برايتون.. إزاي نادي صغير بقى مصنع نجوم وبيكسب ملايين من بيع لاعيبته؟

برايتون في السنين الأخيرة مبقاش مجرد نادي بيحاول يثبت نفسه في الدوري الإنجليزي لكنه تحول لنموذج مختلف تمامًا في عالم كرة القدم لدرجة إن أندية أوروبا الكبيرة بقت تراقب طريقته في اكتشاف وتطوير اللاعبين.. النادي قدر يبني منظومة بتخليه يشتري لاعيبة بأسعار قليلة نسبيًا ويطورهم وبعدها يبيعهم بمبالغ ضخمة ويعيد استثمار الأرباح في لاعيبة جديدة.

والنتيجة إن برايتون بقى واحد من أكتر الأندية اللي حققت أرباح ضخمة من بيع اللاعبين خلال السنوات الأخيرة والقائمة بتكشف حجم التحول اللي حصل داخل النادي بداية من موسيس كايسيدو اللي انتقل لتشيلسي مقابل حوالي 116 مليون يورو ثم كارلوس باليبا لمانشستر يونايتد مقابل 75.9 مليون يورو ومارك كوكوريلا لتشيلسي مقابل 65.3 مليون يورو وجواو بيدرو لتشيلسي مقابل 63.7 مليون يورو ويان بول فان هيكي لتوتنهام مقابل 60 مليون يورو وبن وايت لأرسنال مقابل 58.5 مليون يورو وأليكسيس ماك أليستر لليفربول مقابل 42 مليون يورو.

الحكاية بدأت من توني بلوم

التحول الكبير في برايتون مرتبط بشكل أساسي بمالك النادي توني بلوم اللي استحوذ على النادي سنة 2009 وكان عنده خلفية قوية في الرياضيات وتحليل البيانات وقرر ينقل العقلية دي لكرة القدم.. بدل ما النادي يعتمد بشكل أساسي على الكشافين التقليديين بدأ يبني منظومة تجمع بين البيانات والإحصائيات والتحليل الفني والكشافين بهدف الوصول للاعبين اللي ممكن تكون قيمتهم الحالية قليلة لكن عندهم فرصة كبيرة إن مستواهم وسعرهم يزيدوا بشكل ضخم خلال كام سنة.

الفكرة ببساطة إن برايتون مش بيدور على اللاعب اللي كل العالم عارفه لأن ده غالبًا بيكون سعره عالي لكن بيدور على اللاعب اللي لسه في بداية الطريق ويكون عنده إمكانيات تخليه بعد فترة يبقى نجم كبير.

وده كان واضح جدًا في صفقة موسيس كايسيدو.. برايتون تعاقد مع كايسيدو من إنديبندينتي ديل فالي الإكوادوري في 2021 مقابل حوالي 4.5 مليون جنيه إسترليني وبعدها خرج إعارة إلى بيرشوت البلجيكي عشان ياخد فرصة أكبر ويتعود على كرة القدم الأوروبية.. بعد رجوعه لبرايتون قدر يثبت نفسه بسرعة في الدوري الإنجليزي وتحول من لاعب مجهول تقريبًا بالنسبة للجمهور الإنجليزي إلى واحد من أهم لاعبي الوسط في البريميرليج وبعد أقل من 3 سنين على وصوله للنادي انتقل لتشيلسي في صفقة وصلت قيمتها إلى حوالي 115 مليون جنيه إسترليني يعني برايتون ما اشترى نجم جاهز لكنه اشترى إمكانية نجم واشتغل عليها لحد ما قيمتها تضاعفت عشرات المرات.

مش كايسيدو لوحده

اللي يخلي تجربة برايتون مختلفة إن كايسيدو مش حالة استثنائية لكنه واحد من سلسلة طويلة من اللاعبين اللي النادي قدر يرفع قيمتهم.. أليكسيس ماك أليستر وصل لبرايتون من أرجنتينوس جونيورز وبعد فترة من التطور داخل النادي أصبح بطلًا للعالم مع الأرجنتين قبل ما ينتقل إلى ليفربول.

مارك كوكوريلا جه من خيتافي وبعد موسم واحد تقريبًا مع برايتون خطف أنظار تشيلسي وانتقل إليه مقابل مبلغ ضخم.. بن وايت كان حالة مختلفة شوية لأنه اتطور داخل منظومة برايتون نفسها قبل ما ينتقل لأرسنال مقابل حوالي 50 مليون جنيه إسترليني.. أما باليبا فهو أحدث مثال على قدرة النادي على تكرار التجربة اللاعب الكاميروني انتقل لبرايتون وهو لسه في سن صغيرة وبعد تطور مستواه، أصبح هدفًا لمانشستر يونايتد وانتقل إليه مقابل حوالي 75.9 مليون يورو وفق الأرقام المتداولة.

السر مش في البيع.. السر في اختيار اللاعب

أهم حاجة في نموذج برايتون إن النادي مش مستني اللاعب يبقى نجم وبعدين يبدأ يفكر يبيعه، بالعكس عملية البيع بتكون موجودة في الخطة من لحظة التعاقد مع اللاعب.. النادي بيدور على لاعب صغير السن عنده إمكانيات بدنية وفنية وممكن يتطور بشكل كبير وفي نفس الوقت يكون سعره لسه أقل من قيمته المستقبلية.

