحدش يعرف الجسم ده كان عبارة عن إيه.

5-سنة 1952م في إنجلترا.. تم التبليغ عن جسم فضي على شكل قرص بيلف في السماء لحوالي 20 دقيقة ويقال إن في أشخاص في مناطق مختلفة في إنجلترا شافوه وكمان طيارين سلاح الجو الملكي.. وبعدها حققت وزارة الدفاع البريطانية في الموضوع لكن مقالوش أي تفسير.. وفي اليوم اللي بعده الجسم حجمه بقى أكبر واستمر وجوده كذا يوم.. وفي نظريات قالت إنه مركبة فضائية ونظريات تانية قالت إنه مشروع حكومي سري ولحد دلوقتي ماحدش برضه يعرف ده كان إيه!

6- سنة 1980م في إنجلترا.. مجموعة من القوات الجوية الأمريكية بلغت عن أضواء غريبة في غابة رندلشام البريطانية.. وقالوا إنهم شافوا جسم طائر.. والناس اتقسمت في تفسيرها في ناس قالت إنها كدبة وناس تانية قالوا إنه سوء تفاهم وغيرهم قالوا إنهم ناس جايين من برة كوكب الأرض.. لكن في بعض التفسيرات بتقول إن في حاجة مش طبيعية حصلت في الغابة اليوم ده!

7- سنة 2004 م في سواحل كاليفورنيا.. رصد طيارين البحرية الأمريكية أجسام غريبة وحصلت بينهم مواجهة اتعرفت باسم حادثة حادثة “Tic Tac UFO” لأنها شبه اللعبة ..
وبدأت الحادثة لما اكتشفت السفينة “يو إس إس برينستون” -وهي سفينة مزودة بنظام رادار متطوّر- أجسام طائرة مجهولة بتتحرك بسرعة كبيرة ولونها أبيض وطولها حوالي 12.2 متر .. ووقتها بعتوا طيارين عشان يعترضوا الجسم ده لكن لقوا إن الأجسام كانت عندها وسائل دفع مرئية.. وبتقدر تغير سرعتها واتجاها.. وقدرت تختفي من قبل ما يشوفوها من قريب.. والحادثة عملت جدل كبير وقتها وفي ناس قالت إن الأجسام جاية من برة الأرض.

8-سنة 2006م في مطار شيكاغو أوهير الدولي .. بلغ 12 موظف عن رؤيتهم لمركبة على شكل طبق معدن فوق بوابة المطار.. وبعض الطيارين شافوه.. لكن الجسم ماظهرش على الرادار.. وبعدها اختفى فجأة.. وإدارة الطيران الفيدرالية حققت في الحادثة ومالقوش تفسير واضح واقترحوا إنها مجرد ظاهرة جوية.. لكن الشهود أكدوا إنهم شافوا جسم غريب.

ووفقًا لموقع BBC.. وكالة ناسا قالت في جلسة نقاش ليها في 2023.. إنها درست 800 تقرير عن حالات مشاهدة لأجسام طائرة على مدى عشرات السنين.. ولقت اللجنة أن نسبة صغيرة جدا من الحوادث دي ممكن اعتبارها مجهولة أو مالهاش تفسير .. وقال مدير المكتب المختص بمتابعة الظواهر الغريبة في وزارة الدفاع الأمريكية واللي شارك في نقاشات ناسا: “أن نسبة صغيرة جدا من ظاهرة الأجسام الجوية UAP يمكن اعتبارها غير مفسرة ومحيرة.. أما غالبية الأجسام التي وردت إلى مكتبنا أظهرت خصائص غير مثيرة تشير إلى أنها مرتبطة بمصادر يمكن تفسيرها”..

وعلى الرغم من كل الآراء المختلفة دي لكن لحد دلوقتي مفيش أي تفسيرات قاطعة لأي واحدة من الظواهر اللي حصلت.