بعد 20 سنة من ظهورها.. محطات في رحلة تطور المهرجانات من 2004 لـ 2024
![](https://theglocal.com/wp-content/uploads/2024/01/WhatsApp-Image-2024-01-16-at-12.00.08-PM.jpeg)
في البداية خلينا نتفق سواء بتحبها أو لأ.. بتسمعها أو لأ فا انت أكيد عندك خلفية ولو بسيطة عن أغاني المهرجانات أو عدت عليك في فرح في مناسبة في خروجة أو في المواصلات..و حتى من أصحابك والناس اللي حواليك
المهرجانات تعتبر لون في المزيكا ومعبر عن فئة كبيرة من الناس في أعمار مختلفة..
بيحتاج مجهود وشغل كتير عشان يطلع بشكل كويس ويشد الناس..
إيه هي المهرجانات؟
المهرجانات نوع من الأغاني الشعبي.. بدايته تقريبًا في مصر كانت سنة 2004 .. أول مهرجان في مصر كانت “مهرجان السلام” واللي اتعمل من مؤسسي النوع ده من الأغاني في مصر وهم فيجو وفيفتي..
المهرجانات بتعتمد على نوع مزيكا اسمه “التكنو” وده نوع مزيكا إلكترونية ظهرت في أوروبا في السبعينيات والتمانينيات والطبلة فيها بتبقى ظاهرة بشكل كبير
مميزاتها:
المهرجانات اللي خلالها تنتشر بسرعة إنها طالعة من الشارع وبتتناول مشاكل حقيقية للناس
زي غدر الصحاب والأحباب والمشاكل اللي الشباب بيواجهها في المجتمع عمومًا.. وبعد كل ده بترقص.. ودايمًا في أخرها بيكون في فقرة تحية واهداءات للصحاب والأهل وكل الحبايب.
التطور مع صناع المهرجانات:
على الرغم من إن تقريبًا بداية المهرجانات في 2004 إلا إنها بدأت تنتشر أكتر وقت ثورة يناير 2011.. وفضلت تاخد أشكال متنوعة وتطور وكل فترة كان ليها فريق أو شخص ظاهر أكتر من الباقي فخلينا نشوف مع بعض بالتدريج المهرجانات مشيت إزاي؟؟
فيجو وفيفتي
بيعتبر “أحمد فيجو” هو اللي عمل أول مهرجان بالتعاون “علاء فيفتي” وكان اسمه مهرجان “السلام” اللي لسه متكلمين عليه من شوية.. واتعمل في القاهرة لأن كالعادة في المزيكا وأغلب المجالات بيكون في تحدي اسكندراني – قهراوي وبنشوف نتيجة لده تطور وإنتاج حاجات قوية ليها طابع ملموس من كل محافظة.. زي الباتل راب أو ديس تراك في الراب.. وأخر أشهر مهرجان تقريباً عمله فيجو كان “شبح – أسد” وكان بالتعاون مع السادات العالمي في 2018 وده يعتبر نهايته في الانتشار بشكل كبير.. ولكن هو كان بدأ يختفي مع ظهور ناس تانية متطورة أكتر كلت مع الناس زي أوكا وأورتيجا وكمان المدفعجية والسادات.
الدخلاوية
هنا بداية التحدي بين القاهرة واسكندرية.. لما نزل أول مهرجان للدخلاوية اسمه “مهرجان الدخلاوية”
وده دخلهم في السكة مع فيجو وفيفتي بأول مهرجان اسكندراني يطلع للنور والدخلاوية كانوا “فيلو” اللي كان أشهرهم.. ومعاه التوني وشاعر الغية وساعات كان بيدخل معاهم ناس تانية .. من أشهر المهرجانات اللي عملوها كان “أسود الأرض” واللي كان في الجزء الأول من فيلم “أولاد رزق” في 2015.. وألبوم “شكل مشاكل”
فريق الأحلام
وبيتكون من 3 أشخاص أشهرهم زيزو النوبي ومعاه الشبح وبنوا.. ومن أشهر المهرجانات اللي عملوها كانت أم الحنة والحاكم والمحكوم والدخلاوية في أمريكا ودول بيقل قوتهم وانتشارهم مع نهاية 2017 تقريباً.
بس هنا لازم نقول حاجة مهمة عن تعاون حصل بين الدخلاوية وفريق الأحلام بين أشهر اتنين في الفرقتين وهم زيزو النوبي وفيلو في مهرجان “الديابة الستة” واللي يعتبر من أشهر المهرجانات ساعتها
السادات والمدفعجية
وفي الأول بدأوا مع بعض قبل ما يختلفوا وينفصل عنهم السادات.. والمدفعجية هم ديزل وشيندي وكنكا ودولسيكا.. ويعتبروا من أكتر الناس اللي شاركت بمهرجانات في الأفلام والمسلسلات منها أغنية مسلسل “بـ 100 وش “مليونير” في 2020.. وعملوا حاجات كتير مشهورة زي “يا مساء الاستغراب – الهلي بلي – أنا أصلا جن – الحالة جت من مسلسل خلصانة بشياكة – الأسود راجعة من ولاد رزق”.