وده بيخلي عملية الانتقال شبه استثمار.. برايتون يدفع مبلغ صغير نسبيًا وبعدها يستثمر في اللاعب من خلال التدريب والمشاركة والمنافسة في الدوري الإنجليزي وكل دقيقة بيلعبها اللاعب وكل تطور في مستواه بيزود قيمته السوقية.

ولما يوصل لمرحلة معينة النادي ما بيبقاش مضطر يبيعه بأي سعر لكنه يستنى العرض اللي يناسب القيمة اللي حددها للاعب وكمان برايتون مش بيبيع لأنه محتاج فلوس ودي نقطة مهمة جدًا.. في أندية صغيرة بتبيع نجومها لأنها محتاجة الفلوس عشان تدفع مصاريف الموسم اللي بعده لكن برايتون عمل حاجة مختلفة هو بيبيع عشان يمول دورة جديدة من المشروع.

يعني لو لاعب خرج بـ60 أو 70 أو 100 مليون يورو الفلوس دي مش معناها إن النادي انتهى بالعكس بيبدأ يستخدم جزء منها في التعاقد مع مجموعة جديدة من اللاعبين اللي ممكن يتحولوا بعد كام سنة لصفقات ضخمة وده سبب إن رحيل كايسيدو وماك أليستر وكوكوريلا مانهوش المشروع.. كل لاعب بيخرج فيه لاعب تاني بيتم تجهيزه عشان ياخد مكانه.

الأسواق اللي برايتون بيدور فيها

برايتون كمان عنده ميزة مهمة جدًا وهي إنه مش بيقصر بحثه عن المواهب على سوق واحد.. النادي بيشتغل في أمريكا الجنوبية وأوروبا وأسواق أصغر مش دايمًا بتكون تحت رادار الأندية الإنجليزية الكبيرة وده بيديله فرصة إنه يوصل للاعبين قبل ما سعرهم يرتفع وده جزء أساسي من فلسفة النادي.

الفكرة إنك لو دخلت تنافس مانشستر سيتي أو تشيلسي أو ريال مدريد على لاعب عمره 20 سنة وبقى مشهور هتدفع عشرات الملايين لكن لو وصلت له وهو عنده 18 سنة ولسه بيلعب في دوري بعيد عن الأضواء ممكن تشتريه بجزء صغير جدًا من الرقم ده.

ورا الكواليس.. البيانات والكشافين

نجاح برايتون مش معتمد على الأرقام لوحدها ودي نقطة مهمة جدًا… النادي بيجمع بين تحليل البيانات والعمل التقليدي للكشافين.. البيانات بتساعد في تحديد اللاعبين اللي عندهم مؤشرات قوية وبعدها الكشافين والمدربين بيشوفوا اللاعب بشكل أكبر ويدرسوا شخصيته وقدرته على التأقلم وطريقة لعبه.

يعني الكمبيوتر ممكن يقولك إن لاعب معين عنده أرقام مميزة لكن برايتون محتاج يعرف هل اللاعب ده يقدر يتأقلم مع الدوري الإنجليزي؟ هل شخصيته مناسبة؟ هل عنده قابلية للتطور؟ وهل يقدر يلعب في النظام التكتيكي للفريق وده اللي بيخلي عملية الاختيار مش مجرد إحصائيات حلوة وبس.

أندية تانية ماشية بنفس المدرسة

برايتون مش النادي الوحيد اللي بنى نجاحه على الفكرة دي.. في ألمانيا عندك لايبزيج اللي بقى من أشهر الأندية في أوروبا في اكتشاف اللاعبين الشباب وتطويرهم ثم بيعهم بمبالغ كبيرة ونجح في إخراج أسماء زي ساديو ماني و زي جوسكو جفارديول ودومينيك سوبوسلاي ونكونكو وغيرهم.

وفي إيطاليا أتالانتا بقى نموذج مهم جدًا في تطوير اللاعبين خصوصًا من خلال الأكاديمية والكشافين واستغلال المواهب قبل ارتفاع أسعارها أما بنفيكا في البرتغال فهو من أشهر مصانع المواهب في أوروبا ونجح على مدار سنوات في بيع لاعبين بمبالغ ضخمة زي روبن دياز جواو فيليكس وجواو نيفيز.

وفي فرنسا ليل يعتبر نموذج قريب جدًا لأنه بيعتمد على التعاقد مع المواهب وتطويرها قبل بيعها لأندية أكبر وده ظهر مع لاعبين زي فيكتور أوسيمين وليني يورو كمان ريد بول سالزبورج بقى مدرسة كاملة في اكتشاف اللاعبين الشباب وطلع منه لاعيبة كبار زي إيرلينج هالاند ودومينيك سوبوسلاي.

الاختلاف الأكبر إن برايتون بيعمل كل ده داخل الدوري الإنجليزي الممتاز وده فارق ضخم لأن اللاعب اللي يثبت نفسه في البريميرليج بيزيد سعره بشكل أسرع من لاعب بنفس الإمكانيات في دوري أقل قوة أو أقل مشاهدة.

برايتون بالتالي عنده معادلة مثالية يشتري اللاعب صغير يطوره في واحد من أقوى دوريات العالم وبعدها يبيعه لنادي كبير .محتاج لاعب جاهز