لو مابتحبش تشرب لبن.. دي مشروبات فريش فيها لبن بس مش هتحس بطعمه

وانت صغير كنت بتهرب من ماما في حالتين وقت المذاكرة ولما تيجي تديك كوباية اللبن الطويلة عشان تشربها.. ولو كرهك للبن عشان ريحته أو طعمه اللي بتقول عليه “كأني بشرب جاموسة” فدي شوية مشروبات فريش تقدر تعملها وتدخل فيها اللبن من غير ما تحس بطعمه بس هتاخد فايدته وكمان هيرطب عليك في الحر

ميلك شيك/ Milkshake

مش محتاج غير شوية لبن وبولة آيس كريم وكيس كريمة خفق وأي فاكهة من اللي بتدغدغ رجلك لما بتقع من الفريزر ولو طالبة معاك بعزقة فلوس جيب شوية سبرينكلز وحطها على الوش

آيسد ماتشا لاتيه/ Iced matcha latte

جيب شوية ماتشا ودوبهم مع مياه سخنة وبعدها حط لبن وحليه بعسل أو سكر زي ما تحب.. كل ده بقى يتحط في كوباية كلها تلج عشان يرطب عليك 

كاكاو باللبن

أهو ده المشروب اللي يتقال عليه إن حاجته بسيطة وموجودة في كل مطبخ مصري.. هما شوية كاكاو مرميين في رف التلاجة جنب دوا الكحة وهات شوية لبن ودوب الكاكاو مع السكر في اللبن ولو عاوز تلج حط.. أظن مفيش أسهل من كده 

آيسد كوفي/ Iced coffee

هات شوية قهوة أو إسبريسو دوبهم في ماية وحط لبن وشوية تلج

عصير ليمون برازيلي

هتحتاج 4 أو 5 ليمونات بس الليمون الأخضر وقشره وحطه في الخلاط مع مياه وتلج وبعدها صفيه.. ورجعه تاني للخلاط وحط عليه لبن محلى مكثف.. وممكن تبقى تضيف شوية نعناع أو فانيليا لو عاوز تخليه فريش أكتر

أي فاكهة باللبن

اللبن حبيب الفاكهة.. تضربه مع موز مايقولش حاجة.. مع جوافة مايضرش.. أو مع فراولة هيرطب الحر عليك وباقي أسرة الفاكهة الصيفي مش هتعترض معاه

تمر باللبن

مفيش أسهل من كام تمرة وشوية لبن وتعمل مشروب يسند معاك طول اليوم وكمان يديك مناعة

جرجير باللبن

لو انت صحي بقى خدلك حزمة جرجير اضربها في الخلاط مع شوية فانيليا وحط سكر أو عسل أبيض واللبن عليهم

وفي الآخر مالكش حجة لو ماشربتش لبن بعد كل المشروبات دي.. ومش هنقولك كلام دكاترة إن اللبن فيه كالسيوم والكلام ده بس هنقولك كلام ماما اللي دايمًا بيطلع صح وهو إنك لما هتكبر هتعرف إن اللبن هيفيد عضمك وهيفرق معاك في صحتك