أوكا وأورتيجا
عشان تظهر وتاكل الجو لازم تكون مختلف ستايل من مزيكتك وكلماتك وكمان شكلك وظهورك في اللبس والشعر وكل حاجة.. ” فرقة الـ 8%” واتعملهم فيلم بنفس الاسم في 2013
وكان معاهم شحتة كاريكا قبل ما ينفصل عنهم.. وبعدها أوكا وأورتيجا انفصلوا هم كمان في 2020
شحتة كاريكا
بدأ مع أوكا وأورتيجا ومن أشهر الحاجات اللي عملها كانت في فيلم الألماني مهرجان “حارة عجيبة”.. وأغنية الأفراح مهرجان “براويزة” اللي كان في 2017.. وبعدها عمل مع الصواريخ والدابل زوكش “إخواتي” في 2020.
حودة بندق وتيتو بندق
كانت بداية شهرته لما ظهر في مسلسل “الزوجة الرابعة” مع مصطفى شعبان في 2012
وبعدها تعاون مع “فيلو” ومع “حمو بيكا” ومع ” مسلم”.. غير الأغاني بتاعته لوحده
أغنية بحر شر
أغنية خطر
حسن شاكوش وحمو بيكا
حسن شاكوش بداية شهرته لما غنى مهرجان “أشكرك أوعدك” في 2013
وشارك بعدها في مسلسل الكبير بنفس الأغنية.. وكمل من بعدها وعمل مهرجانات زي “احنا بتوع ربنا”.. لكن الأغنية اللي عملت شهرته الحقيقية كانت “بنت الجيران” في 2019 مع “عمر كمال” واللي وصلت لأكتر من 648 مليون فيو على يوتيوب
حمو بيكا كانت بداية شهرته مع مهرجانات “أصحابي أخصامي” في 2018 و”شقلطوني في بحر بيرة” في 2019
وكان ليه أغاني مع حسن شاكوش زي “شمس المجرة” و “وداع يا دنيا وداع”.. قبل ما كل واحد فيهم يبدأ يشتغل لوحده أو مع ناس تانيين.
مسلم
بدايته كانت مختلفة لأنه كان بيغني وهو لابس ماسك وعمل وقتها أغاني كتير منها “قلبي عايز صرمة” اللي كانت في 2020
واتعاون مع حودة بندق في الأول لكنه عمل حاجات مع ناس كتير تانية منهم رضا البحراوي وكمان فيلو.. من أشهر أغانيه “لفينا الدنيا ” مع “رضا البحراوي” واللي كانت في فيلم البعبع
وليه أغاني كتير لوحده منهم “حتة تقيلة في البلد”
عصام صاصا وحمو الطيخا
الاتنين اشتغلوا مع بعض في الأول في مهرجانات زي
“ممنوع حد يقرب منك” في 2021
و “جرا إيه يا أفيونة” في 2022
غير الأغاني اللي لكل واحد لوحده.. “حمو الطيخا” عنده أغاني زي “العجلة بدأت تدور” في 2020
وفي الآخر” عصام صاصا” اللي بتعتبر أغانية في قوائم الأكتر استماعًا في منصات كتير.. في السنين الأخيرة.. يعتبر بدأ في 2018 بمهرجان “قالك تعيش هتشوف”
ومكمل لحد دلوقتي.. ومن أشهر أعماله “نص صيتو مني” و “كله سابني بقيت لوحدي”
و “مسا مني ليكو” وعمل حاجات مع الليثي وعنبه وكتير من المطربين سواء مهرجانات أو شعبي.
الأكيد إن في مهرجانات كتير اتعملت وناس اختفت بعد ما عملتها على طول يعني مجرد ظهور ومنها “مهرجان الخمس صحاب” و “مهرجان شحط محط” أو “مهرجان الدنيا شمال” أو “مهرجان مافيش صاحب بيتصاحب” .. مش لازم تكون أثرت بشكل شخصي على حد ولكن في ناس كتير لو سألتها وفكرتها بكلمتين من المهرجانات دي هيفتكروها بس ممكن مايفتكروش أصحابها!
المهرجانات لون فني زي أي لون فيه جيل بيسلم التاني وكل واحد بيشتغل فيه بيكسر الدنيا لمدة معينة وييجي حد تاني يجدد ويطور من الأسلوب أو يعمل حاجة مختلفة يقدر يخلي كل الناس تتابعه وتمشي على نفس أسلوبه.. وفي الآخر ” لولا اختلاف الأذواق لبارت السلع” فمش لازم كلنا يبقى ذوقنا واحد في اللي بنسمعه.