صامويل أدينيران.. من الدرجة الخامسة الألمانية لبطل تاريخي في دوري الأبطال

في عالم الكورة فيه لاعبين بياخدوا كل حاجة بسهولة من أول يوم بيدخلوا أكاديميات الأندية الكبيرة وهما لسه صغيرين ويطلعوا نجوم من غير ما يمروا بأي معاناة تُذكر.. لكن في المقابل فيه فئة تانية من اللاعبين رحلتهم بتبقى مليانة تعب وإحباط وانتقالات ما بين دوريات صغيرة ومغمورة وأحيانًا بتوصل بيهم اللحظة يفكروا فيها إن الحلم انتهى.

“صامويل أدينيران” من الفئة التانية دي ولحد النهاردة محدش كان يتخيل إن الراجل ده هيوصل لدوري أبطال أوروبا لأن مشواره كان أقرب لجولة سياحية في أضعف دوريات كرة القدم حول العالم بس القصة اتقلبت رأسًا على عقب في ليلة واحدة و”أدينيران” بقى بطل قومي لفريقه ومصدر فخر لكل حد بيتابع مشواره من البداية.

الميعاد اللي هيفضل في التاريخ

يوم 25 أغسطس 2026 فريق لاسك النمساوي كان قدام مباراة شبه مستحيلة.. الفريق كان خسر الذهاب قدام سلتيك الاسكتلندي 3-0 وفي الإياب بعد هدف مبكر من كالوم ماكجريجور بقى 4-0 يعني عمليًا الموضوع خلص.. لكن اللي حصل بعد كده كان جنون حقيقي.

رجع لاسك في المباراة بأهداف من “موسى أوسور” و”روبرت ليوبيتشيتش” وقبل النهاية بلحظات جه هدف “فلوريان فليكر” عشان يودي المباراة للوقت الإضافي وهنا ظهر البطل الحقيقي “أدينيران” سجل هدف في الشوط التاني من الإضافي عمل بريك على خطأ من مدافعين سلتيك وسدد من بره منطقة الجزاء وسجل الهدف اللي وصل بالنتيجة النهائية 5-1 لصالح لاسك وعلى المجموع 5-4 حتى إنه كان ممكن يسجل هاتريك لكن ركلة جزاء اتصدت من الحارس الفنلندي فيليامي سينيسالو.

النتيجة إن لاسيك حجز مكانه لأول مرة في تاريخه في دور المجموعات لدوري أبطال أوروبا وده يعتبر واحد من أكبر الانقلابات في تاريخ الملحق التأهيلي للبطولة.

بعد الهدف التاريخي، أدينيران احتفل بطريقة مميزة رفع قميصه وكشف عن تيشيرت تحته مكتوب عليه “يسوع هو الملك” في لحظة عبّر فيها عن إيمانه أمام الملايين اللي كانوا بيتابعوا المباراة.

رحلة من بيت في هيوستن لملاعب أوروبا

أدينيران مش لاعب طلع من العدم.. الراجل ولد وترعرع في هيوستن بتكساس ودخل أكاديمية “ستيفن جيرارد” في إنجلترا وهو لسه صغير بعدها راح لفريق شباب بيلينينسيش في البرتغال وبعدين ليجانيس بي في إسبانيا.

من هنا بدأت رحلة الإعارات اللي كانت أقرب لجولة في دوريات الدرجات الصغيرة.. تشاكاريتا في الدرجة التانية الأرجنتينية.. جوادالاخارا في الدرجة الرابعة الإسبانية.. كاستيون في الدرجة التالتة الإسبانية وبعدين نقلة غريبة لألمانيا لعب فيها في الدرجة الخامسة مع كيكرز إيمدن.. وبعدها الدرجة الرابعة مع أتلاس ديلمنهورست.

يعني الراجل لعب فعليًا في الدرجة الخامسة الألمانية أدنى مستوى ممكن يوصله لاعب طموح قبل ما يرجع لبلده يبدأ من جديد.

العودة لأمريكا والانطلاقة الحقيقية

رجوعه لأمريكا كان نقطة التحول.. لعب مع تاكوما ديفاينس في الدرجة التانية الأمريكية وبعدين انتقل لسان أنطونيو على سبيل الإعارة وفاز معاهم بلقب الدوري سنة 2022.. الأداء ده فتحله الباب لصفقة مع سانت لويس سيتي في الدوري الأمريكي الممتاز وبعدها لعب موسم مع فيلادلفيا يونيون قبل ما ينتقل لأوروبا تاني.

في بداية 2025 وقع أدينيران مع لاسك وساعد فريقه يحقق الدوري النمساوي (الدبل المحلي) وسجل 10 أهداف كانت تاني أعلى رصيد تهديفي في الفريق ودلوقتي بعد أقل من موسمين مع النادي بقى بطل تاريخي بعد ما قاد فريقه لأول مشاركة في دوري أبطال أوروبا على الإطلاق.

الراجل عنده 27 سنة ومسيرته اللي كانت ممكن تخليه ييأس ويعتزل بدري اتحولت لقصة إلهام حقيقية من بيت مدرسة في هيوستن لأكاديمية في إنجلترا لملاعب البرتغال وإسبانيا والأرجنتين وألمانيا ورجوعه لأمريكا ودلوقتي بطولة أوروبا الكبرى كل ده بيأكد إن الطريق مش لازم يكون مستقيم عشان توصل لحلمك.