آخر فرصة.. 5 دوريات في وقت الحسم

الموسم الحالي داخل على مراحله الأخيرة وكل الدوريات الكبيرة تقريبًا مولعة ومفيهاش أي حسم واضح سواء في إنجلترا أو إسبانيا أو إيطاليا أو فرنسا أو حتى في الدوريات العربية و كل نقطة بقت تفرق وكل مباراة ممكن تقلب شكل الجدول كله.

الدوري الإنجليزي

في إنجلترا الصراع بين أرسنال ومانشستر سيتي بقى أقوى وأمتع.. السيتي رفع رصيده لـ67 نقطة بعد الفوز على الجانرز وأرسنال متصدر بـ70 نقطة يعني الفارق 3 نقاط بس ومع وجود مباراة مؤجلة للسيتي ممكن تقلب الترتيب كله لو كسبها.

الموضوع لسه مفتوح على آخره خصوصًا إن فاضل 5 جولات بس.. أرسنال عنده ماتشات صعبة زي نيوكاسل ووست هام وفي نفس الوقت السيتي عنده جدول قوي برضه فيه برينتفورد وبورنموث وأستون فيلا وكمان ماتش مؤجل مع بيرنلي ممكن يبقى مفتاح الصدارة.

ولو حصل تساوي في النقاط ساعتها بيشوفوا فارق الأهداف وبعده الأهداف المسجلة وبعدها المواجهات المباشرة ولو كل حاجة اتساوت ساعتها ممكن نشوف مباراة فاصلة حاجة نادرة جدًا في البريميرليج.. حاليًا أرسنال متفوق بفارق أهداف بسيط (+37 مقابل +36) لكن السيتي متفوق في المواجهات المباشرة وده ممكن يرجح كفته في النهاية.

سيناريو الليجا

في إسبانيا برشلونة مسيطر على الصدارة وبقى قريب جدًا من اللقب.. الفريق متصدر بفارق 6 نقاط عن ريال مدريد ومعاه مباراة مؤجلة كمان وده بيخليه في موقف قوي جدًا.

برشلونة قدامه 7 مباريات أهمهم الكلاسيكو ضد ريال مدريد يوم 10 مايو ودي ممكن تكون مباراة الحسم.. باقي المباريات مش سهلة زي سيلتا فيجو وخيتافي وأوساسونا لكن لو حافظ على مستواه هيبقى قريب جدًا من التتويج.

ريال مدريد عنده ماتشات برضه صعبة زي بيتيس وإشبيلية وبرشلونة نفسه لكن المشكلة إن الفرق كبير ولو حتى حصل تساوي في النقاط برشلونة متفوق بفارق أهداف كبير (+15) وده بيخليه الأقرب لحسم اللقب.

الدوري الإيطالي

في إيطاليا إنتر ميلان مسيطر على الصدارة برصيد 78 نقطة وبقى قريب جدًا من حسم اللقب بعد تعثر نابولي.. إلإنتر ممكن يحسم البطولة بدري لو كسب ماتش تورينو.. وفي نفس الوقت ميلان ونابولي خسروا أو تعثروا ساعتها هيبقى الفارق مستحيل يتلحق ويتوج رسميًا قبل نهاية الدوري.

ولو المنافسين كملوا بشكل طبيعي الإنتر برضه في إيده كل حاجة لأنه محتاج 4 نقاط بس من مباراتين عشان يوصل لـ82 نقطة وده رقم محدش من المنافسين يقدر يوصله يعني بشكل كبير جدًا اللقب خلاص في طريقه لميلانو.

الدوري الفرنسي

في فرنسا الصراع بين باريس سان جيرمان ووصيفه لانس مولع جدًا.. باريس متصدر بـ63 نقطة ولانس وراه بـ62 نقطة بس.. يعني نقطة واحدة بس هي الفارق.. باريس قدامه مباريات مش سهلة زي أنجيه ولوريان وبريست وكمان مواجهة مباشرة مع لانس هتكون حاسمة جدًا.. أي تعثر بسيط ممكن يقلب البطولة بالكامل.

لانس برضه عنده جدول قوي فيه نيس وليون وباريس نفسه يعني المنافسة لسه مفتوحة على آخرها مفيش أي ضمان لحد دلوقتي مين هيكسب اللقب.

الدوري المصري

في مصر الصراع مش أقل سخونة بين الزمالك والأهلي وبيراميدز.. الزمالك متصدر بـ46 نقطة لكن الأهلي وبيراميدز وراه بـ44 نقطة يعني الفرق صغير جدًا.. الزمالك عنده 5 مباريات و الأهلي 4  وبيراميدز 5 وده مخلي الحسابات معقدة جدًا.

لو الزمالك كسب بيراميدز هيقرب جدًا من اللقب ويوسع الفارق لكن لو بيراميدز كسب هيقلب الصدارة لصالحه والأهلي كمان عنده فرصة يدخل على الخط لو كسب مبارياته المباشرة خصوصًا المواجهات الكبيرة.

الموضوع كله ممكن يتلخص في آخر جولة أو حتى يتحسم بفارق الأهداف أو المواجهات المباشرة يعني كل هدف في الجولات الجاية ممكن يساوي بطولة.

الدوري السعودي

في السعودية الصراع بين النصر والهلال والأهلي السعودي مولع جدًا.. النصر متصدر بـ76 نقطة والهلال 68 نقطة والأهلي 66 نقطة ولسه فاضل 5 جولات بس يعني كل حاجة ممكن تحصل.

النصر عنده مواجهات صعبة جدًا أهمها ضد الأهلي والهلال ودي ممكن تحدد البطل بشكل مباشر.. الهلال عنده جدول متوازن لكن أي تعثر ممكن يبعده عن المنافسة.. الأهلي برضه لسه في الصورة ولو كسب المواجهات الكبيرة ممكن يقلب الأمور تمامًا.

 مفيش فريق ضامن حاجة.. وكل مباراة جاية ممكن تكون هي اللي تحسم اللقب في النهاية.. كل الدوريات تقريبًا داخلة على مرحلة “لا مجال للخطأ” وكل فريق بيحارب لحد آخر دقيقة وده اللي مخلي الموسم الحالي واحد من أكثر المواسم إثارة في السنوات الأخيرة.