شخصيات Uncharted في Fortnite وأخبار تانية في الملخص الأسبوعي

مساء الأكشن على مجتمع الجيمرز الجميل، الأسبوع اللي فات كان معاد إطلاق فيلم Uncharted في السينمات واللي من بطولة توم هولاند ومارك واليبرج، وبالمناسبة اللطيفة دي، هنشوف شخصيات اللعبة في لعبة فورتنايت

ومن المفترض إنها حزمة الشخصيات الجديدة توصل للعبة يوم 17 فبراير.

من كام يوم، أعلن حساب Call of Duty على تويتر إن استوديو Infinity Ward هيطور كلا من الجزء الجديد للعبة Modern Warfare والجزء الجديد من Warzone واللي هيتم إصدارهم خلال العام الحالي واللي بيتم تطويرهم بمحرك جديد.

نسأل الله التساهيل نشوف التريلر في أسرع وقت، وبمناسبة الكلام عن Warzone، كان في تصريح لبات كيلي رئيس Infinity Ward قال لموقع Charlie INTEL إنه هو ومخرج الألعاب في شركة Activision جوش بريدج إنهم مش مبسوطين بالوضع الحالي للعبة وإن الاستوديو بيحاول يصلح كل المشاكل الموجودة وإن ده أولوية قصوى للمطورين.

وده بيجي بعد عدة مشاكل ظهرت في الموسم الأول اللي تم طرحه شهر ديسمبر اللي فات.. بس مش مشكلة ننسى اللي فات ونركز في اللي جاي وإن شاء الله اللي جاي أحلى.

في طراطيش كلام إن في نسخة ريماستر جاية من لعبة GoldenEye 007 حسب ما موقع IGN في نسخته العربية نقل عن الصحفي جيف جروب ولكن في مجتمعات الجيمينج مفيش حاجة بتستخبى على طول والحقيقة بتظهر.. طبعا الكلام ده برا عن روك ستار والجزء الجديد من GTA.

عدد من المطورين اللي اشتغلوا على ألعاب زي Cyberpunk 2077 و The Witcher أعلنوا إنهم بيعملوا استوديو جديد اسمه Rebel Wolves.

والاستوديو قال في بيان إنهم شغالين على لعبة RPG سوداوية وخيالية وبيتم تطويرها بمحرك Unreal Engine وهتتوفر على الـPC وأجهزة الجيل الجديد من المنصات المنزلية.

Related Articles

Back to top button