إزاي الستات والرجالة بيحكوا نفس القصة بس بطريقة مختلفة؟
“يومك كان عامل إيه النهاردة؟” سؤال واحد بس طريقة الرد عليه مختلفة لو سألته لست عن لو سألته لراجل.. الست هتحكي يومها بكل التفاصيل اللي فيه وممكن تاخدلها ساعتين بتتكلم… الراجل هيرزع واحدة “تمام الحمدلله”.. وهنا السؤال “هي الست رغاية؟” ولا الراجل هو اللي كارف؟ ولا حاجة تالتة خالص؟
فيه شوية أسباب بتوضح ليه الراجل بيختلف عن الست في طريقة حكي أي قصة:
1- تأثير النوع الاجتماعي على طريقة السرد
الكاتبة ديبورا تانين في كتاب “You Just Don’t Understand: Women and Men in Conversation” اتكلمت عن إزاي اختلاف الجنس بيأثر على طريقة الكلام وإن الستات بطبيعتها بتركز على التفاصيل العاطفية والعلاقات في أي قصة بتحكيها.. أما الرجالة بيميلوا إنهم يحكوا الموضوع بشكل مباشر ومختصر من غير تفاصيل كتير
2- الست بتقدر تشوف ما وراء الإيماءات
حسب موقع Psychology Today الأبحاث وضحت شطارة الستات في قراءة وفهم أي إشارة مش لفظية وقدرتهم كمان إنهم يستجيبوا للإشارات دي أحسن من الرجالة.. وفيه دراسة في جامعة هارفارد اتعملت عشان تحلل الاختلاف بين الجنسين في تحليل أو معرفة أي سلوك مش لفظي.. فكانت النتيجة إن الستات تفوقت على الرجالة في فهم الرسالة اللي بتوصلهم من خلال بس تعبيرات الوش وحركة الجسم والصوت.. وده بيبان في قدرة الستات على فهم تعابير وشوش أطفالها الرضع.. وده بيخليهم يقدروا يحكوا ويعبروا عن المشاعر اللي حسوها من الأحداث بتفصيل كبير.. وكون الرجالة منطقيين وبيحللوا المواضيع أكتر فهما بيقدروا يحكوا بشكل حيادي بعيدًا عن مشاعرهم تجاه القصة اللي بيحكوها
3- تأثير البيئة الاجتماعية اللي موجودين فيها على كل حد منهم
تربية البنت أو الولد في صغرهم بتأثر بشكل كبير على طريقة تعبير كل حد فيهم.. فمثلًا الآباء بيركزوا على مشاعر زعل البنت أكتر من الولد كونها حساسة.. ونتيجة ده البنت بتكبر وهي قادرة تفهم وتنظم مشاعرها أحسن من الولاد فبتقدر تعبر بسهولة وسلاسة.. وطبعًا ده شئ مش معمم لأن طرق التربية مختلفة من بيت للتاني
4- الاختلافات بينهم في الذاكرة
فيه دراسة اتنشرت في جريدة “ديلي ميل” بتقول إن الستات عندها طلاقة في الكلام وبيحكوا بالتفصيل عشان ذاكرتهم أحسن من الرجالة فبيعرفوا يعبروا عن اللي بيحكوه بشكل أفضل.. وإن الستات بتقدر تلاقي الكلمات اللي عاوزة تعبر عنها وتفتكرها بسهولة
ودراسة تانية اتنشرت في مجلة “Journal of Cognitive Psychology” اتكلمت عن اختلاف الرجالة والستات في طريقة تذكرهم لذكرياتهم الشخصية ولقت إن الستات بيميلوا إنهم يربطوا ذكرياتهم بالعلاقات الاجتماعية بتاعتهم.. فيقولوا “كنت مع صاحبتي لما حصل كذا” لكن الرجالة بيركزوا على فكرة الفردية وإنهم عملوا الحاجة بنفسهم أو لوحدهم
في الآخر الست والراجل من عوالم مختلفة.. كل حد فيهم ليه طريقته.. والاختلاف عمره ما كان مشكلة لأنه شئ طبيعي.. لكن المشكلة الحقيقية هي غياب اللغة المشتركة بينهم اللي محتاجينها عشان يتواصلوا ويكونوا على أرض ثابتة سوا.. فحاول إنك توصل لأرض مشتركة دايمًا عشان ده هيسهل عليك حاجات كتير أوي
