كتب عن الكورة تستاهل وقتك في التوقف الدولي

الدوريات واقفة والمنتخبات بتلعب تصفياتها وماتشاتها الودية ولسه قدامنا شوية وقت قبل ما نرجع نتابع فرقنا كل أسبوع.. ولو بتحب الكورة وحاسس إن فترة التوقف الدولي خلت الأيام أهدى شوية فدي ممكن تكون فرصة حلوة تقرّب من اللعبة اللي بتحبها بشكل مختلف.

بعيد عن الماتشات والنتايج والأخبار اليومية فيه كتب حاول أصحابها يبصوا للكورة من زوايا تانية.. زي علاقة المشجع بفريقه.. لتأثير الفلوس والأرقام مرورًا بالفلسفة اللي صنعت مدارس كروية كاملة ووصولًا لتطور الخطط والتكتيك وعشان كده جمعنالك 4 كتب مشهورين جدًا في عالم الكورة وكل كتاب فيهم هيدخلك اللعبة من باب مختلف.

“فيفر بيتش”.. لما الكورة تبقى جزء من حياتك

في كتاب “فيفر بيتش” الكاتب البريطاني نيك هورنبي بيحكي عن علاقته بنادي أرسنال في مذكرات بتمتد  لسنين طويلة من حياته… الحكاية بدأت وهو طفل لما والده أخده أول مرة يحضر ماتش لأرسنال ومن اللحظة دي الكورة دخلت حياته وماخرجتش منها.. فضلت معاه في الطفولة والمراهقة والجامعة والشغل والعلاقات وبقت مرتبطة بذكريات ومواقف كتير عاشها.

بالنسبة لهورنبي الماتش مش مجرد 90 دقيقة ونتيجة في الآخر.. كل ماتش ممكن يكون مرتبط بشخص أو فترة معينة من حياته أو ذكرى مش قادر ينساها.. هزيمة ممكن تبوظله أسبوع كامل وموسم كامل ممكن يفضل مستنيه ويحلم بيه.

وده سر متعة الكتاب لأنه مش بيتكلم عن الكورة من ناحية التحليل والخطط لكنه بيتكلم عن إحساس المشجع.. هتلاقي فيه حاجات كتير شبه اللي كل مشجع بيحس بيها مع الفريق اللي بيحبه حتى لو بيخذلك فالماتش اللي تفضل فاكره سنين والنتيجة اللي ممكن تغير مودك طول اليوم.. أسلوب خفيف وساخر وده بيخلي الكتاب ممتع وسهل في القراءة حتى لو مش من مشجعي أرسنال.

“سوكيرنوميكس”.. لما الأرقام تتكلم

لو “فيفر بيتش” بيحاول يفهم الكورة من ناحية المشاعر “سوكيرنوميكس” بيعمل العكس تقريبًا وبيحاول يفهم اللعبة من خلال الأرقام والاقتصاد والبيانات.

الكتاب من تأليف سايمون كوبر وستيفان زيمانسكي وبيطرح أسئلة كتير بنسمعها طول الوقت في الكورة هل الفلوس فعلًا بتجيب بطولات؟ ليه بلاد معينة بتنجح في الكورة أكتر من غيرها؟ هل سوق الانتقالات بيحدد قيمة اللاعب بشكل عادل؟ وهل اللعب على ملعبك فعلًا بيديك أفضلية كبيرة؟

الكتاب مش بيكتفي بالإجابة من وجهة نظر المؤلفين لكنه بيرجع للأرقام والدراسات والبيانات علشان يختبر الأفكار اللي اتعودنا نصدقها.. وده اللي بيخليه ممتع لأنك ممكن تكتشف إن حاجات كتير عينك بتقولك إنها واضحة في الماتش الأرقام ممكن تقول عنها حاجة مختلفة تمامًا.

والأحلى إنك مش محتاج تكون فاهم اقتصاد علشان تقراه.. الكتاب مكتوب بطريقة بسيطة وبيخليك بعد شوية تبدأ تبص لقرارات الأندية والمدربين واللاعبين بطريقة مختلفة.

“بريليانت أورانج”.. إزاي هولندا غيرت طريقة لعب الكورة؟

في “بريليانت أورانج” الكاتب ديفيد وينر بياخدك في رحلة جوه واحدة من أهم التجارب في تاريخ الكورة المدرسة الهولندية والكرة الشاملة اللي ارتبطت بأياكس ومنتخب هولندا في السبعينيات خصوصًا مع يوهان كرويف لكن الكتاب مش مجرد شرح لطريقة لعب هولندا لأن وينر بيحاول يعرف ليه المدرسة دي ظهرت بالشكل ده من الأساس.

وبيعمل ده من خلال الربط بين الكورة وحاجات ممكن في البداية متحسش إنها ليها علاقة بيها زي الفن والعمارة وتخطيط المدن وطبيعة الحياة في هولندا.. الفكرة إن هولندا بلد صغيرة والمساحات فيها لها قيمة كبيرة وده انعكس حسب رؤية الكتاب على طريقة تفكير الهولنديين في المساحات والحركة والتنظيم.

ومن هنا الكرة الشاملة مابقتش مجرد طريقة لعب لكنها بقت طريقة تفكير لاعب يتحرك يبدّل مركزه يخلق مساحة لزميله وفي نفس الوقت يبقى قادر يفهم أكتر من دور جوه الملعب.. لو مهتم تعرف إزاي ظهرت مدرسة كروية أثرت بعد كده في أجيال كاملة من المدربين والفرق فالكتاب ده هيكون رحلة ممتعة جدًا.

“الهرم المقلوب”.. حكاية الكورة من أول الخطط لحد النهارده

لو أنت من الناس اللي بتقف عند التشكيل قبل الماتش وبتسأل: “هو المدرب بيلعب ليه كده؟” فكتاب “الهرم المقلوب” لجوناثان ويلسون ممكن يكون مناسب ليك جدًا.

الكتاب بيحكي تاريخ تطور الخطط في كرة القدم من تشكيل 2-3-5 القديم لما كان الهجوم واخد المساحة الأكبر ويمشي معاك خلال المراحل اللي غيرت شكل اللعبة بداية من المنتخب المجري مرورًا بالكرة البرازيلية والكرة الشاملة لحد ما نوصل للأفكار التكتيكية الحديثة.

لكن ويلسون مش بيقولك أسماء الخطط وخلاص هو بيحاول يشرح ليه الخطة دي ظهرت أصلًا.. إزاي فريق ابتكر فكرة جديدة والمنافسين اضطروا يلاقوا حل ليها وبعدها الحل نفسه تحول لفكرة جديدة عند مدرب تاني وهكذا الكورة فضلت تتطور من جيل لجيل.

يعني الكتاب مش بس هيخليك تعرف الفرق بين الخطط لكنه هيخليك تفهم إزاي الكورة وصلت للشكل اللي بنشوفه دلوقتي.. والكتاب دخل القائمة القصيرة لجائزة ويليام هيل للكتاب الرياضي سنة 2008 وبعدها فاز بجائزة أفضل كتاب كرة قدم في جوائز الكتاب الرياضي البريطانية سنة