8 نصائح للأبهات والأمهات.. إزاي تساعد الأطفال على الصيام لأول مرة؟

أول صيام في حياة الطفل بيكون لحظة مميزة له ولعيلته.. فرحة وحماس وأسئلة كتير.. وفي نفس الوقت فيه صعوبة لو الطفل حس إنه مجبر أو مش مستعد.. وده بيخلي دور الأب والأم مهم جدًا في تحويل أول تجربة صيام لطفلهم لذكرى وعادة جميلة يفتكرها طول عمره. عشان كده جمعنالكم شوية نصائح هتفيدكم في الموضوع ده:

1- ابدأ بالتدريج: خلي الطفل يبدأ بصيام ساعات قليلة في اليوم.. زي الصيام لحد الظهر أو العصر وبعدها يزوّد بالتدريج كل ما يكبر ويكون قادر.

2- اشرح له فوائد الصيام: وإننا بنسمع كلام ربنا عشان يحبنا.. واحكي له عنه كعبادة مش مجرد امتناع عن الأكل والشرب بس.. لكن علاقته بالصبر والتحكم في النفس ومساعدة الفقراء.. وممكن ده نحكي له في شكل قصص.

3- شارك طفلك الأجواء الرمضانية: اشركه في تجهيز الزينة وشراء التمر أو السوبية أو حتى اختيار الفطار.

4- حفز طفلك: ممكن كمان تعمله جدول إنجاز يعلّم فيه على الأيام اللي صامها.. وتعمله مكافأة لما يصوم وتجيبله حاجة بيحبها.. ولو عنده إخوات أكبر ممكن يشجعوه.

5- خليك قدوة: الأطفال بيحبوا يقلدوا وتصرفاتهم بتكون مكتسبة من اللي بيشوفوه زي ما احنا عارفين.. فهو هيتعود على الصيام لو شافك صبور وفرحان مش متذمر ومتعصب طول الوقت عشان مايحسش إن الصيام تكدير.

6- اختيار الأكل اللي يساعده على الصيام: قلل له الحلويات والأكل اللي بيخليه يحس بالجوع بسرعة ودربه عليه قبل رمضان.. وفي الصيام شجّعه على شرب مياه كفاية وتناول أكل صحي في السحور يساعده على تحمل الصيام.. 

7- اشغل وقته بأنشطة ممتعة: الصيام هيكون أسهل لو انشغل بالرسم.. اللعب.. أو حتى مساعدة في تحضير الإفطار.

8- لو حس بتعب شديد: شجّعه يفطر وما تحسّسوش إنه فشل ولا تعنفه..

وفكره دايمًا إن الصيام تدريجي.. وإن ربنا بيحب المحاولة.

وفي النهاية خلي تجربة الصيام الأول تكون مليانة دعم وحب وانبساط عشان الطفل يربطها بذكريات جميلة.. مش تعب وإجبار.. وفي الآخر كله عشان عيون النونو.